ជាតិ
ផ្សារផលិតផលខ្មែរដូរទីតាំងថ្មីមកជិតតំបន់ផ្សារចាស់
× សៀមរាប៖ ក្រោយពីដំណើរការលក់នៅលើសួនច្បារក្នុងសណ្ឋាគារផ្កាយ៤អស់រយៈពេល ៣ឆ្នាំរួចមក ផ្សារផលិតផលកម្ពុជា បានដូរទីតាំងថ្មី មកនៅក្បែរតំបន់ផ្សារចាស់វិញ។ ការសម្រេចដូរទីតាំងនេះ បើតាមអ្នកគ្រប់គ្រង គឺជាផ្នែកមួយក្នុងការទាក់ទាញភ្ញៀវទេសចរ ដែលប្រមូលផ្តុំច្រើននៅផ្សារចាស់ កណ្តាលក្រុងសៀមរាប។
អ្នកគ្រប់គ្រងទូទៅនៃផ្សារផលិតផលកម្ពុជា លោក អ៊ុន សុវណ្ណ បានប្រាប់ពីហេតុផលចំពោះការដូរទីតាំងថ្មីនេះ។ តាមការបញ្ជាក់ ហេតុផលដោយសារសណ្ឋាគារសិន្តាមុន្នី យកទីតាំងដែលផ្តល់ឲ្យនោះ ទៅប្រើប្រាស់វិញ។ យ៉ាងណា លោក សុវណ្ណមិនបានបញ្ជាក់លម្អិតនោះទេ ដោយលោកគ្រាន់តែបន្តថា ចៃដន្យអ្នកគ្រប់គ្រងមជ្ឈមណ្ឌលឃីងរ៉ូដ ចាប់អារម្មណ៍ចំពោះផ្សារផលិតផលកម្ពុជា។
មជ្ឈមណ្ឌលឃីងរ៉ូដ គឺជាតំបន់ផ្សារចម្រុះ និងភោជនីយដ្ឋានម៉ាកល្បីៗ ដែលបានបើកដំណើរជាង២ឆ្នាំមកហើយ នៅខាងត្បូងផ្សារចាស់ ខេត្តសៀមរាប។ តំបន់នេះទទួលបានការចាប់អារម្មណ៍ច្រើនពីភ្ញៀវទេសចរបរទេស ក្នុងតំបន់ដែលរៀបចំបែបបុរាណ លាយសម័យមួយនេះ។
លោក អ៊ុន សុវណ្ណ បានឲ្យដឹងបន្ថែមថា អ្នកគ្រប់គ្រងឃីងរ៉ូដ បានផ្តល់ទីតាំងធំទូលាយសម្រាប់បង្កើតផ្សារផលិតផលខ្មែរ ហើយលោករំពឹងថា ផ្សារនេះជាចំណែកដ៏សំខាន់ ក្នុងការទាក់ទាញភ្ញៀវឲ្យមកកម្សាន្តឃីងរ៉ូដ។ «ដំណាក់កាលដំបូង យើងនឹងដំណើរការក្នុងឃីងរ៉ូដរយៈពេល១ឆ្នាំ ប្រសិនវាដំណើរការបានល្អ នោះយើងនឹងធ្វើវាបន្តទៀត»។
សម្រាប់ទីតាំងថ្មីនេះ ផ្សារផលិតផលកម្ពុជានឹងចាប់ផ្តើមបើកដំណើរការនៅថ្ងៃទី២៣ កក្កដា ឆ្នាំ២០១៦។ តាមការឲ្យដឹងពីលោក សុវណ្ណ សព្វថ្ងៃមានអាជីវករចាស់ និងថ្មីចំនួន ៥០រូបហើយ ដែលបានចុះឈ្មោះលក់ក្នុងផ្សារមួយនេះ ហើយលោកជឿជាក់ថា នឹងមានអាជីវករថ្មីបន្ថែមទៀត នៅពេលដែលការរៀបចំស្តង់ថ្មី រួចរាល់ជាបន្តបន្ទាប់។
ផ្សារផលិតផលកម្ពុជាបង្កើតឡើងនៅឆ្នាំ២០១៣ ដោយគំនិតផ្តួចផ្តើមដោយអតីតអ្នកគ្រប់គ្រងសណ្ឋាគារ សិន្តាមុន្នី។ ផ្សារនេះប្រមូលផ្តុំដោយសម្ភារដែលធ្វើដោយដៃ និងជាផលិតផលក្នុងស្រុកតែមួយនៅខេត្តសៀមរាប។ ផលិតផលទាំងនោះរួមមាន ក្រមា វត្ថុអនុស្សាវរីយ៍ គំនូរលើផ្ទាំងក្រណាត់ គំនូរគ្រាប់អង្ករ ស្រា អាហារ និងការច្នៃថង់ប្លាស្ទិតជាសំលៀកបំពាក់ជាដើម។ល៕
© រក្សាសិទ្ធិដោយ thmeythmey.com