ជាតិ
នយោបាយជាតិ
គម្រោងនៃការដង្ហែសពលោក កែម ឡី ទៅខេត្តតាកែវ នៅថ្ងៃទី១៧ ត្រូវបានពន្យារ
× សពរបស់លោក កែម ឡី អ្នកវិភាគនយោបាយ និងជាអ្នកសិក្សាការអភិវឌ្ឍសង្គម នឹងមិនដង្ហែទៅកាន់ខេត្តតាកែវ នៅថ្ងៃទី១៧ ខែកក្កដា ឆ្នាំ២០១៦ តាមការគ្រោងទុកនោះទេ។
ព្រះតេជគុណ ប៊ុត ប៊ុនតិញ សមាជិកនៃគណៈកម្មការរៀបចំបុណ្យ បានមានសង្ឃដីកានៅព្រលប់ថ្ងៃទី១៥ កក្កដានេះថា ការបន្តរក្សាសពលោក កែម ឡី នៅក្នុងវត្ត ពោធិយារាម ហៅវត្តចាស់ ដែលស្ថិតក្នុងខណ្ឌជ្រោយចង្វារ គឺធ្វើឡើងតាមសំណើរបស់ប្រជាពលរដ្ឋទាំងក្នុងនិងក្រៅប្រទេស ដើម្បីផ្តល់ឱកាសដល់មហាជន បានទៅគោរពសពលោក កែម ឡី។ ម្យ៉ាងទៀត សពរបស់លោក កែម ឡី ត្រូវបានតម្កល់លើគ្រែទឹកកកមួយប្រភេទ ដែលអាចរក្សាទុកបានយូរ ដោយមិនមានការប្រែប្រួលឆាប់រហ័សពេកនោះទេ។ នេះជាការបញ្ជាក់បន្ថែមរបស់ព្រះអង្គ។
យ៉ាងណាក៏ដោយ ព្រះអង្គ ប៊ុត ប៊ុនតិញ មិនបានបញ្ជាក់ថា សពរបស់លោក កែម ឡី នឹងត្រូវដង្ហែទៅកាន់ខេត្តតាកែវ ដែលជាស្រុកកំណើតរបស់លោក នៅថ្ងៃណាឲ្យច្បាស់លាស់នោះទេ។
សូមបញ្ជាក់ថា ថ្ងៃទី១៥ កក្កដានេះ គឺជាថ្ងៃទី៦ នៃពិធីបុណ្យសពរបស់លោក កែម ឡី។ លោក កែម ឡី ត្រូវបានឃាតក បាញ់សម្លាប់ក្នុងស្តាម៉ាតមួយ (Star Mart) ដែលស្ថិតនៅម្តុំស្តុមបូកគោ កាលពីព្រឹកថ្ងៃទី១០ ខែកក្កដា ឆ្នាំ២០១៦ ។
© រក្សាសិទ្ធិដោយ thmeythmey.com