ជាតិ
កម្ពុជារៀបចំការប្រកួតតស៊ូមតិឆ្នើម និងវោហាស័ព្ទ នៅថ្ងៃទី២៧ ខែមីនា
× ភ្នំពេញ៖ សភាយុវពាណិជ្ជករអន្តរជាតិកម្ពុជា (Junior Chamber International Cambodia) នឹងរៀបចំវេទិកាប្រកួតប្រជែងផ្នែកតស៊ូមតិដ៏ឆ្នើម ជាលើកទី៦ និងការប្រកួតប្រជែងវោហាស័ព្ទសាធារណៈ ជាលើកទី៣ នៅថ្ងៃទី២៧ ខែមីនា ឆ្នាំ២០១៦នេះ។ បេក្ខជនទទួលបានជ័យលាភី នឹងក្លាយជាតំណាងប្រទេសកម្ពុជា ទៅចូលរួមវេទិកាប្រកួតថ្នាក់តំបន់អាស៊ីប៉ាស៊ីហ្វិក ដែលនឹងប្រព្រឹត្តទៅនៅខែមិថុនា ឆ្នាំ២០១៦ ក្នុងទីក្រុងតៃវ៉ាន់។
វេទិកាប្រកួតប្រជែងពានរង្វាន់វោហាស័ព្ទជាសាធារណៈ និងអ្នកតស៊ូមតិដ៏ឆ្នើម ប្រចាំឆ្នាំ ២០១៦នេះ នឹងប្រមូលផ្តុំសិស្ស និស្សិត និងសាធារណជនមកពីតាមគ្រឹះស្ថានសិក្សានានា ឲ្យចូលរួមការប្រកួតប្រជែងដែលមានទ្រង់ទ្រាយធំបំផុតនៅក្នុងប្រទេសកម្ពុជា។
ប្រធានសភាយុវពាណិជ្ជករអន្តរជាតិ (JCI) កម្ពុជា លោក ប៉ិច ប៉ូឡែន បានថ្លែងក្នុងសន្និសីទសារព័ត៌មានស្តីពី ការបើកវេទិការនេះ កាលពីថ្ងៃទី៩ ខែមករា នៅសាកលវិទ្យាល័យភ្នំពេញអន្តរជាតិ ថា វេទិកានេះ មានគោលបំណងប្រាប់ពិភពលោកឲ្យដឹងពីធនធានមនុស្សដែលមានទេពកោសល្យ និងសមត្ថភាពខ្លាំងៗជាច្រើន នៅក្នុងប្រទេសកម្ពុជា។
លោកលើកឡើងយ៉ាងដូច្នេះថា៖«វេទិកាប្រកួតប្រជែងពានរង្វាន់វោហាស័ព្ទជាសាធារណៈ និងអ្នកតស៊ូមតិដ៏ឆ្នើម គឺជាឱកាសដ៏ល្អមួយ សម្រាប់ឲ្យយុវជនកម្ពុជាបញ្ចេញមតិជាលក្ខណៈ វិជ្ជមាន ព្រមទាំងតស៊ូមតិជាមួយអ្នកដ៏ទៃទៀត ក្នុងប្រទេសកម្ពុជា ក៏ដូចជាក្នុងប្រទេស ផ្សេងទៀត»។ លោកបន្តថា៖«តាមរយៈកម្មវិធីនេះ យើងកំពុងតែបង្ហាញពិភពលោកនូវរូបភាពថ្មីមួយទៀតរបស់កម្ពុជា។ សង្គមកម្ពុជាទាំងមូល នឹងទទួលបានពីការចែករំលែកចំណេះ ដឹង របស់បេក្ខជនដែលចូលរួមប្រកួតផងដែរ»។
គួររម្លឹកថា កាលពីឆ្នាំ ២០១៥ កន្លងទៅនេះ កញ្ញា តារា រត្ន ជាតំណាងបេក្ខជនប្រកួតប្រជែងពានរង្វាន់វោហាស័ព្ទជាសាធារណៈកម្ពុជា និងអាស៊ីប៉ាស៊ីហ្វិក បានទទួលជ័យលាភីក្នុងការប្រកួតវោហាស័ព្ទជាសាធារណៈជាលក្ខណៈអន្តរជាតិលើបេក្ខជនមកពី ៤តំបន់ គឺ តំបន់អឺរ៉ុប អាហ្វ្រិក អាមេរិក និងអាស៊ីប៉ាស៊ីហ្វិក។ ជ័យលាភីតំណាងកម្ពុជារូបនេះ បាននាំឲ្យកម្ពុជាល្បី ឈ្មោះផ្នែកនេះបន្ថែមទៀត លើឆាកអន្តរជាតិ។ នេះជាកម្មវិធីប្រកួតប្រជែងផ្នែកតស៊ូមតិ និងវោហាស័ព្ទសាធារណៈដ៏ធំបំផុតទូទាំងពិភពលោកដែលប្រមូលផ្តុំតំណាងបេក្ខជនចូលរួម មកពី ១១៥ប្រទេស។ កម្មវិធីនេះ ត្រូវបានរៀបចំឡើងជារៀងរាល់ឆ្នាំ ក្នុងគោលបំណងធ្វើតេស្តផ្នែកស្មារតី ការរកដំណោះស្រាយ និងការគិតពិចារណាស៊ីជម្រៅ តាមប្រធានបទនីមួយៗ ។
សម្រាប់ព័ត៌មានបន្ថែម លោកអ្នកអាចទំនាក់ទំនងលោក អ៊ុង សិទ្ធិ ប្រធានគម្រោង តាមរយៈ ទូរសព្ទលេខ ០១០ ២០២ ១៣៩ និងអ៊ីម៉ែល [email protected] ៕
Tag:
យុវពាណិជ្ជករ
កម្ពុជា
© រក្សាសិទ្ធិដោយ thmeythmey.com