ជាតិ
នយោបាយជាតិ
អ្នកនាំពាក្យ៖ការស្នើឲ្យអន្តរជាតិជួយរបស់សមាជិកព្រឹទ្ធសភាបក្សសម រង្ស៊ី គឺជារឿងគួរឲ្យខ្មាសអៀន
× អ្នកនាំពាក្យព្រឹទ្ធសភា បានចាត់ទុកសកម្មភាពសមាជិកព្រឹទ្ធសភាគណបក្ស សម រង្ស៊ី ដែលស្នើឲ្យអន្តរជាតិជួយដោះស្រាយបញ្ហាកម្ពុជាកន្លងមកថា ជា រឿងគួរឲ្យខ្មាសអៀន ។ ការអះអាងដូច្នេះ ធ្វើឡើងតាមរយៈសេចក្តីថ្លែងការណ៍មួយ ចុះនៅថ្ងៃទី៧ ខែធ្នូនេះ ។
លោក ម៉ម ប៊ុននាង អ្នកនាំពាក្យព្រឹទ្ធសភា បានហៅការស្នើឲ្យបណ្តាប្រទេសផ្សេងៗ និងសហគមន៍អន្តជាតិទាំងឡាយ ជួយធ្វើអន្តរាគមន៍ ដោយលូកដៃចូលក្នុងអធិបតេយ្យភាពរបស់កម្ពុជា ពីសំណាក់សមាជិកព្រឹទ្ធសភាបក្ស សម រង្ស៊ី គឺជាទម្លាប់ដ៏គួរឲ្យខ្មាសអៀន។ អ្នកនាំពាក្យរូបនេះ បានលើកឡើងទៀតថា ទង្វើបែបនេះ គឺជាទម្លាប់របស់ក្រុមសមាជិកព្រឹទ្ធសភាបក្ស សម រង្ស៊ី ដែលមិនបានគិតពីឧត្តមប្រយោជន៍សរបស់ជាតិ និងប្រជាពលរដ្ឋ។
សូមបញ្ជាក់ថា កាលពីថ្ងៃទី៧ ម្សិលមិញ សមាជិកព្រឹទ្ទសភាគណបក្ស សម រង្ស៊ី ចំនួន៧រូប បានចេញសេចក្តីថ្លែងការណ៍រួមមួយ ជុំវិញការមិនចូលរួមពិនិត្យនិងផ្តល់យោបល់លើច្បាប់ហិរញ្ញវត្ថុ សម្រាប់គ្រប់គ្រងឆ្នាំ២០១៦ ។
សេចក្តីថ្លែងការណ៍របស់បក្ស សម រង្ស៊ី នោះ បានស្នើឲ្យស្ថាប័នអន្តរជាតិជួយអន្តរាគមន៍ និងបញ្ចប់ស្ថានភាពនយោបាយមិនល្អ ដែលកើតមានកន្លងមក។ បញ្ហា ដែលសមាជិកព្រឹទ្ធសភាបក្សសម រង្ស៊ី ចង់ឲ្យបណ្តាប្រទេសផ្សេងៗជួយធ្វើអន្តរាគមន៍នោះ រួមមាន ការប្រើអំពើហិង្សាលើតំណាងរាស្ត្របក្សប្រឆាំង២រូប និងការដកលោក កឹម សុខា ពីតំណែងអនុប្រធានទី១នៃរដ្ឋសភា ព្រមទាំងការដកលោក សម រង្ស៊ី ពីតួនាទីជាតំណាងរាស្ត្រ៕
© រក្សាសិទ្ធិដោយ thmeythmey.com