អន្តរជាតិ
លោក ពូទីនថា ប៉ូឡូញនិងរ៉ូម៉ានីក្លាយជាគោលដៅនៃគ្រាប់មីស៊ីលរុស្ស៊ី
× លោក វ្ល៉ាឌីមៀ ពូទីន បានព្រមានថា ប៉ូឡូញនិងរ៉ូម៉ានីថា ប្រទេសទាំងពីរនេះអាចរកឃើញថាពួកគេស្ថិតនៅជាគោលដៅនៃគ្រាប់រ៉ុក្កែតរបស់រុស្ស៊ីព្រោះតែប្រទេសទាំងពីរអនុញ្ញាតឲ្យអាមេរិកដាក់ដំឡើងប្រព័ន្ធការពារមីស៊ីល។ លោកបានលើកឡើងបែបនេះក្នុងពេលទស្សនកិច្ចប្រទេសក្រិកថ្ងៃសុក្រទី ២៧ ម្សិលមិញ។
រ៉ូម៉ានីនិងប៉ូឡូញដែលសុទ្ធតែជារដ្ឋរណបរបស់សហភាពសូវៀតនោះកំពុងនាំទុក្ខដាក់ខ្លួនដោយបើកផ្លូវឲ្យអាមេរិកដំឡើងប្រព័ន្ធការពារមីស៊ីលនៅក្នុងទឹកដីរបស់ពួកគេ។ រដ្ឋាភិបាលក្រេមឡាំងព្រមានម្តងជាពីរដងដែរចំពោះសកម្មភាពបង្ករឿងនេះ ដោយរដ្ឋាភិបាលនេះអះអាងថាប្រព័ន្ធការពារមីស៊ីលគំរាមកំហែងសន្តិសុខរុស្ស៊ី។
ជាថ្មីម្តងទៀត បុរសខ្លាំងរបស់រុស្ស៊ីលោក វ្ល៉ាឌីមៀ ពូទីន បានព្រមានប្រទេសទាំងពីរខាងលើជាថ្មីពាក់ព័ន្ធការអនុញ្ញាតឲ្យអាមេរិកដំឡើងប្រព័ន្ធមីស៊ីលនេះដែរ ក្នុងសន្នសីទសារព័ត៌មាននៅទីក្រុងអាថែនប្រទេសក្រិកជាមួយនាយករដ្ឋមន្ត្រីក្រិក Alexis Tsipras ។ លោក ពូទីន ព្រលយថា ទាំងរ៉ូម៉ានី និងប៉ូឡូញអាចរកឃើញថាពួកគេក្លាយជាផ្ទាំងស៊ីបនៃគ្រាប់រ៉ុក្កែតរបស់រុស្ស៊ីរួចទៅហើយ។
យោងតាមទីភ្នាក់ងារព័ត៌មាន Reuters លោកពូទីន បញ្ជាក់ថា៖« ប្រសិនបើកាលពីម្សិលមិញ ប្រជាជនរ៉ូម៉ានីមិនទាន់ដឹងថាតើជាផ្ទាំងស៊ីបមានន័យដូចម្តេច យើងនឹងបង្ខំចិត្តចាត់វិធានការច្បាស់លាស់មួយដើម្បីធានាសន្តិសុខរបស់យើង។ ហើយនៅសំណុំរឿងប៉ូឡូញក៏ដូចគ្នា»។
ប្រមុខរដ្ឋរុស្ស៊ីខាងលើបញ្ជាក់កាន់តែច្បាស់ពីការត្រៀមលក្ខណៈដើម្បីតបតរាល់ការគំរាមកំហែងពីខាងក្រៅជាពិសេសពីសំណាក់សមាជិកណាតូតែម្តង។ ហើយប្រទេសដែលធ្លាប់ស្ថិតក្រោមឥទ្ធិពលរុស្ស៊ីនោះប្រហែលជានឹងអាចរងគ្រោះព្រោះតែស្រវ៉ាអោបលោកខាងលិចផងដែរ។ តែលោក ពូទីន បានអធិប្បាយហើយថា ការឆ្លើយតបពីសំណាក់រុស្ស៊ីនេះមិនធ្វើមុនឡើយ ពោលគឺទាល់តែអាមេរិកធ្វើសកម្មភាពមុនប៉ុណ្ណោះ។
កន្លងមករុស្ស៊ីបានបញ្ជាក់ថាច្បាស់ហើយថា ខ្លួននឹងចាត់វិធានការឆ្លើយតបការបង្កើនសកម្មភាពយោធានិងដំឡើងសព្វាវុធរបស់បក្សសម្ព័ន្ធយោធាណាតូ នៅក្បែរព្រំដែនរុស្ស៊ី។ ប៉ុន្តែឆ្លើយតបបែបណាឬពេលណានោះមិនមានការបញ្ជាក់ឲ្យដឹងឡើយពីសំណាក់មន្ត្រីក្រុងម៉ូស្គូសូម្បីតែលោក ពូទីន ផ្ទាល់។ ប៉ុន្តែអ្វីដែលគួរឲ្យបារម្ភ ក្រសួងការពាររុស្ស៊ីបានប្រកាសបង្កើតកងពលធំចំនួនបីរួចទៅហើយដែលមានកងទ័ពសរុប ៣ម៉ឺនាក់ ដើម្បីការពារព្រំដែនរុស្ស៊ីនៅទីតាំងសំខាន់ជាប់អឺរ៉ុប។
Tag:
រ៉ូម៉ានី
ប៉ូឡូញ
វ្ល៉ាឌីមៀ ពូទីន
© រក្សាសិទ្ធិដោយ thmeythmey.com