លោក ហ៊ុន សែន បុណ្យអុំទូកអាចធ្វើទៅបានតែត្រូវធានាសុវត្ថិភាពខ្លួនឯង

ជាតិ

លោក ហ៊ុន សែន បុណ្យអុំទូកអាចធ្វើទៅបានតែត្រូវធានាសុវត្ថិភាពខ្លួនឯង

19, Nov 2015 , 11:30 am

រូបភាព

ដោយ:

លោកនាយករដ្ឋមន្ត្រី ហ៊ុន សែន បានមានប្រសាសន៍ថា កម្មវិធីបុណ្យអុំទូកអាចប្រព្រឹត្តិទៅបានប្រសិនបើបងប្អូនប្រជាពលរដ្ឋ ឬក្រុមអ្នកស្ម័គ្រចិត្តទាំងឡាយណាដែលមានលទ្ឋភាពចង់រៀបចំអុំទូក ប៉ុន្តែត្រូវទទួលខុសត្រូវចំពោះសុវត្ថិភាពដោយខ្លួនឯង។ នេះបើយោងតាមហ្វេសប៊ុកផ្លួវការរបស់លោកនាយករដ្ឋមន្ត្រី ហ៊ុន សែន កាលពីថ្ងៃទី១៨ ខែវិច្ឆិកា។

លោក ហ៊ុន សែន បានឱ្យដឹងថា «កម្រិតទឹកទន្លេពេលនេះកំពុងស្រកចុះយ៉ាងខ្លាំង ដែលគ្មានសុវត្ថិភាពក្នុងការប្រណាំងទូកជាផ្លូវការ។ ប៉ុន្តែប្រសិនបើបងប្អូនប្រជាពលរដ្ឋ ឬក្រុមអ្នកស្ម័គ្រចិត្តទាំងឡាយណាដែលមានលទ្ឋភាពចង់រៀបចំអុំទូក ក៏ពុំមានការហាមឃាត់ដែរ តែត្រូវទទួលខុសត្រូវចំពោះសុវត្ថិភាពដោយខ្លួនឯងអោយបានល្អបំផុត»។

លោកនាយករដ្ឋមន្ត្រីបានសង្កត់ធ្ងន់ថា «សុវត្ថិភាព និង សុខសន្តិភាព គឺជាសេចក្តីត្រូវការចាំបាច់បំផុតរបស់ប្រជាពលរដ្ឋខ្មែរ។ ម្យ៉ាងវិញទៀត កម្ពុជាមានឱកាសចូលរួមប្រកួតប្រជែងលើវិស័យកីឡាទាំងនៅក្នុងប្រទេស និងនៅលើឆាកអន្តរជាតិបាន គឺអាស្រ័យដោយប្រទេសយើងមានសន្តិភាពពេញលេញ»។

លោក ហ៊ុន សែន បានបន្ថែមទៀតថា «នៅក្នុងពិធីបុណ្យអុំទូកខាងមុខនេះ រាជរដ្ឋាភិបាលនឹងចាត់ចែងអោយមានការប្រគុំតន្ត្រីអបអរសាទរជូនប្រជាពលរដ្ឋនៅក្នុងរាជធានីភ្នំពេញ នៅតាមទីកន្លែងមួយចំនួនដូចជា រមណីយដ្ឋានវត្តភ្នំ សួនច្បារវត្តបទុមវតី និង កោះពេជ្រ ព្រមទាំងមានការផ្សាយបន្តផ្ទាល់តាម TV និងមានបាញ់កាំជ្រួចអបអរពិធីបុណ្យទៀតផង»៕