ជាតិ
ខួបមួយឆ្នាំ៖ លោក ចាន់ សុវ៉េត នៅតែស្ថិតក្នុងចិត្តអ្នកស្រឡាញ់សិទ្ធិមនុស្ស រូបថតសពលោក ចាន់ សុវ៉េត និងភរិយា ព្រមទាំងកូនទាំង ៣ របស់លោកក្នុងពិធីបុណ្យសពលោក ចាន់ សុវ៉េត កាលពីឆ្នាំទៅ
×
ថ្ងៃនេះជាខួបមួយឆ្នាំនៃមរណភាពលោក ចាន់ សុវ៉េត សកម្មជនការពារសិទ្ធិមនុស្សដ៏ល្បីល្បាញនៅកម្ពុជា។ លោក ចាន់ សុវ៉េត បានទទួលមរណភាពដោយសារជំងឺគាំងបេះដូងកាលពីថ្ងៃទី ១០ ខែធ្នូ ឆ្នាំ ២០១៤ ដែលជាទិវាសិទ្ធិមនុស្សអន្តរជាតិ។
មរណភាពរបស់អ្នកការពារសិទ្ធិមនុស្សនៅកម្ពុជារូបនេះ មិនមែនតែមន្ត្រីអង្គការសង្គមស៊ីវិល អ្នកស្រឡាញ់សិទ្ធិមនុស្ស គណបក្សប្រឆាំង សោកស្តាយនោះទេ តែមន្ត្រីរដ្ឋាភិបាលក៏ស្តាយស្រណោះលោក ចាន់ សុវ៉េត ផងដែរ។ នៅទីលានប្រជាធិបតេយ្យនៅថ្ងៃនេះ សកម្មជនសិទ្ធិមនុស្ស ប្រជាពលរដ្ឋរាប់ពាន់នាក់ បានគោរពវិញ្ញាណក្ខន្ធលោក ចាន់ សុវ៉េត មុននឹងផ្តើមកម្មវិធីសិទ្ធិមនុស្សនៅថ្ងៃទី ១០ ខែធ្នូ ឆ្នាំ ២០១៥។
លោក នី ចរិយា សកម្មជនការពារសិទ្ធិមនុស្សមួយរូបនៅកម្ពុជាដែរនោះ បានថ្លែងថា បើទោះបីជាលោក ចាន់ សុវ៉េត បានស្លាប់ទៅអស់រយៈពេល១ ឆ្នាំក៏ពិតមែន តែលោកនៅតែនឹកឃើញស្នាដៃ និងការលះបង់របស់លោក ចាន់ សុវ៉េត ក្នុងបុព្វហេតុការពារសិទ្ធិមនុស្ស។ លោក បញ្ជាក់យ៉ាងនេះថា៖«យើងនៅតែចងចាំជានិច្ចនូវគុណសម្បត្តិរបស់លោកចាន់ សុវ៉េត។ ខ្ញុំចង់ឲ្យអ្នកជំនាន់ក្រោយខិតខំសាងអំពើល្អ ព្រោះជីវិតមនុស្សគ្មាននរណាអមតៈនោះទេ តែមានតែកិត្តិយសទេនៅបានយូរ ដូចជាលោក ចាន់ សុវ៉េត ជាដើម»។
បើតាមលោក នី ចរិយា ខួប ១ ឆ្នាំ នៃសពលោក ចាន់ សុវ៉េត ក្រុមគ្រួសារសព មិនបានរៀបចំពិធីធំដុំនោះទេ ដោយគ្រាន់តែរូបលោក និងគ្រួសារលោក ចាន់ សុវ៉េត យកចង្ហាន់ទៅប្រគេនព្រះសង្ឈតែប៉ុណ្ណោះ។
កន្លមកលោក កឹម សុខា ប្រធានស្តីទីគណបក្សសង្គ្រោះជាតិ ធ្លាប់បានថ្លែងក្នុងពិធីបុណ្យសពលោក ចាន់ សុវ៉េត កាលពីឆ្នាំមុនថា មរណភាពរបស់លោក ចាន់ សុវ៉េត គឺជាការបាត់បង់សកម្មជនសិទ្ធិមនុស្សដ៏សំខាន់របស់កម្ពុជា។ លោកថា លោក ចាន់ សុវ៉េត បានខិតខំប្រឹងប្រែង និងធ្វើពលិកម្មយ៉ាងធំធេងមិនអាចកាត់ថ្លៃបាន ក្នុងបុព្វហេតុការគោរព និងការការពារសិទ្ធ មនុស្សនៅក្នុងព្រះរាជាណាចក្រកម្ពុជា អស់រយៈពេលជិត ២០ឆ្នាំ ក្នុងដំណើរការលទ្ធិប្រជាធិបតេយ្យនៅប្រទេសកម្ពុជា ដែលទើបតែរួចផុតពីការឈឺចាប់ ទុក្ខវេទនា ដោយសារសង្គ្រាមផ្ទៃក្នុង និងការឈ្លានពានរបស់បរទេស។ លោកសង្កត់ធ្ងន់បែបនេះថា៖«លោក ចាន់ សុវ៉េត បានលះបង់ពេលវេលាច្រើនបំផុតនៅជាមួយក្រុមគ្រួសារ ដោយបានយកពេលវេលានោះមកបំរើដល់បុព្វហេតុការពារសិទ្ធិមនុស្ស និងជួយជន រងគ្រោះដោយអំពើរំលោភសិទ្ធិមនុស្សក្នុងការស្វែងរកយុត្តិធម៌»។
លោក ផៃ ស៊ីផាន មន្ត្រីរដ្ឋាភិបាល ក៏ធ្លាប់សម្តែងការសោកស្តាយចំពោះការបាត់បង់លោក ចាន់ សុវ៉េត ដែរ។ លើសពីនេះ មន្ត្រីរដ្ឋាភិបាលរូបនេះ ថែមទាំងបានចូលរួមក្នុងពិធីបុណ្យសពលោក ចាន់ សុវ៉េត ទៀតផង។
លោក ចាន់ សុវ៉េត បានបម្រើការងារជាអ្នកការពារសិទ្ធិមនុស្សជាមួយអង្គការអាដហុក ជិត ២០ ឆ្នាំ ពោលគឺចាប់តាំងពីឆ្នាំ ១៩៩៦ ដល់ថ្ងៃទី ១០ ខែធ្នូ ឆ្នាំ ២០១៤ ។ លោក ទទួលមរណភាពក្នុងអាយុ ៥១ ឆ្នាំ។ សម្តីលោក ចាន់ សុវ៉េត កាលនៅមានជីវិត ដែលគេចងចាំជាងគេនោះ គឺលោកបាននិយាយថា «មានបាយអត់សិទ្ធិ ថ្ងៃណាមួយយើងហូបបាយនោះលែងកើតហើយ»៕
© រក្សាសិទ្ធិដោយ thmeythmey.com