អន្តរជាតិ
ប្រធានសភាអឺរ៉ុប ប្រាប់សមាជិកត្រៀមខ្លួនទទួលលទ្ធផលប្រជាមតិអង់គ្លេស
× នៅសល់រយៈពេលជិតមួយខែទៀតប៉ុណ្ណោះ ការធ្វើប្រជាមតិដើម្បីកំណត់ថា ចក្រភពអង់គ្លេសនឹងបន្តជាសមាជិកអឺរ៉ុប ឬយ៉ាងណានោះ នឹងមកដល់នៅថ្ងៃទី២៣ ខែមិថុនា។ ខណៈនេះ បន្ទាប់ពីជំនួបជាមួយនាយករដ្ឋមន្ត្រីហុងគ្រី ប្រធានសភាអឺរ៉ុប លោក Martin Schulz បានប្រាប់ឲ្យអឺរ៉ុបទាំងមូល ត្រៀមខ្លួនប្រឈមមុខនឹងអ្វីដែលអាចកើតឡើង បើទោះជា លទ្ធផលចេញមកបែបណាក៏ដោយ។
ក្នុងដំណើរទៅកាន់ស្លូវ៉ាគី ប្រធានសភាអឺរ៉ុប លោក Martin Schulz នៅថ្ងៃទី២៦ ខែឧសភា បានប្រកាសឲ្យតំបន់អឺរ៉ុប រៀបចំខ្លួនសម្រាប់លទ្ធផលដែលចេញពីការធ្វើប្រជាមតិរបស់ចក្រភពអង់គ្លេស។ ប្រជាមតិថ្ងៃទី២៣ ខែមិថុនា នឹងកំណត់ពីអនាគតសមាជិកភាពរបស់ចក្រភពអង់គ្លេស នៅសហភាពអឺរ៉ុប ហើយវាច្បាស់ណាស់ថា អឺរ៉ុបមិនចង់ឲ្យអង់គ្លេសចាកចេញនោះទេ ដ្បិតវានឹងប៉ះពាល់ខ្លាំងដល់អង្គការតំបន់មួយនេះ។
នៅក្នុងទីក្រុងប្រាទីស្លាវ៉ា ទាំងប្រធានសភាអឺរ៉ុប ទាំងនាយករដ្ឋមន្ត្រីស្លូវ៉ាគី សុទ្ធតែអះអាងថា អឺរ៉ុបទាំងមូល ត្រូវតែប្រុងប្រៀបឆ្លើយតបនឹងលទ្ធផលនៃការធ្វើប្រជាមតិនៅអង់គ្លេស ថ្ងៃទី២៣ ខែមិថុនា។ ថ្លែងបន្ទាប់ពីជំនួបជាមួយនាយករដ្ឋមន្ត្រីស្លូវ៉ាគី លោក Robert Fico លោក Schulz និយាយថា បើទោះជាលទ្ធផលបែបណាក៏ដោយ យើងត្រូវរៀបចំខ្លួនឲ្យស្រេចបាច់ ដើម្បីដោះស្រាយបញ្ហានេះ។
នាយករដ្ឋមន្ត្រីស្លូវ៉ាគី ដែលនឹងធ្វើជាប្រធានក្រុមប្រឹក្សាអឺរ៉ុបនៅថ្ងៃទី១ ខែកក្កដា ក៏បង្ហាញជំហរក្នុងការដោះស្រាយបញ្ហានេះ។ លោកនាយករដ្ឋមន្ត្រី Fico សន្យាថា ស្លូវ៉ាគី នឹងប្រើតួនាទីរបស់ខ្លួនប្រកបដោយការទទួលខុសត្រូវ ព្រមទាំងសង្កត់ធ្ងន់ដែរថា ក្នុងអំឡុងពេលនេះ លោកធានាថា ស្លូវ៉ាគីនឹងត្រៀមខ្លួនឲ្យរួចរាល់។
ជាមួយនឹងការប្រកាសត្រៀមខ្លួនបែបនេះ លោក Fico ក៏បានបញ្ជាក់ពីបញ្ហាផ្សេងទៀតដែលនឹងកើតឡើង។ លោកបន្ថែមថា ចក្រភពអង់គ្លេសនឹងធ្វើប្រជាមតិនៅថ្ងៃទី២៣ ខែមិថុនា ហើយមួយសប្ដាហ៍បន្ទាប់មក នឹងមានការបោះឆ្នោតទូទៅដ៏សំខាន់មួយនៅអេស្ប៉ាញ។ លើសពីនេះ នាយករដ្ឋមន្ត្រីរូបនេះ ក៏ព្រួយបារម្ភវិបត្តិសេដ្ឋកិច្ចរបស់ក្រិក ក៏ដូចជាលំហូរជនភៀសខ្លួនផងដែរ។
១. G7 និយាយថា ការចាកចេញរបស់អង់គ្លេស ជារឿងគ្រោះថ្នាក់ដល់សេដ្ឋកិច្ចសកល
