លោក ហ៊ុន សែន នៅតែយល់ថា អាមេរិកគួរឈប់ប៉ងទម្លាក់អាសាដ

ជាតិ

នយោបាយជាតិ

លោក ហ៊ុន សែន នៅតែយល់ថា អាមេរិកគួរឈប់ប៉ងទម្លាក់អាសាដ

10, Dec 2015 , 10:42 am

រូបភាព

ដោយ: សៅ ផលនិស្ស័យ (Sao Phal Niseiy)

ប្រមុខរដ្ឋាភិបាលកម្ពុជាលោក ហ៊ុន សែន នៅថ្ងៃម្សិលមិញបានរិះគន់សារជាថ្មីពីវិធានការកម្ចាត់ក្រុមភេរវជនរដ្ឋឥស្លាមឬ ដែស្ហ (Daesh) នៅស៊ីរីនិងអ៊ីរ៉ាក់ដែលមិនឯកភាពនិងចុះសម្រុងគ្នាសោះ។ លោកនៅបញ្ជាក់ផងដែរពីការពិចារណាឡើងវិញនូវនយោបាយវាយរបបលោក បាសា អាល់អាសាដផង វាយក្រុមភេរវជនផង ព្រោះពេលណារដ្ឋាភិបាលលោក អាសាដចុះខ្សោយ វាមិនខុសពីជួយឲ្យក្រុមភេរវជនដែស្ហ (Daesh) កាន់តែខ្លាំងឡើយ។

ថ្លែងសុន្ទរកថាបើកមហាសន្និបាតលើកទី៨ របស់សភាតំបន់អាស៊ីស្តីពី«ការជំរុញសន្តិភាព, ការផ្សះផ្សានិងសន្ទនានៅតំបន់អាស៊ី» ម្សិលមិញនេះ នាយករដ្ឋមន្ត្រីកម្ពុជាលោក ហ៊ុន សែន ឆ្លៀតលើកឡើងពីកិច្ចសន្ទនាជាមួយប្រធានាធិបតីអាមេរិកលោក បារ៉ាក់ អូបាម៉ា កន្លងមកក្នុងវេទិកាអាស៊ាន-អាមេរិកពីរដងរួចមកហើយនោះជុំវិញយុទ្ធសាស្ត្រកម្ចាត់ក្រុមភេរវជនកន្លងមក។

ទោះបីមិននិយាយចំៗក៏ដោយការលើករឿងនេះជាឧទាហរណ៍ គឺជាការរិះគន់របស់នាយករដ្ឋមន្ត្រីកម្ពុជាចំពោះការប្រើប្រាស់ស្តង់ដាច្រើនជាន់របស់មហាអំណាចអាមេរិកក្នុងអន្តរាគមន៍កម្ចាត់ក្រុមភេរវជនរដ្ឋឥស្លាមឬក្រុមដែស្ហ ក្នុងប្រទេសស៊ីរី និងការមិនចុះសម្រុងគ្នារវាងប្រទេសពាក់ព័ន្ធ។ តែលោក ហ៊ុន សែន ក៏បន្តការអំពាវនាវរបស់លោក ឲ្យមានការទុកជម្លោះដោយឡែក ហើយងាកមកចាប់ដៃគ្នាប្រឆាំងភេរវកម្ម រួមទាំងពិចារណាពីគោលនយោបាយប្រឆាំងភេរវកម្មតែឆ្លៀតវាយសំពងរបបដឹកនាំលោក អាសាដ ថែមទៀត។

យោងតាមសម្តីលោក ហ៊ុន សែន ក្នុងជំនួបជាមួយប្រធានាធិបតីអាមេរិកលោក បារ៉ាក់ អូបាម៉ា កាលពីឆ្នាំមុននៅទីក្រុងណៃពីដ៍មីយ៉ាន់ម៉ា លោកបានចោទសួរចំៗទៅលោក អូបាម៉ា ពីអន្តរាគមន៍របស់អាមេរិកនៅស៊ីរីក្រោមលេសកម្ចាត់ក្រុមភេរវជនផង តែឆ្លៀតវាយប្រហាររដ្ឋាភិបាលលោកអាសាដផងនោះ។

លោកលើកឡើងថា៖« ដៃម្ខាងវាយអាសាដ ដៃម្ខាងវាយក្រុម អាយស៊ីស (ISIS) វាគ្រាន់តែជាគណិតវិទ្យា មួយដកមួយស្មើសូន្យប៉ុណ្ណោះ»។ លោកសង្កត់ធ្ងន់ថា កាលណាធ្វើឲ្យរបបអាសាដទន់ខ្សោយ ដូចដែលអនុវត្តកន្លងមកវាត្រឹមតែជួយឲ្យក្រុមភេរវជនរដ្ឋឥស្លាមឬក្រុមដែស្ហ បង្កើនកម្លាំងរបស់ខ្លួនប៉ុណ្ណោះ។

លោកបានអំពាវនាវម្តងទៀតឲ្យភាគីពាក់ព័ន្ធទាំងអស់ពិនិត្យឡើងវិញនូវនយោបាយប្រឆាំងភេរវកម្ម ទុកជម្លោះមួយឡែក ត្រលប់មករួមកម្លាំងគ្នាប្រយុទ្ធប្រឆាំងនឹងក្រុមភេរវជន ហើយពិចារណាផ្លាស់ប្តូរគោលនយោបាយចំពោះរបបដឹកនាំស៊ីរីរបស់ លោក បាសា អាល់អាសាដ ផងដែរ។

