ជាតិ
សេដ្ឋកិច្ច
សម្ពោធសមាគមន៍ពាណិជ្ជកម្មកម្ពុជា-ជប៉ុន ដើម្បីឲ្យពាណិជ្ជករប្រទេសទាំង២រៀនសូត្រពីគ្នា
× ភ្នំពេញ៖ សមាគមពាណិជ្ជកម្ម និងវិនិយោគកម្ពុជា-ជប៉ុន (CJBI) ត្រូវបានសម្ពោធ នៅថ្ងៃទី២៩ខែមីនានេះ ដើម្បីផ្តល់វេទិកាជួបជុំផ្លាស់ប្តូរបទពិសោធន៍រវាងអ្នកវិនិយោគខ្មែរ និងជប៉ុនដែលមកបណ្តាក់ទុនរកស៊ីនៅកម្ពុជា។ សមាគមន៍នេះ មានទីតាំងស្ថិតក្នុងមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ។
ពាណិជ្ជករខ្មែរ និងជប៉ុន នឹងមានឱកាសចែករំលែកបទពិសោធន៍ជាមួយគ្នា តាមរយៈសមាគមន៍ពាណិជ្ចកម្ម និងវិនិយោគកម្ពុជា-ជប៉ុន (CJBI) ។ លោក កឹម អឿន នាយក CJBI មានប្រសាសន៍ថា CJBI បង្កើតឡើង ដើម្បីផ្តល់ឱកាសដល់ពាណិជ្ជករនៃប្រទេសទាំងពីរ បានរៀនសូត្រពីបទពិសោធន៍ធ្វើជំនួញទៅវិញទៅមក និងឲ្យមានការសហការល្អក្នុងភាពជាដៃគូ។ លោកបន្តថា អ្នកជំនួញខ្មែរ ចង់បានបទពិសោធន៍ពីពាណិជ្ជករជប៉ុន ព្រោះក្រុមហ៊ុនជប៉ុនជាច្រើនកំពុងជោគជ័យ ដែលអាចដំណើរការអាជីវកម្មរបស់ខ្លួនអស់ជាច្រើនរយឆ្នាំ។ ហើយខាងជប៉ុន ក៏ចង់ដឹងពីរបៀបធ្វើការងារ និងជំនួញរបស់ពលរដ្ឋខ្មែរផងដែរ។
ប្រធាន CJBI រូបនេះ បន្តលើកឡើងពីភាពសុចរិត និងការទទួលខុសផ្នែកសង្គមក្នុងអាជីវកម្ម ដែលជាចំណុចខ្លាំង និងភាពរឹងមាំរបស់ក្រុមហ៊ុនជប៉ុន ហើយដែលលោក កឹម អឿន ចង់ឃើញពាណិជ្ជករខ្មែរយកគំរូតាម។
លោក អ៊ិន ចាន់នី ប្រធាននាយកប្រតិបត្តិធនាគារអេស៊ីលីដា ហើយដែលត្រូវបានជ្រើសរើសជាប្រធានក្រុមប្រឹក្សាភិបាល CJBI រំពឹងថា ការបង្កើតសមាគមន៍ នេះឡើងនឹងជំរុញបន្ថែមទៀតនូវពាណិជ្ជករជប៉ុនឲ្យមករកស៊ីនៅកម្ពុជា។
គួរបញ្ជាក់ថា មកទល់បច្ចុប្បន្ននេះ មានក្រុមហ៊ុនជប៉ុនមកបណ្តាក់ទុននៅប្រទេសកម្ពុជាប្រមាណ ២៥០ ក្រុមហ៊ុន ដែលប្រតិបត្តិការលើផ្នែកឧស្សាហកម្ម ការចែកចាយទំនិញ ទេសចរណ៍ និងភោជនីដ្ឋាន ជាដើម៕
Tag:
សេដ្ឋកិច្ច
សមាគមន៍ពាណិជ្ជកម្មកម្ពុជា-ជប៉ុន
© រក្សាសិទ្ធិដោយ thmeythmey.com