ការចាកចេញរបស់អង់គ្លេស ក៏ជាប្រធានបទសំខាន់មួយក្នុងចំណោមប្រធានបទសំខាន់នានា របស់កិច្ចប្រជុំប្រទេសមានសេដ្ឋកិច្ចជឿនលឿនទាំង៧ (G7) ដែលធ្វើនៅជប៉ុន។ ក្នុងសេចក្ដីថ្លែងការណ៍របស់ខ្លួន កិច្ចប្រជុំនេះព្រមានថា ការចាកចេញរបស់ចក្រភពអង់គ្លេស នឹងប៉ះពាល់ដល់និន្នាការសេដ្ឋកិច្ចពិភពលោក ដែលកំពុងមានកំណើន។
ការព្រមានពីការចាកចេញរបស់អង់គ្លេស ពីសំណាក់ក្រុមប្រទេសជឿនលឿនទាំង៧ រួមមានជប៉ុន អាមេរិក អាល្លឺម៉ង់ អ៊ីតាលី ចក្រភពអង់គ្លេស បារាំង និងកាណាដា ធ្វើឡើង ខណៈថ្ងៃធ្វើប្រជាមតិកាន់តែជិតមកដល់។ ហើយយុទ្ធនាការនៅឯចក្រភពអង់គ្លេស ក៏កាន់តែក្ដៅគគុកផងដែរ រវាងក្រុមដែលគាំទ្រឲ្យអង់គ្លេសបន្តជាសមាជិកអឺរ៉ុប និងក្រុមប្រឆាំងសមាជិកភាពរបស់អង់គ្លេស។
នាយករដ្ឋមន្ត្រីអង់គ្លេស ដេវីដ ខេមេរ៉ូន (David Cameron) ដែលកំពុងចូលរួមប្រជុំG7 ដែរនោះ ជាអ្នកគាំទ្រឲ្យអង់គ្លេសបន្តស្ថិតក្នុងតំបន់អឺរ៉ុប។ លោកកំពុងតែធ្វើយុទ្ធនាការរកការគាំទ្រពីពលរដ្ឋអង់គ្លេស សម្រាប់ប្រជាមតិថ្ងៃទី២៣ ខែមិថុនា។ លោកអះអាងថា ការចាកចេញ នឹងធ្វើឲ្យអង់គ្លេសចុះខ្សោយផ្នែកសេដ្ឋកិច្ច ការធ្លាក់ចុះលើការវិនិយោគ និងធ្វើឲ្យមនុស្សជាច្រើនបាត់បង់ការងារ។
២. ស្កុតលែន ទំនងជាចាកចេញពីចក្រភពអង់គ្លេស ប្រសិនបើអង់គ្លេសចាកចេញពីអឺរ៉ុប
អតីរដ្ឋមន្ត្រីទីមួយរបស់ស្កុតលែន និយាយថា ស្កុតលែន នឹងបានឯករាជ្យក្នុងរយៈពេលពីរឆ្នាំ ប្រសិនបើស្កុតលែនត្រូវចាកចេញពីអឺរ៉ុប ដោយសារតែអង់គ្លេសនោះ។ ស្កុតលែនអាចនឹងរៀបចំការធ្វើប្រជាមតិថ្មីមួយ ប្រសិនបើលទ្ធផលប្រជាមតិអង់គ្លេសនៅថ្ងៃទី២៣ ខែមិថុនា បង្ហាញថា ចក្រភពអង់គ្លេសចាកចេញមែន។
ថ្លែងក្នុងវេទិកាដេញដោលតាមទូរទស្សន៍ស្ដីការធ្វើប្រជាមតិអង់គ្លេស លោក Alex Salmond អះអាងថា រដ្ឋាភិបាលស្កុតលែននឹងធ្វើប្រជាមតិ ដើម្បីកំណត់ឯករាជ្យ ហើយវានឹងជោគជ័យតែក្នុងរង្វង់ពីរឆ្នាំប៉ុណ្ណោះ។ បើតាមសារព័ត៌មានThe Guardian អតីតរដ្ឋមន្ត្រីទីមួយរបស់ស្កុតលែនរូបនេះ បន្តថា ប្រជាមតិនឹងបោះឆ្នោតគាំទ្រឯករាជ្យ ក្នុងករណីដែលអ្នកដទៃក្នុងចក្រភពអង់គ្លេស ជ្រើសរើសការចាកចេញពីអឺរ៉ុប។
យ៉ាងណាមិញ សមាជិកអភិរក្សរបស់សភា លោក Liam Fox ដែលគាំទ្រការចាកចេញ បានឆ្លើយតបនឹងលោក Salmond ក្នុងពេលនោះដែរថា សមាជិកភាពរបស់ចក្រភពអង់គ្លេសនៅអឺរ៉ុប ជាការសម្រេចចិត្តដែលសម្រេចក្នុងនាមជាចក្រភពអង់គ្លេសតែមួយ។ លោកបន្តទៀតថា សន្លឹកឆ្នោតទាំងអស់មានតម្លៃដូចគ្នា បើទោះជារស់នៅទីណាក៏ដោយ ហើយវាជាការសម្រេចចិត្តរបស់ពលរដ្ឋគ្រប់រូប ដែលគួរតែត្រូវបានគោរព៕
Tag:
អឺរ៉ុប
អង់គ្លេស
Brexit
© រក្សាសិទ្ធិដោយ thmeythmey.com