ទាក់ទិននឹងការពិចារណាពីនយោបាយចំពោះរបបអាសាដនេះ លោក ហ៊ុន សែន ប្រហែលសំដៅលើការត្រលប់មកចាប់ដៃគ្នានិងឈប់វាយរបបអាសាដ ព្រោះរបបអាសាដក៏ចាត់ទុកក្រុមរដ្ឋឥស្លាមឬក្រុមដែស្ហជាសត្រូវដែរនោះ។

លោក ហ៊ុនសែន ក៏ឆ្លៀតប្រៀបធៀបដែររវាងកម្លាំងរដ្ឋប្រឆាំងភេរវជននិងក្រុមភេរវជនផ្ទាល់ថា ព្រោះក្រុមភេរវជនមានឯកភាពគ្នា ដែលមានន័យថាទោះក្រុមណាក្តី តែពួកគេឯកភាពគ្នាដើម្បីបំផ្លាញអាយុជីវិតប្រជាជនស្លូតត្រង់តែប៉ុណ្ណោះ។

ការលើកឡើងរបស់លោក ហ៊ុន សែន បែបនេះ ក៏ដោយសារយុទ្ធនាការប្រឆាំងក្រុមភេរវជនមិនមានប្រសិទ្ធភាព ហើយបញ្ហាវាកាន់តែធ្ងន់ធ្ងរជាងមុន ព្រោះក្រុមភេរវជនបន្តអុកឡុកគ្រប់ទីកន្លែង រហូតដល់អឺរ៉ុប និងអាមេរិកថែមទៀត។

យ៉ាងណាមិញ មិនមែនមានតែលោក ហ៊ុន សែន ប៉ុណ្ណោះទេដែលចង់ឲ្យមានការបញ្ឈប់ការប៉ងទម្លាក់លោក អាសាដ ពីតំណែង ហើយត្រលប់មក ពង្រឹងយុទ្ធសាស្ត្រប្រយុទ្ធប្រឆាំងក្រុមរដ្ឋឥស្លាម សូម្បីអ្នកនយោបាយអាមេរិក និងបារាំង ក៏ផ្លាស់ប្តូរជំហរប្រឆាំងរដ្ឋាភិបាលនេះដែរ។

តាំងពីមានការវាយប្រហារនៅទីក្រុងប៉ារីស បេក្ខជនប្រធានាធិបតីបក្សប្រជាធិបតេយ្យលោកស្រី ហ៊ីឡារី គ្លីនតុនបានចេញមុខស្នើសុំឲ្យរដ្ឋបាលលោក បារ៉ាក់ អូបាម៉ា បញ្ឈប់បំណងទម្លាក់លោក បាសា អាល់ អាសាដ ពីតំណែង ដោយត្រលប់មកពង្រឹងយុទ្ធសាស្ត្រកម្ចាត់ក្រុមដែស្ហវិញទើបប្រសើរជាង។ លោកស្រី ហ៊ីឡារី គ្លីនតុន ជឿជាក់ថា ការទម្លាក់លោក អាសាដ លែងជាចំណុចស្នូលនៃការដោះស្រាយបញ្ហាភេរវកម្ម ដូចដែលលោក អូបាម៉ា អះអាងទៀតហើយ។

ចំណែកប្រធានាធិបតីបារាំងលោក ហ្វ្រង់ស្វ័រ ហូឡង់ ឯណោះវិញក៏បានផ្លាស់ប្តូរជំហរបន្តិចដែរ ដោយលោកលែងមើលឃើញលោក អាសាដ ជាគ្រោះថ្នាក់ខ្លាំងទៀត។ លោកធ្លាប់អះអាងថា សត្រូវបារាំងមិនមែនលោក អាសាដ ទេ តែជាក្រុមរដ្ឋដែស្ហឯណោះវិញទេ។ កន្លងមក លោក អាសាដ ជាបន្លាក្នុងក្រសែរភ្នែករដ្ឋាភិបាលបារាំង ហើយបារាំងតែងអះអាងថា ដំណោះស្រាយនៅស៊ីរីអាចកើតឡើងបានដរាបណាអាសាដ ចុះចែងពីតំណែង។

ចំណែកមេដឹកនាំបក្សប្រឆាំងមាននិន្នាការស្តាំ គឺបក្សរណសិរ្សជាតិ លោកស្រី Marine Le Pen ដែលបក្សលោកស្រីទើបឈ្នះការបោះឆ្នោតថ្នាក់តំបន់កាលពីសប្តាហ៍មុនផងនោះ បានបង្ហាញជំហរកណ្តាលមួយដោយលោកស្រីអះអាងថា របបដឹកនាំដែលមានស្រាប់នៅស៊ីរី វាប្រាកដជាប្រសើរជាងរដ្ឋដែលបង្កើតដោយក្រុមភេរវជនដែស្ហ។ ទោះមិននិយាយចំក៏ដោយ លោកស្រីចង់បញ្ជាក់ថា ទោះបីជាបារាំងមិនពេញចិត្តលោក អាសាដ ក៏ដោយ ការទប់ស្កាត់ក្រុមភេរវជនវាសំខាន់ជាអ្វីទាំងអស់៕