ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
អត្ថបទពាណិជ្ជកម្ម
បទយកការណ៍/សម្ភាស
បទយកការណ៍ / បទសម្ភាសន៍
សេដ្ឋកិច្ច
ហាងបោកអ៊ុតទំនើបគ្រោងពង្រីកសាខាទៅកាន់ពិភពលោក
10, Dec 2015 ,
1:56 pm
រូបភាព
លោក ហែម ហេម៉ា អ្នកបង្កើតហាងបោកអ៊ុតទំនើប
×
ដោយ:
ភ្នំពេញ៖ ហាងបោកអ៊ុតទំនើបដែលកំពុងពេញនិយមនៅកម្ពុជា គ្រោងបោះជំហានទៅកាន់ទីផ្សារពិភពលោកនាពេលខាងមុខនេះ។ នៅក្នុងបទសម្ភាសន៍ជាមួយអ្នកសារព័ត៌មានអេឡិចត្រូនិចថ្មីៗ លោក ហែម ហេម៉ា និយាយថា អ្នកណាក៏ត្រូវការសេវាកម្មបោកអ៊ុតដែរ។ លោកចង់នាំអាជីវកម្មដែលល្អជាងគេ និងជាស្នាដៃរបស់ខ្មែរឲ្យអន្តរជាតិស្គាល់។
ជាបន្តទៅនេះ សូមអញ្ជើញអានបទសម្ភាសន៍រវាងលោក ញ៉ុង ហេង អ្នកសារព័ត៌មាននៃសារព័ត៌មានអេឡិចត្រូនិចថ្មីៗ ជាមួយលោក ហែម ហេម៉ា ម្ចាស់ហាងយីហោបោកអ៊ុតទំនើបខាងក្រោមនេះដូចតទៅ៖
លោក ញ៉ុង ហេង៖
លោក ហែម ហេម៉ា ជាសំណួរដំបូងរបស់ខ្ញុំ តើលោកបើកអាជីវកម្មបោកអ៊ុតទំនើបចាប់ពីពេលណាមក? ហើយមកដល់ពេលនេះ បោកអ៊ុតទំនើបមានប៉ុន្មានសាខាដែរ?
លោក ហែម ហេម៉ា៖
ខ្ញុំបើកវាតាំងពីឆ្នាំ២០០៦ តែមិនដំណើរការ ហើយបើកអាជីវកម្មផ្សេងៗ តែត្រូវខាតបង់អស់។ ខ្ញុំក៏ងាកមកបើកបោកអ៊ុតទំនើបឡើងវិញនៅឆ្នាំ២០១០។ នៅពេលដែលខ្ញុំធ្វើផ្ទាល់ឃើញថាអាជីវកម្មមួយនេះល្អដូចពេលដែលខ្ញុំគិតពីមុនមកអ៊ីចឹង។ នៅឆ្នាំ២០១២ ខ្ញុំក៏ចាប់ផ្តើមពង្រីកសាខាបោកអ៊ុតទំនើបថែមទៀត ហើយហ្វ្រេនឆាយ (Franchise) បោកអ៊ុតទំនើបចាប់ដំណើរការពីពេលនោះមក។រហូតមកដល់ថ្ងៃនេះបោកអ៊ុតទំនើបមានប្រមាណ១៨០សាខាស្ទើរទូទាំងប្រទេសកម្ពុជា និង នៅប្រទេសវៀតណាម១សាខាផងដែរ។គ្រាន់តែនៅភ្នំពេញមានជាង១០០សាខាហើយ។
លោក ញ៉ុង ហេង៖
ហេតុអ្វីបានជាលោកសម្រេចចិត្តបើកអាជីវកម្មមួយនេះ? ហើយនៅពេលបើកវាឡើង តើមានឧបសគ្គដែរឬទេ?
