ជាតិ
និស្សិតនារីព្រួយបារម្ភពីសុវត្ថិភាពរស់នៅក្នុងរាជធានីភ្នំពេញ
× ភ្នំពេញ៖ និស្សិតនារីកំពុងបន្តការសិក្សានៅថ្នាក់ឧត្តមសិក្សា បារម្ភខ្លាំងពីបញ្ហាសន្តិសុខសុវត្ថិភាពរស់នៅក្នុងរាជធានីភ្នំពេញ ដូចជា អំពើលួច ឆក់ ប្លន់ និងគ្រឿងញៀនជាដើម។ និស្សិតនារីមួយចំនួន បានជួបប្រទះនឹងបញ្ហានេះផ្ទាល់ ហើយពួកគេអំពាវនាវអាជ្ញាធរ រឹតបន្តឹងបញ្ហាសន្តិសុខសង្គម ដើម្បីពួកគេរស់នៅបានដោយគ្មានការភ័យខ្លាច។
នារីខ្មែរបច្ចុប្បន្នបានខំប្រឹងបន្តការសិក្សានៅភ្នំពេញ ដោយចាកចេញឆ្ងាយពីផ្ទះ ដើម្បីពង្រឹងសមត្ថភាពខ្លួនឯងដូចបុរសដែរ។ ប៉ុន្តែការរស់នៅក្នុងរាជធានីភ្នំពេញ មិនទាន់មានសុវត្ថិភាពពេញលេញសម្រាប់ពួកគេឡើយ។
កញ្ញា សេន ម៉ាលីណា និស្សិតឆ្នាំទី២ ជំនាញអក្សរសាស្ត្រអង់គ្លេស នៃវិទ្យាស្ថានភាសាបរទេស (IFL) បាននិយាយព្រួយបារម្ភពីសុវត្ថិភាពផ្ទាល់ខ្លួន អំឡុងពេលកញ្ញាកំពុងស្នាក់នៅក្នុងបន្ទប់ជួល ជាមួយមត្តិភក្តិចំនួន ៣នាក់។
និស្សិតនារីវ័យ ២០ឆ្នាំរូបនេះ សម្បុរស្រអែមនិយាយទាំងទឹកមុខមាំយ៉ាងដូច្នេះថា៖«ខ្ញុំរស់នៅក្នុងរាជធានីភ្នំពេញ បច្ចុប្បន្ន ខ្ញុំភ័យខ្លាចពីបញ្ហាសន្តិសុខ ព្រោះមិត្តភក្តិខ្ញុំធ្លាប់ចោរលួចគាស់បន្ទប់»។ យ៉ាងណា និស្សិតនារីរូបនេះ ប្តេជ្ញាថា នាងនឹងប្រឹងប្រែងសិក្សារៀនសូត្រ យកចំណេះវិជ្ជា ដើម្បីជួយដោះស្រាយបញ្ហាសង្គមនេះ។ នោះក៏ព្រោះថា នារីអាចយល់ពីទុក្ខលំបាករបស់នារីផ្ទាល់។
ងាកមកមិត្តភក្តិរបស់កញ្ញា សេន ម៉ាលីណា កញ្ញា ពិន ស៊ីណែត និស្សិតឆ្នាំទី២ ជំនាញ គ្រប់គ្រងធុរកិច្ច នៃសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និយាយថា នាងបានបាត់កុំព្យូរទ័រ Laptop មួយ កាលពីសប្តាហ៍មុន ដោយសារចោរបានចូលលួចគាស់ បន្ទប់របស់នាង នៅពេលនាងចាក់សោរបន្ទប់ចោលរួច មកសិក្សានៅសាលា។ នារីវ័យ ១៩ឆ្នាំ បានត្រឹមសោកស្តាយ ក្រោយពីកុំព្យូរទ័រ Laptop ដែលប្រើប្រាស់សម្រាប់ការសិក្សារៀនសូត្រ តម្លៃជាង ៥០០ដុល្លារអាមេរិក ត្រូវបានចោរលួចបាត់។ នារីកូនអាជីវករមកពីខេត្តបន្ទាយមានជ័យនិយាយទម្លាក់ទឹកមុខថា៖«ខ្ញុំស្តាយកុំព្យូរទ័រ Laptopនោះណាស់ ព្រោះវាកាដូររបស់លោកពូខ្ញុំ»។ កញ្ញា សេន ម៉ាលីណា និងកញ្ញា ពិន ស៊ីណែត កំពុងឈរ មើលបញ្ជីលទ្ធផលឈ្មោះប្រឡង នៅវិទ្យាស្ថានភាសាបរទេស បានប្តេជ្ញាថា ពួកគេនឹង បន្តខិតខំប្រឹងប្រែងរៀនសូត្រ យកចំណេះ ដើម្បីដោះស្រាយបញ្ហាទាំងនេះ។
យ៉ាងណា អ្នកទាំងពីរក៏ពឹងលើសមត្ថកិច្ចផងដែរ។ នាងអំពាវនាវសមត្ថកិច្ចឲ្យជួយការពារសុវត្ថិភាពនារីបន្ថែមទៀត ដើម្បីពួកគេមានសេចក្តីសុខក្នុងចិត្តពេញលេញ។
មិនខុសពីយុវនារីខាងលើ កញ្ញា សំរ៉ឺត ដាលី និស្សិតឆ្នាំទី២ ជំនាញទន្តវតនសាស្ត្រនៃសាកលវិទ្យាល័យវិទ្យាសាស្ត្រសុខាភិបាល ក៏មានក្តីបារម្ភពីសន្តិសុខរស់នៅក្នុងរាជធានីភ្នំពេញផង ដែរ បើទោះបីជានាងមិនធ្លាប់ជួបប្រទះបញ្ហាក្តី។ នារីវ័យ ២១ឆ្នាំ កំពុងអង្គុយអានសៀវភៅនៅសាកលវិទ្យាល័យភូមិន្ទភ្នំពេញ និយាយថា ប្រសិនបើនាងពុំមានបងប្រុសសិក្សានៅរាជធានីភ្នំពេញទេនោះ នាងនឹងពុំអាចចេញពីស្រុកកំណើតនៅខេត្តបន្ទាយមានជ័យ មកភ្នំពេញ ដើម្បីសិក្សារៀនសូត្រដែរ។ កញ្ញានិយាយថា កញ្ញាមានក្តីបារម្ភពីសុវត្ថិភាព ព្រោះ កញ្ញាឮសកម្មភាពលួច ឆក់ ប្លន់ គ្រោះថ្នាក់ចរាចរណ៍ច្រើន នៅរាជធានីភ្នំពេញ។
យ៉ាងណា នាងមានភាពកក់ក្តៅមួយ នៅពេលនាងមានបងប្រុសបង្កើត និងបងប្អូនជីដូនមួយ ជាទីពំនាក់អាស្រ័យពេលមានបញ្ហា។ នារីសម្បុរស មាឌស្តើង និយាយយ៉ាងដូច្នេះថា៖«ខ្ញុំភ័យ ខ្លាចអំពីគ្រោះថ្នាក់ចរាចរណ៍។ ពេលខ្ញុំចេញពីសាលារៀននៅពេលយប់។ ព្រោះភ្នំពេញមានមនុស្សច្រើនកុះករ ចរាចរណ៍មមាញឹក ខុសពីស្រុកកំណើតខ្ញុំ»។
ទោះបីជាប្រទេសកម្ពុជាបានឆ្លងផុតពីភ្លើងសង្គ្រាមស៊ីវិលជាង ២០ឆ្នាំក៏ដោយ ក៏ប្រទេសដែលកំពុងអភិវឌ្ឍមួយនេះ ពុំទាន់មានសន្តិសុខសង្គមមួយពេញលេញនៅឡើយ៕
© រក្សាសិទ្ធិដោយ thmeythmey.com