ជាតិ
លោក ប្រាក់ សុខុន គ្រោងបំពេញទស្សនកិច្ចនៅមីយ៉ានម៉ា
×
រដ្ឋមន្ត្រីក្រសួងការបរទេស និងកិច្ចសហប្រតិបត្តិការអន្តរជាតិ លោក ប្រាក់ សុខុន បានជួបពិភាក្សា និងផ្លាស់ប្ដូរយោបល់ជាមួយឯកអគ្គរដ្ឋទូតមីយ៉ានម៉ាប្រចាំកម្ពុជា ដើម្បីពង្រឹងកិច្ចទំនាក់ទំនង និងកិច្ចសហប្រតិបត្តិការរវាងប្រទេសទាំងពីរ។
ក្នុងជំនួបពិភាក្សាព្រឹកនេះ រដ្ឋមន្ត្រីក្រសួងការបរទេសកម្ពុជា លោក ប្រាក់ សុខុន បានសរសើរពីកិច្ចការកំណែទម្រង់ផ្ទៃក្នុងរបស់រដ្ឋាភិបាលមីយ៉ាន់ម៉ា ជាពិសេសដំណើរការឆ្ពោះទៅកាន់លទ្ធិប្រជាធិបតេយ្យក្នុងប្រទេសមីយ៉ានម៉ា បច្ចុប្បន្ននេះ។ ទន្ទឹមនឹងនេះលោក ប្រាក់ សុខុន ក៏បានបង្ហាញបទពិសោធន៍ក្នុងការដឹកនាំប្រទេសរបស់រដ្ឋាភិបាលកម្ពុជា ដល់អគ្គរដ្ឋទូតមីយ៉ាន់ម៉ា សម្រាប់ដំណើរការបង្រួបប្រួមជាតិក្នុងប្រទេសមីយ៉ាន់ផងដែរ។ នេះបើតាមអ្នកនាំពាក្យក្រសួងការបរទេសកម្ពុជាលោក ជុំ សន្ទរី ។
លោក ជុំ សន្ទរី បន្ថែមថា ក្រៅពីផ្លាស់បទពិសោធន៍នៃការបង្រួបបង្រួមជាតិនេះ រដ្ឋមន្ត្រីក្រសួងការបរទេសកម្ពុជា ក៏គ្រោងធ្វើដំណើរទស្សនកិច្ចទៅកាន់ប្រទេសមីយ៉ាន់ដែរ តែមិនអាចកំណត់ពេលវេលានៅឡើយ ។
បើតាមលោក ជុំ សន្ទរី ទាំងកម្ពុជា និង មីយ៉ានម៉ា បានប្ដេជ្ញារក្សាទំនាក់ទំនង និងកិច្ចសហប្រតិបត្តិការរវាងភាគទាំងពីរ ទាំងក្នុងថ្នាក់តំបន់ និងថ្នាក់អន្តរជាតិផងដែរ៕
© រក្សាសិទ្ធិដោយ thmeythmey.com