លោក ហែម ហេម៉ា៖
ខ្ញុំមើលឃើញថា មានឱកាសអាចធ្វើទៅបាន ហើយអាជីវកម្មមួយនេះល្អ។ អ្នកណាក៏គេប្រើប្រាស់សេវាមួយនេះដែរ។រឿងឧបសគ្គ ពេលបើកលើកដំបូងនៅឆ្នាំ២០០៦ ខ្ញុំយល់ឃើញថាប្រជាពលរដ្ឋខ្មែរមើលងាយមុខរបរនេះ ខ្ញុំក៏បែរមកបើកអាជីវកម្មផ្សេងវិញ។ លុះឆ្នាំ២០១០ ខ្ញុំបើកវាម្តងទៀត ពេលនោះយើងថ្មី មិនទាន់ចេះអ្វីក្រៅពីបោកអ៊ុត ចេះពីការបង្ហាត់បង្ហាញរបស់ចាស់បានខ្លះៗ។ យើងមិនទាន់មានរូបមន្តច្បាស់លាស់។យើងធ្វើដោយកម្លាំងខ្លួនឯងសុទ្ធសាធគឺធ្វើតែពីរនាក់ប្តីប្រពន្ធ ហើយណាមួយគេមកទាលុយ។ យើងមិនទាន់មានអ្វីទាំងអស់ គឺមានតែម៉ាស៊ីនជជុះមួយយកមកកែរកុនប្រើប៉ុណ្ណោះ។
លោក ញ៉ុង ហេង៖
តើបោកអ៊ុតទំនើបមានលក្ខណៈពិសេសខុសពីបោកអ៊ុតផ្សេងទៀតយ៉ាងដូចម្តេចដែរ ទើបធ្វើឲ្យវាដំណើរការមកដល់ពេលនេះ?
លោក ហែម ហេម៉ា៖
គឺយើងធ្វើបច្ចុប្បន្នភាពវារហូត។ យើងមានរោងចក្រផលិតសាប៊ូ ដែលមានឈ្មោះថាសាប៊ូបោកអ៊ុតទំនើប ផ្ទាល់ខ្លួន និងផលិតផលសម្រាប់ការបោកអ៊ុតផ្សេងទៀតដែលជារូបមន្តសម្ងាត់របស់យើងដែលអ្នកដ៏ទៃអត់មាន។ សេវារបស់យើងគឺលឿន តែ៣០នាទីអាចយកត្រឡប់ទៅវិញបាន តែតម្លៃរាងថ្លៃជាងគេបន្តិចព្រោះយើងប្រើផលិតផលល្អៗដែលធ្វើការពិសោធន៍ដោយខ្លួនខ្ញុំផ្ទាល់។
លោក ញ៉ុង ហេង៖
បើមានអ្នកណាម្នាក់ចង់ទិញសិទ្ធិបើកអាជីវកម្មមួយពីលោក តើគេត្រូវធ្វើអ្វីខ្លះ? គេត្រូវចំនាយប៉ុន្មាន? ហើយអ្នកបើកកន្លងមកអាចរកប្រាក់ចំណេញបានចំនួនប៉ុន្មាន?
លោក ហែម ហេម៉ា៖
បើចង់ទិញសិទ្ធិបើកអាជីវកម្ម ត្រូវមានដើមទុនយ៉ាងហោចណាស់ចំនួន៥៣០០ដុល្លារ មានទីតាំងច្បាស់លាស់ និងត្រូវទទួលការបណ្តុះបណ្តាលបីថ្ងៃ។ អ្នកទទួលបានសិទ្ធិក្នុងម្នាក់ៗត្រូវបង់ប្រាក់ចំនួន១ពាន់ដុល្លារក្នុងមួយឆ្នាំ។ ហើយចាប់ពីឆ្នាំ២០១៦ ប្រាក់៥០ភាគរយនៃប្រាក់១ពាន់ដុល្លារនេះ ត្រូវបរិចាគទៅមន្ទីពេទ្យគន្ថបុប្ផា។ចំពោះការបើកដំបូង ត្រូវការមនុស្សតែបីនាក់ តែពេលវាកាន់តែរីកធំចំនួននេះត្រូវបន្ថែម កន្លែងខ្លះមានមនុស្សដល់១៥នាក់។ រឿងប្រាក់ចំណេញគឺវាទៅតាមសាខានីមួយៗ ខ្លះចំណេញប្រាក់បានចំនួន៥ឫ៦ពាន់ដុល្លារក្នុងមួយខែ សាខាខ្លះយ៉ាងហោចក៏បាន១ពាន់ដុល្លាដែរ។ ជារួមសាខាអាចរកប្រាក់ចំណេញពី១ពាន់ទៅ១ម៉ឺនដុល្លារក្នុងមួយខែ។
លោក ញ៉ុង ហេង៖
នៅពេលខាងមុខលោកនឹងធ្វើអ្វីទៀតជាមួយនឹងអាជីវកម្មនេះ?
