ជាតិ
លោក ហ៊ុន សែន ថា កម្ពុជាប្រុងប្រយ័ត្នជានិច្ចចំពោះក្រុមភេរវកម្ម
× លោកនាយករដ្ឋមន្ត្រី ហ៊ុន សែន បានបញ្ជាក់ថា បើទោះជាកម្ពុជាមិនមែនជាគោលដៅរបស់ពួក ISIS ក៏ដោយ តែកម្ពុជាក៏ត្រូវតែមានការប្រុងប្រយ័ត្នចំពោះក្រុមភេរវកម្មនេះ។ លោក ហ៊ុន សែន ថ្លែងបែបនេះនៅក្នុងកិច្ចប្រជុំសភាតំបន់អាស៊ី(APA)ដែលធ្វើឡើងនៅរាជធានីភ្នំពេញនៅព្រឹកនេះ។
នៅចំពោះមុខសមាជិកសភាតំបន់អាស៊ីជាង២០ប្រទេសនោះ លោកនាយករដ្ឋមន្ត្រី ហ៊ុន សែន បានលើកយកការវាយប្រហាររបស់ក្រុមអាយស៊ីស មកនិយាយក្នុងមហាសន្និបាតសភាតំបន់អាស៊ី(APA)។លោកថា ការវាយប្រហាររបស់ក្រុមISIS បានរាលដាលមកដល់អឺរ៉ុបនិងសហរដ្ឋអាមេរិក ហើយក៏ជាបញ្ហាធំដោយបានគំរាមកំហែងដល់ពិភពលោក ដែលអាចវាយប្រហាមកដល់តំបន់ផ្សេងៗដែរ។ ដូច្នេះសម្រាប់លោក ហ៊ុន សែន កម្ពុជាត្រូវតែមានការប្រុងប្រយ័ត្នចំពោះក្រុមភេរវកម្មនេះ បើទោះជាកម្ពុជាមិនមែនជាគោលដៅរបស់ពួកអាយស៊ីស (ISIS) ក៏ដោយ។
ថ្លែងចំពោះមុខតំណាងសមាជិកសភាទាំងនោះ ប្រមុខរដ្ឋាភិបាលកម្ពុជាបានបញ្ជាក់យ៉ាងដូច្នេះ៖«សូម្បីតែ តំណាងអង្គការសហប្រជាជាតិបានចូលមកជួបខ្ញុំ ខ្ញុំបាននិយាយថាបើទោះជាគេនិយាយថា ប្រទេសកម្ពុជាមិនមានពួកអាយស៊ីសចូលមកដល់ ក៏ប៉ន្តែកម្ពុជាមិនត្រូវភ្លេចខ្លួន គេអាចវាយនៅប្រទេសដទៃនៅក្នុងតំបន់យើង គេយកកម្ពុជាធ្វើជាតំបន់សុវត្ថិភាពវាយប្រហារក៏ថាបាន ដូច្នេះត្រូវតែមានការប្រុងប្រយ័ត្នជាមុននឹងបញ្ហានេះ»។
លោក ហ៊ុន សែន បានបញ្ជាក់ ការដែលលោកឆ្លៀតយកបញ្ហាពួកអាយស៊ីស មកអត្ថាធិប្បាយក្នុងបរិបទនៃកិច្ចប្រជុំ គឺដោយសារតែបញ្ហានេះ ក៏ស្ថិតនៅក្នុងប្រធានបទនៃកិច្ចប្រជុំមហាសន្និបាតដែរ ។ លោក ហ៊ុន សែន ក៏បានរំលឹកពីកិច្ចសន្ទនារវាងលោក ជាមួយលោក អូបាម៉ា ប្រធានាធិបតីអាមេរិក នៅក្នុងកិច្ចប្រជុំកំពូលអាស៊ានសហរដ្ឋអាមេរិកនៅប្រទេសម៉ាឡេស៊ី កាលពីថ្ងៃទី២១ខែវិច្ឆិកា កន្លងមក អំពីបញ្ហាទប់ស្កាត់ការសាយភាយរបស់ក្រុមភេរវជនទាំងនេះក្នុងតំបន់ផ្សេងៗទៀតដែរ។
គួរបញ្ជាក់ថា កាលពីថ្ងៃទី១៣ ខែតុលាកន្លងមក ក្រុមភេរវជនISIS បានវាយប្រហារនៅក្នុងប្រទេសបារាំង ដែលបានបណ្ដាលឲ្យមានមនុស្សស្លាប់ប្រមាណ១២៩នាក់ និងរងរបួសជាង៣០០នាក់៕
© រក្សាសិទ្ធិដោយ thmeythmey.com