ពីនេះ ពីនោះ
ចង់ឲ្យទីក្រុងមានភាពស្រស់ស្អាត តែពលរដ្ឋនៅខ្វះស្មារតីចូលរួមដោះស្រាយ!
× ភ្នំពេញ៖ នៅតាមដងវិថីមួយចំនួន ទីសាធារណៈមួយចំនួន ផ្សារមួយចំនួនក្នុងរាជធានីភ្នំពេញគឺជាកន្លែងដែលមានការប្រកួតប្រជែងពិព័ណ៌សំរាម ដែលកើតចេញពីការទុកដាក់របស់ប្រជាពលរដ្ឋ អាជីវករដែលរស់នៅ លក់ដូរនៅតាមតំបន់ទាំងនោះ។ នៅពេលមានរូបភាពបែបនោះ មានសាធារណជនមួយចំនួនធំហាក់មានការបន្ទោសទៅអាជ្ញាធរ និងរដ្ឋថាមិនព្រមចាត់វិធានការដើម្បីដោះស្រាយបញ្ហាទាំងនេះ។ និយាយចុះនិយាយឡើងក្នុងចេតនាមួយគឺដាក់បន្ទុកទៅលើរដ្ឋដែលជាអ្នកទទួលបន្ទុកដោះស្រាយ ដោយមិនរាប់បញ្ចូលខ្លួនឯងផ្ទាល់។
នៅក្នុងច្បាប់ច្បាស់ណាស់មន្ត្រីរដ្ឋគឺត្រូវមានភារកិច្ច និងកាតព្វកិច្ចដើម្បីបម្រើសេវាកម្មនិងដោះស្រាយបញ្ហាជូនប្រជាពលរដ្ននៅក្នុងសង្គម។ ក៏ប៉ុន្តែពេលខ្លះពឹងតែរដ្ឋ ដែលជាអ្នកដើរតួនាទីដោះស្រាយ តែខ្វះការចូលរួមពីប្រជាពលរដ្ឋ គឺពិតជាពិបាកក្នុងការធ្វើកិច្ចការទាំងនោះណាស់។
តាមពិតទៅប្រជាពលរដ្ឋបច្ចុប្បន្ននេះគឺនៅមានកម្រិតភាពស្អាត និងការយល់ដឹងពីអនាម័យ និងការថែរក្សាបរិស្ថានដែលខ្លួនរស់នៅ កន្លែងខ្លួនធ្វើការ និងទីកន្លែងកំសាន្តដែលខ្លួនទៅកំសាន្តនៅមានកម្រិតនៅឡើយ។ ហើយនៅតាមទីកន្លែងទាំងនោះប្រជាពលរដ្ឋខ្លួនឯងជាអ្នកប្រើប្រាស់ប្រចាំថ្ងៃ រស់នៅជាមួយប្រចាំថ្ងៃ មើលឃើញប្រចាំថ្ងៃ ជួបប្រទះប្រចាំថ្ងៃ ហើយប្រជាពលរដ្ឋផ្ទាល់ក៏ជាអ្នកធ្វើឲ្យទីកន្លែងទាំងនោះ ស្អាត ឬកង្វក់ប្រចាំថ្ងៃដូចគ្នា។ ជាពិសេសដូចជានៅតាមដងវិថី ទីធ្លាសាធារណៈ ទីផ្សារមួយចំនួនជាដើមនោះ។
នៅពេលឃើញស្ថានភាពទីក្រុងកាន់តែសម្បូរសំរាម កាន់តែសម្បូរក្លិនស្អុយ មិនមានសណ្ដាប់ធ្នាប់ ខ្វះសោភ័ណ្ឌភាពលើតំបន់មួយចំនួននោះ សាធារណជនទាំងនោះបានដាក់សម្ពាធស្ទើរទាំងស្រុងទៅលើចំណាត់ការរបស់រដ្ឋថាមិនព្រមចាត់វិធានការក្នុងនាមជាអាជ្ញាធរ។ ហើយពលរដ្ឋមួយចំនួនហាក់មានការបោះបង់ចោលអ្វីដែលជាកាតព្វកិច្ច របស់ខ្លួនក្នុងនាមពលរដ្ឋ ដែលត្រូវចូលរួមបង្កើនភាពស្រស់ស្អាតនៃទីក្រុង។
និយាយបែបនេះមិនមែនជាការដាក់បន្ទុកឬ ដាក់កំហុសទៅលើសាធារណជននោះទេ។ ប៉ុន្តែដើម្បីជាដំណោះស្រាយចំពោះបញ្ហានេះគឺទាមទារឲ្យមានចូលរួម និងសហការគ្នារវាងប្រជាពលរដ្ឋ និងអាជ្ញាធរ។ ហើយអាជ្ញាធរត្រូវតែមានវិធានការច្បាស់លាស់ក្នុងការអប់រំ និងសម្រួលដល់ប្រជាពលរដ្ឋក្នុងការទុកដាក់សំរាម ចំណែកប្រជាពលរដ្ឋ ក៏ដូចជាសាធារណជន ក៏ត្រូវតែប្រកាន់ភ្ជាប់ភាពស្អាត សណ្ដាប់ធ្នាប់ និងអនាម័យផ្ទាល់ខ្លួនផងដែរ។ ហើយពេលខ្លះសាធារណជនក៏ត្រូវទទួលស្គាល់ខ្លួនឯងផងដែរ ថាមិនបានចូលរួមសម្អាតក្រុងនោះទេ។ ប្រសិនបើបែបនេះគឺចាំបាច់ត្រូវតែពិចារណឡើងវិញពីឥរិយាបថប្រចាំថ្ងៃរបស់ខ្លួនឡើងវិញ ទាំងពាក្យរិះគន់ខ្វះមូលដ្ឋានស្ថាបនា និងសកម្មភាពធ្វើឲ្យទីក្រុងខ្វះនូវសោភ័ណ្ឌភាព៕
© រក្សាសិទ្ធិដោយ thmeythmey.com