លោក ហែម ហេម៉ា៖
ខ្ញុំនឹងពង្រីកបោកអ៊ុតទំនើបទៅកាន់ពិភពលោក។ បន្ទាប់ពីប្រទេសវៀតណាម ជំហ៊ានទី២យើងនឹងពង្រីកទៅប្រទេសថៃនិងសិង្ហបុរីជាបន្តបន្ទាប់ ដែលជាតំបន់អាស៊ានជាមុនសិន។ យើងចង់លក់ហ្វ្រេនឆាយ(សិទ្ធិលក់ដូរ) ដែលមានឈ្មោះបោកអ៊ុតទំនើបរបស់ខ្មែរចេញទៅក្រៅប្រទេស តាមរយៈការផ្តល់សិទ្ធិផ្តាច់មុខដល់ប្រទេសនីមួយៗរៀងៗខ្លួនតែម្តង។
លោក ញ៉ុង ហេង៖
តើលោកមើលឃើញយ៉ាងដូចម្តេចបានជាចង់ពង្រីកទៅដល់ទីផ្សារពិភពលោក?
លោក ហែម ហេម៉ា៖
វិស័យបោកអ៊ុតមនុស្សប្រើគ្រប់គ្នា។ ហើយខ្ញុំមើលឃើញថានៅលើពិភពលោក អត់ទាន់មានកន្លែងបោកអ៊ុតណាដែលស្អាតដូចបោកអ៊ុតទំនើបដែលខ្មែរយើងជាអ្នកបង្កើតនៅឡើយ។ដូច្នេះយើងនាំអ្វីដែលយើងអាចធ្វើបាន អ្វីដែលស្អាតជាងគេ ដើម្បីបង្ហាញទៅពិភពលោកថា ខ្មែរយើងអាចធ្វើបាន។ ខ្ញុំចង់ឲ្យគេស្គាល់របស់ខ្មែរ។ ខ្មែរយើងអាចធ្វើបានមិនចាំបាច់ទិញBrandពីគេមកនោះទេ៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
បោកអ៊ុតទំនើប
ហែម ហេម៉ា
© រក្សាសិទ្ធិដោយ thmeythmey.com
អត្ថបទពេញនិយម
«ទាយជ្ជទាន»មានន័យដូចម្តេច?
1 សប្តាហ៍
«ចរិត,ចារឹក និងចារិក» មានន័យខុសគ្នាដូចម្តេច?
5 ថ្ងៃ
កាឡកិណី ឬ កាឡកណ្ណី មានន័យថា មនុស្សឥតបុណ្យ, មនុស្សចង្រៃ
4 ថ្ងៃ
អាជ្ញាធរ សម្រេចបញ្ឈប់អាជីវកម្មទូកទេសចរណ៍ បុប្ផាអង្គរ ក្រោយបោះសំរាមចូលក្នុងទន្លេ
4 ថ្ងៃ
«វាសនដ្ឋាន ឬវសនដ្ឋាន» តើពាក្យទាំងនេះមានន័យដូចម្តេច?
6 ថ្ងៃ
អត្ថបទពេញនិយមបន្ថែម