អន្តរជាតិ
នយោបាយអន្តរជាតិ
សហភាពអឺរ៉ុប និងគុយបា ផ្សារភ្ជាប់ទំនងទំនងឡើងវិញក្នុងប្រវត្តិសាស្ត្រជាង១ទសវត្សរ៍
×
ការចរចារយៈពេលពីរឆ្នាំរវាងមន្ត្រីជាន់ខ្ពស់សហភាពអឺរ៉ុបជាមួយនឹងមន្ត្រីជាន់ខ្ពស់គុយបា បានចេញលទ្ធផលផ្លៃផ្កាជាបណ្តើរៗហើយ។ ភាគីទាំងពីរ បានសម្រេចចុះកិច្ចព្រមព្រៀងដំណើរការទំនាក់ទំនង ឡើងវិញ ក្រោយពីបានកាត់ផ្តាច់អស់រយៈជាងមួយទសវត្សរ៍ហើយនោះ។
សហភាពអឺរ៉ុប និងគុយបា បានចុះហត្ថលេខាលើកិច្ចព្រមព្រៀងកាលពីថ្ងៃទី១១ ខែមីនា ម្សិលមិញក្នុងការដំណើរការឡើងវិញនូវទំនាក់ទំនងរវាងភាគីទាំងពីរ ក្រោយពីបានកាត់ផ្តាច់ជាឯកតោភាគីដោយសហភាពអឺរ៉ុបរយៈពេល១៣ឆ្នាំហើយនោះ។ កិច្ចព្រមព្រៀងនេះ ធ្វើឡើងក្នុងដំណើរទស្សនកិច្ចរបស់ប្រធានគោលនយោយបរទេសសហភាពអឺរ៉ុបលោកស្រី Federica Mogherini ទៅកាន់ក្រុង ហាវាណា នៃប្រទេសគុយបា។
ក្នុងឱកាសនៃកម្មវិធីចុះហត្ថលេខាលើកិច្ចព្រមព្រៀងនោះ លោកស្រី Mogherini បានថ្លែងថា នេះគឺជា កិច្ចព្រមព្រៀងប្រវត្តិសាស្ត្រមួយរវាងសហភាពអឺរ៉ុប និងគុយបា។ លោកស្រី បានទទូចឲ្យសហរដ្ឋអាមេរិក ដកចេញការហុំព័ទ្ធសេដ្ឋកិច្ចរបស់អាមេរិកទៅលើគុយបាផងដែរ។
កិច្ចព្រមព្រៀងដំណើរការទំនាក់ទំនងឡើងវិញនេះ នឹងផ្តល់ឱកាសសម្រាប់កិច្ចសហប្រតិបត្តិការសេដ្ឋ កិច្ច និងជំនួយទៅកាន់គុយបាផងដែរ។ ក៏ប៉ុន្តែ កិច្ចព្រមព្រៀងនេះ មិនទាន់មានអនុភាពដើម្បីអនុវត្តនៅឡើយនោះទេ ពោលគឺត្រូវរង់ចាំការផ្តល់សច្ចាប័នពីប្រទេសសហភាពអឺរ៉ុប និងសភាគុយបាជាមុនសិន។
យ៉ាងណាក៏ដោយលោកស្រី Mogherini បានអះអាងថា លោកស្រី នឹងបញ្ចុះបញ្ចូលក្រុមប្រឹក្សាអឺរ៉ុប ដើម្បីបញ្ចប់គោលនយោបាយ២០ឆ្នាំ ដែលជាគោលនយោបាយរួមរបស់សហភាពអឺរ៉ុបដែលធ្វើឡើង ដើម្បីរឹតត្បិតចំណងមិត្តភាពរវាងសហភាពអឺរ៉ុប និងគុយបា។
សួមរម្លឹកផងដែរ សហភាពអឺរ៉ុប បានដាក់ទណ្ឌកម្មទៅគុយបា តាមរយៈការព្យួរទំនាក់ទំនងវាងភាគីទាំងពីរតាំងពី២០០៣មកម្ល៉េះ ដែលពេលនោះ រដ្ឋាភិបាលគុយបា បានបង្ក្រាបទៅលើក្រុមអ្នកកាសែត និងក្រុមសកម្មជន ដែលបានបំពាននឹងសិទ្ធិមនុស្សយ៉ាងធ្ងន់ធ្ងរ។ តែកន្លងមក រដ្ឋាភិបាលគុយបា បានចាត់ទុកការដាក់ទណ្ឌកម្មរបស់សហភាពអឺរ៉ុប គឺជាការជ្រៀតជ្រែកកិច្ចការផ្ទៃក្នុង។
អ្វីគួរកត់សម្គាល់ កិច្ចព្រមព្រៀងរវាងសហភាពអឹរ៉ុប និងគុយបា ធ្វើឡើងស្របនឹងគម្រោងនៃដំណើរ ទស្សនកិច្ចរបស់ប្រធានាធិបតីអាមេរិកលោក បារ៉ាក់ អូបាម៉ាទៅកាន់គុយបាផងដែរ។ នៅថ្ងៃទី២១-២២ ខែមីនា ខាងមុខនេះ លោកអូបាម៉ា នឹងធ្វើទស្សនកិច្ចទៅកាន់គុយជាលើកដំបូងក្នុងប្រវត្តិសាស្ត្រប្រធានាធិបតីអាមេរិកចាប់ពីឆ្នាំ១៩២៨៕
© រក្សាសិទ្ធិដោយ thmeythmey.com