ជាតិ
ស្លាប់៤១នាក់ និងរបួសជាង២០០នាក់ដោយគ្រោះថ្នាក់ចរាចរណ៍នារយៈពេល៤ថ្ងៃកន្លងមក
× នាអំឡុងនៃពិធីបុណ្យភ្ជុំបិណ្ឌចាប់ពីថ្ងៃទី១០ ដល់ថ្ងៃទី១៣ ខែតុលា កន្លងមកនេះ មនុស្សចំនួន៤១នាក់បានស្លាប់ របួសធ្ងន់១៣០នាក់ របួសស្រាល៧២នាក់ ក្នុងចំណោមគ្រោះថ្នាក់ចរាចរណ៍១០១លើក។ នេះបើយោងតាមរបាយការណ៍របស់អគ្គស្នងការដ្ឋាននគរបាលជាតិ ដែលផ្សព្វផ្សាយនៅលើគេហទំព័រផ្លូវការរបស់ខ្លួន។
របាយការណ៍បានបង្ហាញថា ជនរងគ្រោះក្នុងគ្រោះថ្នាក់ចរាចរណ៍ទាំង១០១លើកនារយៈពេល៤ថ្ងៃកន្លងមកនេះ មាន១៥នាក់ជាអ្នកថ្មើរជើង ហើយ១៨៨នាក់ទៀតជាអ្នកបើកបរ និងអ្នករួមដំណើរម៉ូតូ ដោយមិនបានពាក់មួកសុវត្ថិភាព។
ការបើកល្មើសល្បឿន ការមិនគោរពសិទ្ធិអាទិភាព ការជែងគ្នា ការបើកបរក្នុងស្ថានភាពស្រវឹង និងការមិនប្រុងប្រយ័ត្នពេលបត់ឆ្វេង-ស្តាំ ជាមូលហេតុដែលនាំឲ្យមានគ្រោះថ្នាក់ចរាចរណ៍។ ខេត្តដែលមានគ្រោះថ្នាក់និងរងគ្រោះច្រើនរួមមាន ខេត្តកណ្តាល៩លើក ស្លាប់៦នាក់ របួស១៥នាក់, ខេត្តតាកែវ៩លើក ស្លាប់៣នាក់ របួស២៥នាក់, ខេត្តស្វាយរៀង៥លើក ស្លាប់៣នាក់ របួស៦នាក់, ខេត្តកំពង់ចាម៤លើក ស្លាប់៣នាក់ របួស៦នាក់ និងខេត្តព្រៃវែង៣លើក ស្លាប់៣នាក់ របួស៦នាក់។
ក្នុងគ្រោះថ្នាក់ចរាចរណ៍នោះមាន យានបុកនិងប៉ះទង្គិចមាន៖ ម៉ូតូនិងម៉ូតូ៤៥លើក, ម៉ូតូនិងរថយន្តតូច១៨លើក, ម៉ូតូនិងរថយន្តធំ៥លើក, ម៉ូតូនិងថ្មើរជើង៨លើក, ម៉ូតូដួលខ្លួនឯង ៦ លើក, ម៉ូតូនិងយានផ្សេង៨លើក, រថយន្តតូចនិងរថយន្តតូច២លើក, រថយន្តតូចនិងរថយន្តក្រុង១លើក, រថយន្តតូចនិងថ្មើរជើង២លើក, រថយន្តតូចនិងថ្មើរជើង២លើក, រថយន្តតូចនិងយានផ្សេង៣លើក, រថយន្តធំនិងថ្មើរជើង២លើក, គោយន្តកន្ត្រៃនិងថ្មើរជើង១លើក។ក្នុងនោះគ្រោះថ្នាក់នៅលើផ្លូវជាតិ ចំនួន៧១លើក ផ្លូវខេត្តក្រុង១១លើក និងផ្លូវលំចំនួន១៩លើក។ដោយឡែកយានយន្តដែលបង្កគ្រោះថ្នាក់មាន ម៉ូតូចំនួន៧៥លើក,រថយន្តតូច១៧លើក, រថយន្តធំ៦លើក,យានផ្សេង៣លើក ៕
Tag:
គ្រោះថ្នាក់ចរាចរណ៍
© រក្សាសិទ្ធិដោយ thmeythmey.com