បារាំងប្រាថ្នាចង់ឃើញស្ថាប័នរដ្ឋរបស់កម្ពុុជា ធ្វើការគោរពតាមនីតិរដ្ឋ និងសិទ្ធិមនុស្ស

ជាតិ

នយោបាយជាតិ

បារាំងប្រាថ្នាចង់ឃើញស្ថាប័នរដ្ឋរបស់កម្ពុុជា ធ្វើការគោរពតាមនីតិរដ្ឋ និងសិទ្ធិមនុស្ស

14, Jul 2016 , 7:15 pm

រូបភាព

លោកឯកអគ្គរដ្ឋទូតបារាំង Jean-Claude Poimboeuf

ដោយ:

ឯកអគ្គរដ្ឋទូតរបស់ប្រទេសបារាំងប្រចាំនៅក្នុងប្រទេសកម្ពុជា នៅថ្ងៃនេះ បានបញ្ចេញនូវក្តីប្រាថ្នារបស់រដ្ឋាភិបាលបារាំងមកលើប្រទេសកម្ពុជា ដោយចង់ឃើញស្ថាប័ននានារបស់កម្ពុជា ធ្វើការស្របតាមគោលការណ៍នីតិរដ្ឋ និងគោរពសិទ្ធិមនុស្ស។

ក្តីប្រាថ្នារបស់បារាំងចំពោះកម្ពុជាបែបនេះ ត្រូវបានប្រកាសឲ្យដឹង ដោយឯកអគ្គរដ្ឋទូតបារាំងប្រចាំនៅកម្ពុជាលោក ហ្សង់ ក្លូដ ពាំបឺហ្វ (Jean-Claude Poimboeuf) នៅក្នុងទិវាបុណ្យជាតិបារាំងនៅល្ងាចថ្ងៃទី ១៤ ខែកក្កដា នេះ ដែលប្រារព្ធធ្វើនៅស្ថានទូតបារាំងប្រចាំកម្ពុជា។ លោកឯកអគ្គរដ្ឋទូត បានថ្លែងសុន្ទរកថា នៅចំពោះភ្ញៀវជាតិ និងអន្តរជាតិ ជាពិសេសនៅចំពោះមុខមន្ត្រីរដ្ឋាភិបាល លោក ចម ប្រសិទ្ធ រដ្ឋមន្ត្រីក្រសួងឧស្សាហកម្ម និងថាមពល យ៉ាងនេះថា៖« ក្តីប្រាថ្នាធំបំផុតរបស់បារាំង គឺចង់ឃើញស្ថាប័ននានារបស់កម្ពុជា មានដំណើរការប្រកបដោយភាពសុខដុម នៅក្នុងបរិយាកាសគោរពនីតិរដ្ឋ និងសិទ្ធិមនុស្ស ដែលជាលក្ខខណ្ឌចាំបាច់នៃការរីកចម្រើនផ្នែកនយោបាយសេដ្ឋកិច្ច និងសង្គម»។

ក្រៅពីលើកឡើងពីបំណងប្រាថ្នារបស់រដ្ឋាភិបាលខ្លួនហើយ នៅក្នុងពិធីដដែលនេះ លោក Jean-Claude Poimboeuf ក៏ឆ្លៀតលើកឡើងពីការរីកចម្រើននៃទំនាក់ទំនងរវាងរដ្ឋាភិបាលកម្ពុជា និងបារាំងកន្លងទៅមួយឆ្នាំនេះផងដែរ តាមរយៈការយាងទៅទស្សនកិច្ចនៅប្រទេសបារាំងរបស់ព្រះមហាក្សត្រកម្ពុជា និងដំណើរទស្សនកិច្ចរបស់សម្តេច ហ៊ុន សែន នៅក្នុងប្រទេសសេដ្ឋកិច្ចជឿនលឿនមួយនេះ។ ហើយលោកមន្ត្រីទូតរូបនេះ បានបន្តលើកឡើងពីជំនួយរបស់បារាំង ដែលផ្តល់ជូនកម្ពុជានាពេលបច្ចុប្បន្ន ដោយផ្តោតទៅលើការកសាងហេដ្ឋារចនាសម្ព័ន្ធ និងបណ្តុះបណ្តាលវិជ្ជាជីវៈជាដើម។

សូមបញ្ជាក់ថា ថ្ងៃទី១៤កក្កដា គឺជាថ្ងៃបុណ្យជាតិបារាំងដែលត្រូវបានប្រារព្ធជាង២០០ឆ្នាំមកហើយ បន្ទាប់ពីជ័យជម្នះនៃចលនាបដិវត្តន៍ប្រឆាំងរបបរាជានិយមផ្តាច់ការ។ ថ្ងៃនេះ ក៏ជាកាលបរិច្ឆេទសំខាន់មួយ ដែលមានទំនាក់ទំនងខ្លាំង ទៅនឹងបដិវត្តន៍នៅប្រទេសបារាំង ដោយហេតុថា ថ្ងៃ១៤កក្កដាឆ្នាំ១៧៨៩ គឺជាព្រឹត្តិការណ៍ដែលរម្លឹកពីជ័យជម្នះនៃប្រជាជនបារាំង ទល់នឹងអំណាចរាជានិយមផង និងជាការរម្លឹកដល់ពិធីបុណ្យ១៤កក្កដា ឆ្នាំ១៧៩០ផង ហើយដែលត្រូវបានរៀបចំឡើង ដើម្បីអបអរជ័យជម្នះនោះ ដោយមានវត្តមានព្រះមហាក្សត្រ។