ជាតិ
ទស្សនីយភាពស្ដីពី «មាឃបូជា» ប្រភពរូបថត៖ ព្រះមហា ប៉ែន វិបុល
× សមាគមទ្រទ្រង់ការបោះពុម្ព និងអប់រំ កាលពីព្រឹកថ្ងៃទី២១ ខែកុម្ភៈ បានរៀបចំពិព័រណ៌ផ្ទាំងទស្សនីយភាពស្ដីពីអត្ថន័យនៃពិធីបុណ្យមាឃបូជា ក្រោមព្រះធិបតីភាពសម្ដេចព្រះមហាសុមេធាធិបតី នន្ទ ង៉ែត សម្ដេចព្រះសង្ឃនាយកនៃព្រះរាជាណាចក្រកម្ពុជា លោក មិន ឃិន រដ្ឋមន្ត្រីក្រសួងធម្មការ និងសាសនា នៅវិទ្យាស្ថានជាតិអប់រំរាជធានីភ្នំពេញ។
បើតាមការផ្សាយរបស់គេហទំព័រផ្លូវការក្រសួងធម្មការ សម្ដេចសង្ឃ នន្ទ ង៉ែត មានព្រះរាជបន្ទូលថា ការរៀបចំសម្ដែង និងពិព័រណ៍បង្ហាញស្ដីពីមាឃបូជានេះ គឺពិតពាក្យប្រៀនប្រដៅរបស់ព្រះពុទ្ធ មិនគាំទ្រភាពល្ងង់ខ្លៅ ភាពទន់ខ្សោយ សេចក្ដីភ័យខ្លាច និងចំណង់ឥតឆ្អែតនោះទេ ប៉ុន្តែពាក្យប្រៀនប្រដៅទាំងនេះ សំដៅធ្វើឲ្យមនុស្សមានពុទ្ធិយល់ដឹងត្រឹមត្រូវដោយបន្សាត់បង់ និងបំផ្លាញចោលនូវអកុសលធម៌។
លោក មិន ឃិន រដ្ឋមន្ត្រីក្រសួងធម្មការ និងសាសនា មានប្រសាសន៍កោតសរសើរដល់ព្រះលិខិតបញ្ញា ប៉ែន វិបុល នាយកប្រតិបត្តិសមាគមទ្រទ្រង់ការបោះពុម្ព និងអប់រំដែលបានលើកយកផ្ទាំងទស្សនីយភាពនេះឡើង ដើម្បីរំឭកដល់ថ្ងៃជាមហាមង្គលទាំងពីរនៃព្រះសម្មាសម្ពុទ្ធបរមគ្រូនៃយើងដែលប្រកាស ដាក់ជន្មាយុសង្ខារផង និងថ្ងៃប្រជុំចតុរង្គសន្និបាតនៃព្រះអរហន្តទាំង១២៥០អង្គផង ក៏ដូចជាការលើកស្ទួយវិស័យព្រះពុទ្ធសាសនា ដែលជាសាសនារបស់រដ្ឋឲ្យបានគង់វង្ស និងស្ថិតស្ថេរចីរកាលតរៀងទៅ។
ព្រះលិខិតបញ្ញា ប៉ែន វិបុល នាយកប្រតិបត្តិនៃសមាគមទ្រទ្រង់ការបោះពុម្ព និងអប់រំមានថេរដីកាថាផ្ទាំងទស្សនីយភាពជាច្រើនផ្ទាំងស្ដីពីអត្ថន័យនៃពិធីបុណ្យមាឃបូជា ដែលជាបុណ្យដ៏ពិសិដ្ឋរបស់ព្រះពុទ្ធសាសនាសម្រាប់ពុទ្ធសាសនិកទូទាំងពិភពលោក ជាពិសេសគឺពុទ្ធសាសនិកខ្មែរយើងនេះតែម្ដង។
ព្រះអង្គបានបន្ថែមថា ក្នុងនាមជាប្រជាពុទ្ធបរិស័ទគប្បីត្រូវចងចាំនូវឱវាទបីយ៉ាងដែលព្រះអង្គទ្រង់បានទូន្មានដល់ពុទ្ធសាសនិកគ្រប់រូបគឺ ការមិនធ្វើនូវអំពើបាបទាំងពួង ការបំពេញនូវអំពើដែលជាអកុសលទាំងពួង និងការធ្វើចិត្តរបស់ខ្លួនឲ្យល្អស្អាតផូរផង់៕
វីដេអូ៖
© រក្សាសិទ្ធិដោយ thmeythmey.com