កីឡាជាតិ
ជាតិ
ឡុង សុភី ត្រូវប្រកួតដណ្តើមខ្សែក្រវ៉ាត់ទាំងជិតដល់ថ្ងៃចូលរោងការ
×
អ្នកប្រដាល់ជើងខ្លាំងជំនាញប្រើជង្គង់ ឡុង សុភី នឹងត្រូវប្រកួតដណ្តើមខ្សែក្រវ៉ាត់ជាមួយជើងខ្លាំង ថៃ លើសង្វៀនអប្សរា នៅទីរួមខេត្តព្រះសីហនុ នាថ្ងៃទី៧ ខែមករា នេះ ពោលគឺជិតដល់ថ្ងៃចូលរោងការរបស់ខ្លួន។ ខណៈពីរនាក់បងប្អូន សែន រ៉ាឌី និង សែន រ៉ាដេត ក៏នឹងត្រូវជួបប្រកួតដណ្តើមខ្សែក្រវ៉ាត់ជាមួយ មីយ៉ាន់ម៉ា និងចិន ក្នុងព្រឹត្តិការណ៍នោះដែរ ចំណែកជើងខ្លាំងរបស់កម្ពុជា៥រូបទៀតត្រូវប្រឈមជាមួយជើងខ្លាំង ថៃ អ៊ីតាលី និងជប៉ុន។
ម្ចាស់ជើងឯកគ្រងខ្សែក្រវ៉ាត់៦ស្ថាប័ន ឡុង សុភី នឹងត្រូវជួបប្រកួតដណ្តើខ្សែក្រវ៉ាត់ជាមួយជើងខ្លាំងថៃ Jamlopphuphanourng ក្នុងប្រភេទទម្ងន់ ៧០គីឡូក្រាមលើសង្វៀនអប្សរា នៅទីរួមខេត្តព្រះសីហនុ នាយប់ថ្ងៃទី៧ ខែមករា។ គួរបញ្ជាក់ថា នេះជាការប្រកួតចុងក្រោយរបស់ កីឡាករ ឡុង សុភី មុនថ្ងៃចូលរោងការជាមួយ កញ្ញា ផន ស្រីនី នាថ្ងៃទី១៣ ខែមករា ខាងមុខនេះ នៅលើទឹកដីខេត្តស្វាយរៀង។
កញ្ញា ផន ស្រីនី ដែលជាគូដណ្តឹងរបស់កីឡាករ ឡុង សុភី បានបញ្ជាក់ថា ខ្លួនមិនបានជំទាស់ក្នុងការឡើងប្រកួតរបស់គូដណ្តឹងនោះទេ មិនត្រឹមតែប៉ុណ្ណោះខ្លួននឹងទៅចូលរួមគាំទ្រការប្រកួតនោះថែមទៀតផង។
ចំណែកកីឡាករជើងខ្លាំង សែន រ៉ាឌី នឹងត្រូវប្រកួតដណ្តើមខ្សែក្រវ៉ាត់ជាមួយកីឡាករជើងខ្លាំងចិន Lee Kung ក្នុងទម្ងន់៥៧គីឡូក្រាម ឬឯកីឡាករ សែន រ៉ាដេត នឹងប៉ះជើងខ្លាំង មីយ៉ាន់ម៉ា Mong Chhay Den ដើម្បីដណ្តើមខ្សែក្រវាត់ទម្ងន់៥១គីឡូក្រាម។
ក្រៅពីគូប្រកួតដណ្តើមខ្សែក្រវ៉ាត់នេះក៏មានកីឡាជើងខ្លាំងរបស់កម្ពុជាចំនួន ៥ នាក់ផ្សេងទៀតក្នុងនោះរួមមាន កីឡាករជើងខ្លាំង ឡៅ ចន្ទ្រា នឹងត្រូវជួបប្រកួតសងសឹកជាមួយកីឡាថៃ Bacjo Kietkampoune ក្នុងប្រភេទទម្ងន់៦០គីឡូក្រាម បន្ទាប់ពីខ្លួនបានចាញ់ដោយសន្លប់ក្នុងទឹកទី១ នៅលើសង្វៀនអប្សរានេះ។
ចំណែក យ៉េន ឌីណា ត្រូវប៉ះជាមួយជើងខ្លាំងមកពីជប៉ុន Hiroya ម្តងទៀតក្នុងទម្ងន់៦១គីឡូក្រាម បន្ទាប់ពីជួបគ្នាលើកទី១ ក្នុងលទ្ធផលស្មើគ្នា។ ឬឯកីឡាករវ័យក្មេង រក្ស ជ័យ ត្រូវជួបប្រកួតជាមួយកីឡាករថៃ Sak Kat ក្នុងទម្ងន់៣៩គីឡូក្រាម ខណៈកីឡាករ កំពែង ខ្មៅ ប៉ះថៃ Phut Noy ក្នុងទម្ងន់៥៣គីឡូក្រាម ចំណែក សារឿន ច័ន្ទ ប៉ះជាមួយកីឡាករ អ៊ីតាលី May Ken ក្នុងទម្ងន់៦០គីឡូក្រាម៕
© រក្សាសិទ្ធិដោយ thmeythmey.com