អន្តរជាតិ
អាមេរិក ថា សកម្មភាពយោធាចិន កំពុងតែបង្កើត«មហាកំផែងនៃភាពឯកា»
× បើទោះបីជា ចិន អះអាងថាសកម្មភាពរបស់ចិននៅក្នុងសមុទ្រចិនខាងត្បូងគឺគ្រាន់តែជាសកម្មភាព ស៊ីវិលក៏ដោយ អាមេរិក នៅតែនិយាយចំៗ ថានោះគឺជាការបង្កើតយោធាធូបនីយកម្ម។ រដ្ឋាភិបាល ក្រុងវ៉ាស៊ីនតោន ថែមទាំង ហ៊ាននិយាយថា សកម្មភាពរបស់ចិនថាកំពុងតែជំរុញខ្លួនងងឲ្យចិនកាន់តែឃា្លតឆ្ងាយពីរដ្ឋដទៃទៀតផង។
រដ្ឋមន្ត្រីការពារជាតិអាមេរិក លោក Ashton Carter បានថ្លែងនៅថ្ងៃទី២៧ ខែឧសភា ថា ចិនកំពុងតែប្រឈមនឹងការបង្កើត «មហាកំពែងនៃការបង្កើតភាពឯកាដោយខ្លួនឯង»តាមរយៈការបន្តសកម្ម ភាពពង្រីកឥទ្ធិពលយោធានៅក្នុងសមុទ្រចិនខាងត្បូង និងការវាយប្រហារក្រុមហ៊ុនរបស់អាមេរិកតាមរយៈប្រព័ន្ធអ៊ិនធ័រនែត។
ការលើកឡើងរបស់ប្រមុខការពារជាតិរូបនេះ ត្រូវបានធ្វើឡើងមុនពេលនៃដំណើរទស្សនកិច្ចទៅ កាន់សិង្ហបុរីដើម្បីចូលរួមកិច្ចប្រជុំសន្តិសុខអាស៊ីដែលបញ្ហាសមុទ្រចិនខាងត្រូវបានរំពឹងថានឹងក្លាយជាប្រធានបទដ៏សំខាន់មួយដែលត្រូវប្រព្រឹត្តឡើងនៅថ្ងៃទី០៣ដល់ទី០៥ ខែមិថុនាសបា្ហហ៍ក្រោយនេះ។
នាពិធីបិទបញ្ចប់វគ្គបណ្តុះបណ្តាលទាហានជើងទឹងអាមេរិក លោក Carter បានបញ្ជាក់ថា « សកម្មភាពរបស់ចិន អាចបង្កើតមហាកំពែងនៃភាពឯកា»។ នេះបើយោងតាមសារភ្នាក់ងារព័ត៌មាន AFP ដែលបានបន្ថែមដែរថា លោក Carter ក៏បានសង្កត់ធ្ងន់ថា ប្រទេសនៅក្នុងតំបន់ រួមមានទាំង សម្ព័ន្ធមិត្ត និង ដៃគូ និងមិនមែនជាដៃគូ កំពុងតែព្រួយបារម្ភខ្លាំងពីបញ្ហានេះផងដែរ។
រយៈពេលចុងក្រោយនេះ ភាគីពាក់ព័ន្ធនៃជម្លោះមិនសូវមានការប្រឈមគ្នាខ្លាំងប៉ុន្មាននោះទេ ។ តែអ្វីគួរកត់សម្គាល់នោះ ស្ថានភាពបែរជាតានតឹងខ្លាំងរវាងរដ្ឋខាងក្រៅអាមេរិក និងចិនជាភាគីជម្លោះទៅវិញ។ ភាគីទាំងពីរ បានចោទដាក់គ្នាថា កំពុងតែធ្វើយោធូបនីយកម្ម និងបង្កើតកម្តៅនៃជម្លោះ។ អាមេរិក ចោទចិនថាបន្តវាតទី និងថែមទាំងបំពាក់សម្ភារយោធានៅក្នុងតំបន់ជម្លោះ ខណៈ ចិនចោទអាមេរិកវិញថា កំពុងប្រើប្រាស់ច្បាប់អន្តរជាតិដើម្បីជាលេសក្នុងការប្រតិបត្តិការ នាវាល្បាត និងយន្តហោះទម្លាក់គ្រាប់មកកាន់តំបន់ជម្លោះដើម្បីប្រឆាំងចិន។
យ៉ាងណាក៏ដោយ លោក Carter បានបញ្ជាក់ជាថ្មីថា អាមេរិក នៅតែប្តេជ្ញាបន្តប្រតិបត្តិការសេរីភាពនៃការធ្វើនាវាចរណ៍ និងពាណិជ្ជកម្ម និងដំណោះស្រាយដោយសន្តិវិធី។ លោក ថ្លែងថា មានតែការ ធានាឲ្យបាននូវការគោរពគោលការណ៍ស្មើភាពគ្នានៅក្នុងសមុទ្រចិនខាងត្បូងនោះទេ ដែលធានា ថា គ្រប់គ្នាអាចមានតួនាទីក្នុងក្របខណ្ឌដូចគ្នា ដែលអាចចៀសផុតពីកំហុសអតីតកាលដែលប្រទេសជាច្រើន បានប្រជែងគ្នាដែលបង្កជាការបំផ្លិចបំផ្លាញនោះ។
ក្រៅពីបញ្ហាសមុទ្រចិនខាងត្បួង លោកប្រមុខការពារជាតិរូបនោះ ក៏បានរិះគន់ខ្លាំងពីការវាយប្រហារតាមប្រព័ន្ធអ៊ីនធ័រនែតរបស់ចិនទៅលើក្រុមហ៊ុនអាមេរិកផងដែរ។ លោក Carter បានបញ្ជាក់ ថា ប្រព័ន្ធអ៊ិនធ័រនែតរបស់ចិន បាននិងកំពុងតែរំលោភនិងគោលការណ៍នៃការប្រើប្រាស់អ៊ិនធ័រនែត និងប៉ះពាល់ដល់កម្មសិទ្ធិបញ្ញារបស់ក្រុមហ៊ុនអាមេរិកផងដែរ៕
Tag:
អាមេរិក
សមុទ្រចិនខាងត្បូង
© រក្សាសិទ្ធិដោយ thmeythmey.com