សមត្ថកិច្ចឃាត់ខ្លួនជនបរទេសខុសច្បាប់ ជាង៣០០នាក់ ក្នុងខែមករា

ជាតិ

សមត្ថកិច្ចឃាត់ខ្លួនជនបរទេសខុសច្បាប់ ជាង៣០០នាក់ ក្នុងខែមករា

02, Feb 2016 , 1:42 pm

រូបភាព

ដោយ: ម៉ៅ សុផា

ជនអន្តោប្រវេសន៍ខុសច្បាប់ចំនួន ៣៤៩នាក់ ត្រូវបានអាជ្ញាធរកម្ពុជាឃាត់ខ្លួននិងបណ្តេញចេញ ដោយគិតត្រឹមខែមករា ឆ្នាំ២០១៦ ។ ក្នុងចំណោមជនបរទេសទាំងនោះ ជនជាតិវៀតណាមមានចំនួនច្រើនជាងគេ ដែលមានរហូតដល់ ៣០៩នាក់។

ប្រធាននាយកដ្ឋានស៊ើបអង្កេតនិងអនុវត្តនីតិវិធី លោក អ៊ុក ហៃសីលា បានប្រាប់សារព័ត៌មានថ្មីៗនៅព្រឹកនេះថា ជនបរទេសខុសច្បាប់ចំនួន ៣៤៩នាក់ (ស្រី៩០នាក់) មានចំនួន ១៦សញ្ជាតិ ត្រូវបានសមត្ថកិច្ចអន្តោប្រវេសន៍ឃាត់ខ្លួននិងបញ្ជូនទៅស្រុកកំណើតវិញ ក្នុងខែមករា ឆ្នាំ២០១៦ នេះ។ លោកថា ក្នុងចំណោមជនអន្តោប្រវេសន៍ទាំងនោះ អន្តោប្រវេសន៍វៀតណាមមានចំនួនច្រើនជាងគេ ដែលមានរហូតដល់ ៣០៩ នាក់ (ស្រី៨៩នាក់)។

ជុំវិញបញ្ហានេះ លោក អ៊ុក ហៃសីលា បានអះអាងថា ចំពោះជនជាតិវៀតណាមដែលមករស់នៅនិងធ្វើការនៅកម្ពុជា ពួកគេភាគច្រើន ប្រកបមុខរបរជាជាងឈើ ជាងសំណង់ ជាងដែក និងជាងកែច្នៃផ្សេងៗ ហើយខ្លះទៀតក៏មានមុខរបរខ្លួនឯងដែរ ដូចជាបើកហាងលក់កាហ្វេ លក់បាយ ជាដើម។ ជាងនេះទៅទៀត ស្ត្រីជនជាតិវៀតណាមខ្លះ ក៏ធ្វើជាអ្នកម៉ាស្សា និងធ្វើការក្នុងហាងខារ៉ាអូខេផងដែរ។

ប្រធាននាយកដ្ឋានរូបនេះបន្ថែមថា ក្នុងឆ្នាំ២០១៦នេះ អគ្គនាយកដ្ឋានអន្តោប្រវេសន៍ នៅតែបន្តរឹតបន្តឹងនូវវិធានការតាមច្រកអន្តរជាតិទាំងអស់ ដើម្បីទប់ស្កាត់ការហូរចូលជនបរទេសខុសច្បាប់ ជាពិសេសជនជាតិវៀតណាម។ លោកបញ្ជាក់បែបនេះថា៖«យើងបានបន្ថែមកម្លាំងសមត្ថកិច្ច នៅគ្រប់ច្រកអន្តរជាតិ និងអនុវត្តច្បាប់ឲ្យបានម៉ត់ចត់ ដើម្បីគ្រប់គ្រងការចេញចូល របស់ជនជាតិដទៃមកកម្ពុជា ឲ្យបានត្រឹមត្រូវ»។

សូមបញ្ជាក់ថា ក្នុងឆ្នាំ២០១៥ ជនបរទេសខុសច្បាប់ចំនួន ៤៤២៤នាក់ (ស្រី៥៥៣នាក់) មានចំនួន ៤៩សញ្ជាតិ ត្រូវបានសមត្ថកិច្ចអន្តោប្រវេសន៍ឃាត់ខ្លួននិងបញ្ជូនទៅស្រុកកំណើតវិញ។ ក្នុងចំណោមជនអន្តោប្រវេសន៍ទាំងនោះ អន្តោប្រវេសន៍វៀតណាមចំនួន៣៩៧៨នាក់ (ស្រី១១៥នាក់)។ នេះបើតាមរបាយការណ៍ឆ្នាំ២០១៥ ពីអគ្គនាយកដ្ឋានអន្តោប្រវេសន៍ នៃក្រសួងមហាផ្ទៃ៕