ចូលឆ្នាំចិន៖ នៅវត្តភ្នំមានព្រះសង្ឃជាច្រើនអង្គ និមន្តបិណ្ឌបាត

ជាតិ

ចូលឆ្នាំចិន៖ នៅវត្តភ្នំមានព្រះសង្ឃជាច្រើនអង្គ និមន្តបិណ្ឌបាត

09, Feb 2016 , 11:58 am

រូបភាព

ដោយ:

ភ្នំពេញ៖ នៅថ្ងៃពិធីសែនចិន ពលរដ្ឋខ្មែរកាត់ចិន និងជនជាតិចិន បាននាំគ្នាទៅធ្វើពិធីសែនព្រេន នៅរមណីដ្ឋានវត្តភ្នំនៅ វិហារចិនឈ្មោះ«លោកតាព្រះចៅ» ឬពលរដ្ឋតែងហៅថា «វិហារខ្លាស» ដែលស្ថិតនៅខាងជើងក្បែរវិហារវត្តភ្នំ។ ដោយឡែក នៅខាងក្រោម ផ្លូវឡើងទៅលើវត្តភ្នំ មានព្រះសង្ឃជាង៥០អង្គ បាននិមន្តបិណ្ឌបាត ដោយមានពុទ្ធបរិស័ទជាខ្មែរកាត់ចិនជាច្រើន បានដាក់បច្ច័យ ផ្លែឈើ និងនំចំណីជាច្រើនទៀត។

លោក អ៊ុក ប៊ុណ្ណា ជានគរបាលប្រចាំការរៀបចំសន្តិសុខនៅរមណីដ្ឋានវត្តភ្នំ បានប្រាប់គេហទំព័រថ្មីៗ ថា ជារៀងរាល់ឆ្នាំ នៅថ្ងៃបុណ្យចូលឆ្នាំចិន ព្រះសង្ឃដែលគង់នៅវត្ត ក្នុងរាជធានីភ្នំពេញ បានមកនិមន្តបិណ្ឌបាតនៅវត្តភ្នំ។ លោកបន្តថា ការនិមន្តបិណ្ឌបាតរបស់ព្រះសង្ឃក្នុងពិធីបុណ្យចូលឆ្នាំចិន គឺមិនមានអ្វីខុសនោះទេ។ លោកបញ្ជាក់ថាយ៉ាងដូច្នេះ៖ «ចិនក៏កាន់ព្រះពុទ្ធសាសនាដែរ ដូច្នេះ ជនជាតិចិន និងខ្មែរកាត់ចិន ពួកគេមកធ្វើបុណ្យដាក់បាត ជាមួយព្រះសង្ឃ គឺជារឿងសមហេតុសមផល»។ លោកបន្តថា៖ «មិនមានការរៀបចំឲ្យព្រះសង្ឃនិមន្តបិណ្ឌបាតនៅទីនេះនោះទេ ប៉ុន្តែ ព្រះសង្ឃបាននិមន្តមកបិណ្ឌបាតដោយស្ម័គ្រចិត្ត ដើម្បីបានបច្ច័យខ្លះសម្រាប់ផ្គត់ផ្គង់ការសិក្សា»។

សូមអញ្ជើញទស្សនារូបភាពដូចខាងក្រោម៖