ភ្នំពេញ៖ អាជ្ញាធរក្រសួងបរិស្ថាន បានអំពាវនាវពលរដ្ឋទូទាំងប្រទេសឲ្យចូលរួមកាត់បន្ថយការបំពុលបរិស្ថាន ដោយចេះវេចខ្ចប់កាកសំណល់រឹង រាវឲ្យបានត្រឹមត្រូវ ខណៈពេលក្រសួងពាក់ព័ន្ធ និងអង្គការអភិវឌ្ឍនានា កំពុងធ្វើសេចក្តីព្រាង យុទ្ធសាស្ដ្រ និងផែនការសកម្មភាព បរិស្ថានជាតិ ឆ្នាំ ២០១៦-២០២៣ ដើម្បីកម្ពស់បរិស្ថាន។
លោក សៅ សុភាព នាយខុទ្ទកាល័យ និងជាអ្នកនាំពាក្យក្រសួងបរិស្ថាន បានជំរុញតំណាងភាគីអន្តរក្រសួង និងអង្គការដៃគូអភិវឌ្ឍជាតិ-អន្តរជាតិឲ្យបន្តការងារអប់រំពលរដ្ឋចូលរួមលើកកម្ពស់បរិស្ថានជាតិបន្ថែមទៀត។
លោកបានថ្លែងកិច្ចប្រជុំលើកទី៤ របស់ក្រុមការងារចំពោះកិច្ចអន្តរក្រសួងការរៀបចំឯកសារ យុទ្ធសាស្ដ្រ និងផែនការសកម្មភាពបរិស្ថានជាតិ ឆ្នាំ ២០១៦ ដល់ឆ្នាំ ២០២៣ នៅថ្ងៃនេះថា ទាំងអាជ្ញាធរ ពលរដ្ឋ និងអង្គការមិនមែនរដ្ឋាភិបាល មានតួនាទីរួមគ្នា ក្នុងការកាត់បន្ថយការបំពុល បរិស្ថាន ដោយពុំអាចខ្វះបាន។
លោកជឿជាក់យ៉ាងមុតមាំថា ប្រសិនបើពួកគេរួមសហការគ្នាចូលរួមកាត់បន្ថយបញ្ហាបំពុលបរិស្ថានក្នុងទឹក ដី និងខ្យល់ ព្រមទាំងអភិរក្សធនធានធម្មជាតិជីវចម្រុះនានានោះ កម្ពុជានឹងមានបរិស្ថានធម្មជាតិស្រស់បំព្រងប្រកបដោយនិរន្តរភាព។
«យើងបានអប់រំពលរដ្ឋសហគមន៍មូលដ្ឋានឲ្យចេះគ្រប់គ្រងកាកសំណល់រឹង រាវ បា្លស្ទីក និងធនធានធម្មជាតិទាំងនេះ ឲ្យមាននិរន្តភាព។ អាជ្ញាធរពុំអាចអនុវត្តដោយពុំការចូលរួមពី ពលរដ្ឋបានទេ។ បើយើងគ្រប់គ្រង់វាបានល្អនោះ វានឹងការពារបានសេដ្ឋកិច្ចសង្គម សុខភាព និងជីវភាពពលរដ្ឋ ធានាសន្តិសុខទឹក ម្ហូបអាហារ និងថាមពលវារអគ្គិសនីផងដែរ»។ អ្នកនាំពាក្យក្រសួងបរិស្ថានថ្លែង នៅថ្ងៃទី១៩ ខែកក្កដា ក្នុងសណ្ឋាគារកាំបូឌីយ៉ាណា។
ទន្ទឹមគ្នា លោកបន្តថា ក្រសួងបានស្នើម្ចាស់ក្រុមហ៊ុន រោងចក្រ សហគ្រាសឧស្សាហកម្ម ត្រូវពិនិត្យផលប៉ះពាល់នៃការអភិវឌ្ឍ និងការវិនិយោគពួកគេផងដែរ ដើម្បីកាត់បន្ថយឧស្ម័នផ្ទះកញ្ចក់ និងកាត់បន្ថយការបំពុលបរិស្ថាន។
យ៉ាងណា លោកសង្កេតឃើញថា ពលរដ្ឋមានការយល់ដឹងច្រើនជាមុន ក្រោយពីក្រសួងបានអប់រំផ្សព្វផ្សាយជាសាធារណៈ តាមរយៈកិច្ចប្រជុំបរិស្ថាន តាមវិទ្យុ ទូរទស្សន៍ កាសែត ហ្វេសប៊ុក កម្មវិធីអប់រំក្នុង និងក្រៅប្រព័ន្ធរបស់ក្រសួងកន្លងទៅ។ លោកសង្ឃឹមថា ក្រោយឯកសារព្រាងបរិស្ថានដែលចាប់ផ្តើមក្នុងខែកញ្ញា ឆ្នាំ២០១៥ រហូតដល់ឆ្នាំ ២០១៦ រួចរាល់ វានឹងជួយជំរុញការលើកកម្ពស់បរិស្ថានបន្ថែមទៀត។
ជាមួយគ្នា លោក ពេជ្រ សុខេម អ្នកដឹកនាំក្រុមការងារសិក្សាគោលនយោបាយបរិស្ថានអន្តរជាតិ ជឿជាក់ថា ការរៀបចំយុទ្ធសាស្ត្របរិស្ថាន ស្របតាមច្បាប់ស្តីពី កិច្ចការពារបរិស្ថាន និងគ្រប់គ្រងធនធានធម្មជាតិនេះ នឹងចូលរួមលើកកម្ពស់បរិស្ថានធម្មជាតិកម្ពុជាបន្ថែមទៀត។
តែយ៉ាងណា លោកបានលើកឡើងពីបញ្ហាប្រឈមក្នុងការងារលើកកម្ពស់បរិស្ថាននោះ គឺក្រសួងពុំមានថវិកាគ្រប់គ្រាន់ និងការបែងចែកអំណាចមុខងារគ្រប់គ្រងបរិស្ថានឲ្យអាជ្ញាធរ ថ្នាក់ក្រោមជាតិស្ថិតក្រោមការពិនិត្យរបស់ក្រសួងនៅមានកម្រិតនៅឡើយ។
«ក្រសួងគួរបែងចែកមុខងារថ្នាក់ក្រោមជាតិបន្ថែម ព្រោះអាជ្ញាធរថ្នាក់ក្រោមជាតិនៅផ្ទាល់ជាមួយបញ្ហា។ ពួកគេអាចជួបផ្ទាល់ជាមួយពលរដ្ឋមូលដ្ឋាន ដូចនេះពួកគេនឹងយល់ច្បាស់ ពីបញ្ហា»។ លោក ពេជ្រ សុខេម បញ្ជាក់៕