រដ្ឋមន្ត្រី និងពាណិជ្ជករមានកង្វល់អំពីរបាំងមិនមែនពន្ធគយក្នុងសហគមន៍អាស៊ាន

ជាតិ

សេដ្ឋកិច្ច

រដ្ឋមន្ត្រី និងពាណិជ្ជករមានកង្វល់អំពីរបាំងមិនមែនពន្ធគយក្នុងសហគមន៍អាស៊ាន

19, Dec 2015 , 2:31 pm

រូបភាព

ដោយ:

ភ្នំពេញ៖ របាំងមិនមែនពន្ធគយនៅតែជាឧបសគ្គសម្រាប់សហគ្រិនកម្ពុជា ពេលនាំផលិតផលទៅលក់នៅបណ្តាប្រទេសសមាជិកអាស៊ាន បើទោះជាពន្ធគយត្រូវលុបចោលក៏ដោយ។នេះបើតាមការធ្វើបទបង្ហាញរបស់លោក ស៊ុន ចាន់ថុល រដ្ឋមន្ត្រីក្រសួងពាណិជ្ជកម្មក្នុងសិក្ខាសាលាស្តីពី ឱកាសសម្រាប់សហគ្រិនកម្ពុជា និងទីផ្សារអាស៊ាន នៅថ្ងៃទី១៧ខែធ្នូឆ្នាំ២០១៥ នាមជ្ឈមណ្ឌលសហប្រតិបត្តិការកម្ពុជា-កូរ៉េ (CKCC)។

លោក ស៊ុន ចាន់ថុល បង្ហាញការព្រួយបារម្មណ៍ ខណៈពេលបណ្តាប្រទេសសមាជិកអាស៊ាននៅតែប្រើប្រាស់របាំងមិនមែនពន្ធគយ ដើម្បីរកផលប្រយោជន៍ផ្នែកសេដ្ឋកិច្ចជំនួសឲ្យប្រាក់ចំណូលពន្ធគយ។ លោកលើកឡើងយ៉ាងនេះថា៖« អត្រាពន្ធគយសូន្យមែន តែរបាំងមិនមែនពន្ធគយទើបជាបញ្ហា។ ដូច្នេះរដ្ឋមន្ត្រីក្រសួងសេដ្ឋកិច្ចនៃប្រទេសអាស៊ានទាំងអស់កំពុងពិភាក្សាគ្នារកនីតិវិធីបំបាត់របាំងមិនមែនពន្ធគយឲ្យបានច្រើនបំផុត»។ លោករដ្ឋមន្ត្រីផ្តល់អនុសាសន៍ថា អាស៊ានទទួលបានជោគជ័យលុះត្រាប្រទេសទាំងអស់ដករបាំងមិនមែនពន្ធគយចេញឲ្យបានច្រើន។

នៅក្នុងឱកាសចូលរួមក្នុងសិក្ខាសាលានេះដែរ អ្នកស្រី កែវ មុំ ម្ចាស់ក្រុមហ៊ុននំស្រួយលីលី ក៏មានកង្វល់អំពីរបាំងមិនមែនពន្ធគយ ដែលសហគ្រាសរបស់អ្នកស្រីផ្ទាល់បានជួបប្រទះ ពេលនាំផលិតផលចេញទៅទីផ្សារប្រទេសជិតខាង មានដូចជាប្រទេសវៀតណាម ថៃ ជាដើម។ អ្នកស្រីនិយាយបែបនេះថា៖« សមាហរ័ណកម្មអាស៊ានបើកចំហរមែនតែទៅលើអត្រាពន្ធគយតែប៉ុណ្ណោះ តែចំពោះរបាំងផ្សេងៗ ដូចជារបាំងគុណភាពគឺជារបាំងដែលពិបាកឆ្លងកាត់មែនទែន។ បើទោះបីជាផលិតផលក្រុមហ៊ុនលីលីមានគុណភាពស្តង់ដារ ISO និងស្តង់ដារជាច្រើនផ្សេងទៀតក៏ដោយ ប៉ុន្តែប្រទេសគេនៅតែទាមទារត្រួតពិនិត្យបែបបទជាច្រើនទៀត»។

សូមបញ្ជាក់ថា របាំងមិនមែនពន្ធគយ គឺជាការរឹតត្បិតការនាំទំនិញចូលក្រោមរូបភាពផ្សេងដូចជា ការរឹតត្បិតលើគុណភាព បរិមាណ ពេលវេលានាំផលិតផលចូល និង ការត្រួតពិនិត្យបែបបទផ្សេងៗទៀត។ វិធានការរឹតបន្តឹងបែបនេះ បង្ករជាឧបសគ្គដល់ពាណិជ្ជករដែលមានបំណងពង្រីកទីផ្សារទៅក្រៅប្រទេស។