អន្តរជាតិ
នយោបាយអន្តរជាតិ
ការព្យាយាមធ្វើឲ្យមានភាពស្មុគស្មាញនៅសមុទ្រចិនខាងត្បូង នឹងត្រូវបរាជ័យ
× សារព័ត៌មាន People’s Daily បានចុះផ្សាយអត្ថបទវិចារណកថាមួយដែលមានចំណងជើងថា «ការព្យាយាមធ្វើឲ្យមានភាពស្មុគស្មាញនៅសមុទ្រចិនខាងត្បូង នឹងត្រូវបរាជ័យ» នៅថ្ងៃទី១០ ខែមីនា។ អត្ថបទនោះ បានបញ្ជាក់ជាថ្មីពីគោលជំហររបស់ចិនដែលបានលើកឡើងដោយរដ្ឋមន្ត្រីការបរទេសចិនលោក វ៉ាង យី លើសមុទ្រចិនខាងត្បូង និងរិះគន់ពីចេតនារបស់អាមេរិកក្នុងការធ្វើយោធូបនីយកម្ម។
នាកិច្ចប្រជុំកំពូលប្រចាំឆ្នាំនៃសភាចិនទាំងពីរ ប្រព័ន្ធផ្សព្វផ្សាយជាច្រើន បានផ្តោតសំខាន់លើបញ្ហាសមុទ្រចិនខាងត្បូង។ ហើយមានអ្នកខ្លះ បានលម្អៀង និងបំផ្លើសពីជំហររបស់ចិនទាំងសកម្មភាពចិន ធ្វើឡើងក្នុងអធិបតេយ្យរបស់ខ្លួនសោះ។ ជាមួយគ្នានោះដែរ ក៏មានអ្នកខ្លះ មិនបានបញ្ជាក់ឲ្យមានការយល់ដឹងពីមជ្ឈត្តការនោះទេ តែបែរជាធ្វើឲ្យកាន់តែមានការយល់ច្រលំ។ ការឆ្លើយតបរបស់ចិន គឺ មានហេតុផល និងស្របតាមច្បាប់អន្តរជាតិ ហើយចិន ក៏មិនមែនជាប្រទេសទីមួយៗនោះទេដែលបានពង្រាយសព្វាវុធនៅ កោះ Nansha ហើយក៏មិនមែនជាប្រទេសដែលបានប្រតិបត្តិការសកម្មភាពយោធាផ្សេងៗនៅក្នុងតំបន់នោះដែរ។ ចិន មិនគួរត្រូវបានចោទប្រកាន់ថាធ្វើយោធូបនីយកម្មឡើយ។ ការចោទប្រកាន់នេះ គឺស័ក្តិសមជាមួយនឹងប្រទេសដទៃទៀតវិញ។
វាមិនមានអ្វីដែលពិបាកនោះទេដើម្បីយល់ពីការពិត។ ចិន កំពុងតែបំពាក់នូវសម្ភារការពារចាំបាច់មួយ ចំនួននៅលើកោះ និងថ្មប៉ប្រះទឹករបស់ខ្លួន ដោយយោងទៅតាមច្បាប់អន្តរជាតិ។ បន្ថែមពីនេះ ចិន ក៏បាននិងកំពុងសាងសង់នូវសំណង់ស៊ីវិលមួយចំនួនដើម្បីផ្តល់សេវាសាធារណៈទៅកាន់សហគមន៍អន្តរ ជាតិ។ សិទ្ធិសេរីភាពនៃការធ្វើនាវាចរ នៅក្នុងសមុទ្រចិនខាងត្បូង នឹងមិនត្រូវបានគំរាមកំហែងនោះទេ។ ក្នុងករណីដែលលើកឡើងដោយរដ្ឋាភិបាលហ្វីលីពីន ចិនត្រៀមខ្លួនរួចរាល់ហើយក្នុងការចេញសេចក្តីថ្លែងការណ៍ផ្លូវការដោយយោងតាមបទបញ្ញត្តិច្បាប់អន្តរជាតិដើម្បីការពារគោលជំហរខ្លួន ដោយមិនរាប់បញ្ចូលនូវមជ្ឈត្តការ។ ការបន្តបញ្ចេញឥរិយាបថផ្ទុយច្បាប់ មិនស្មោះត្រង់ និងគ្មានហេតុផលរបស់ហ្វីលីពីន នឹងមិនផ្លាស់ប្តូរទិសដៅ និងការមើលឃើញរបស់សហគមន៍អន្តរជាតិ ថាសកម្មភាពហ្វីលីពីន គឺមានផលប្រយោជន៍នយោបាយនៅពីក្រោយខ្នង។
ចិន នឹងបន្តរក្សានូវកិត្យានុភាពនៃអធិបតេយ្យ និងបួរណភាពដែនដីរបស់ខ្លួន ដោយការតាំងចិត្តដ៏មុត មាំ។ ចិន គ្រាន់តែចង់ការពារអធិបតេយ្យ និងមិនធ្វើសកម្មភាពទាមទារណាថ្មីដែលមិនមែនជាកម្មសិទ្ធិរបស់ចិននោះឡើយ។ គោលនយោបាយរបស់ចិនដើម្បីការពារអធិបតេយ្យ មិនមានអ្វីត្រូវលាក់បាំងឡើយ ហើយបើមានអ្នកណាហ៊ានប្រជែងចិនពាក់ព័ន្ធបញ្ហានេះ នឹងត្រូវបរាជ័យជាក់ជាពុំខាន។ ជាមួយគ្នានោះ ចិនមានឆន្ទៈ ក្នុងការដោះស្រាយជម្លោះជាមួយនឹងប្រទេសជិតខាងរបស់ខ្លួនដោយសន្តិវិធីតាមរយៈការសន្ទនា និងការចរចា ហើយរក្សានូវសន្តិភាព និងស្ថិរភាពនៅក្នុងតំបន់ផងដែរ។ គោលជំហរចិន បានបង្ហាញពីការគោរព និងឧត្តមគតិក្នុងការដោះស្រាយបញ្ហា។ ជាមួយគ្នានេះ អតីតនាយករដ្ឋមន្ត្រី ម៉ាឡេស៊ី លោក មហាធៀ មហាម៉ាត់ ថ្មីៗនេះ ក៏បានបញ្ជាក់ដែរថា៖ «យើងមិនជឿលើសង្គ្រាមនោះទេ, យើងនៅតែជឿជាក់ថាដំណោះស្រាយតាមរយៈការចរចាបែបសន្តិវិធី គឺជាមធ្យោបាយដ៏ល្អប្រសើរដើម្បីដោះស្រាយបញ្ហា»។
ថ្មីៗនេះ មានអ្នកនយោបាយនិងអ្នកជំនាញអាមេរិកមួយចំនួន បានចោទចិន ថាកំពុងធ្វើយោធូបនីយកម្មនៃសមុទ្រចិនខាងត្បូង និងព្យាយាមបកស្រាយថាចិន ជាប្រទេសវាតទីនិយមទៀតផង។ តែថ្មីៗនេះ អាមេរិក បានបញ្ជូននាវាចម្បាំង និងយន្តហោះយោធាទំនើបៗ មកកាន់តំបន់ជម្លោះម្តងហើយម្តងទៀត ក្នុងគោលបំណងបំផ្លាញស្ថិរភាព និងចលាចល។ កាលពីថ្ងៃទី០៨ ខែមីនាកន្លងទៅកាសែត New York Times បានចុះផ្សាយពីបទអធិប្បាយ ថាយន្តហោះ និងនាវាចម្បាំងរបស់អាមេរិកដែលបានមកដល់ សមុទ្រចិនខាងត្បូងកាលពីសបា្តហ៍មុន គឺគ្រាន់តែជាលំហាត់យោធាធម្មតាតែប៉ុណ្ណោះ។
សមុទ្រចិនខាងត្បូង មិនមែនជាបញ្ហារវាងចិន និងអាមេរិកនោះទេ។ ហើយហេតុផលដែលអាមេរិកបន្ត លូកដៃក្នុងបញ្ហាសមុទ្រចិនខាងត្បូង គឺដោយសារ អាមេរិក នៅតែមានមន្ទិលលើការអភិវឌ្ឍរបស់ចិន ពោលគឺ មានការព្រួយបារម្ភពីការជំនួសតួនាទីខ្លួនដោយចិននៅថ្ងៃណាមួយ។ អ្នកស្រាវជ្រាវមួយចំនួន បានបង្ហាញថាសមុទ្រចិនខាងត្បូង មិនមែនជាហេតុផល ប៉ុន្តែលទ្ធផលនៃការប្រកួតប្រជែងរវាងអាមេរិក និងចិន។ ដោយចាត់ទុកចិនជា «កញ្ច្រោង» អាមេរិក បានព្យាយាមជំរុញអាស៊ានឲ្យគាំទ្រយុទ្ធសាស្ត្រ នយោបាយ និងយោធារបស់ខ្លួន។ តែច្បាស់ណាស់ វាមិនអាចទៅរួចនោះទេ។ លោកនាយករដ្ឋមន្ត្រី សិង្ហបុរី លី សៀន ឡុង ក៏បានលើកឡើងដែលថាប្រទេសនៅក្នុងតំបន់ចង់បញ្ចៀសនូវការជ្រើសរើស ការគាំទ្រឬប្រឆាំងប្រទេសមហាអំណាច។ ការប្រកួតប្រជែងបច្ចុប្បន្ន គឺមិនដូចទៅនឹងការប្រកួតប្រជែងមនោគមន៍វិជ្ជាអំឡុងសម័យសង្គ្រាមត្រជាក់ ហើយវាក៏មិនមែនជាល្បែងឈ្នះចាញ់ផងដែរ។
ចិន កំពុងប្រឹងប្រែង បង្កើតសន្តិភាព និងស្ថិរភាពនៅតំបន់សមុទ្រចិនខាងត្បូង។តាមការធ្វើការជាមួយ អាស៊ាន ចិនមានទំនុកចិត្ត និងការលើកទឹកចិត្តក្នុងការធានាឲ្យបាននូវសន្តិភាព និងការអភិវឌ្ឍនៅក្នុងតំបន់។ ប្រសិនបើនរណាម្នាក់ ព្យាយាមបង្កើតឲ្យមានភាពចម្រូងចម្រាសនៅក្នុង សមុទ្រចិនខាងត្បូង ចិននឹងមិនឯកភាពនោះទេ ហើយប្រទេសភាគច្រើននៅក្នុងតំបន់ក៏មិនគាំទ្រឲ្យ បញ្ហានេះកើតឡើងដែរ៕
.
Tag:
សមុទ្រចិនខាងត្បូង
ចិន
អាមេរិក
© រក្សាសិទ្ធិដោយ thmeythmey.com