ជាតិ
សហភាពអឺរ៉ុប ពន្យារពេលផ្តល់សម្ភារបច្ចេកទេសដល់គ.ជ.ប
× ភ្នំពេញ៖ តាមការគ្រោងទុក សហភាពអឺរ៉ុប ត្រូវផ្តល់ជំនួយផ្នែកសម្ភារបច្ចេកទេស ទៅឲ្យគណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប នៅថ្ងៃទី១៥ ខែកក្កដានេះ។ ប៉ុន្តែគម្រោងនេះ ត្រូវបានខកខាន ដោយសហភាពអឺរ៉ុប សុំលើកពេលទៅថ្ងៃក្រោយវិញ។
គ.ជ.ប នៅតែបន្តរង់ចាំឧបករណ៍បច្ចេកទេស ដែលជាជំនួយរបស់សហភាពអឺរ៉ុប។ សភាពអឺរ៉ុប បានស្នើសុំពន្យារពេល ក្នុងការបញ្ជូនសម្ភារបច្ចេកទេស ទៅកាន់គ.ជ.ប ក្នុងខែកក្កដានេះ។ នេះជាការលើកឡើងរបស់លោក ហង្ស ពុទ្ធា អ្នកនាំពាក្យរបស់គជប ដែលបានប្រាប់សារព័ត៌មានថ្មីៗ។
ម្យ៉ាងទៀត លោក ហង្ស ពុទ្ធា ក៏មិនអាចបញ្ជាក់ថា សហភាពអឺរ៉ុប នឹងផ្តល់សម្ភារទាំងនោះ ដល់គ.ជ.បនៅពេលណាឲ្យជាក់លាក់នោះទេ។ លោកគ្រាន់តែបង្ហើបថា សភាពអឺរ៉ុប ទំនងជាពន្យារពេល រហូតផុតខែកក្កដានេះ ទើបប្រគល់សម្ភាបច្ចេកទេស ជូនគ.ជ.ប។ លោក បញ្ជាក់បែបនេះថា៖«ខ្ញុំក៏មិនទាន់ដឹងដែរ តែប្រហែលជាដាច់ខែនេះហើយមើលទៅ»។
បើតាមការអះអាងរបស់លោក ហង្ស ពុទ្ធា កន្លងមក ឧបករណ៍បច្ចេកទេសដែលសភាពអឺរ៉ុប នឹងប្រគល់ឲ្យគ.ជ.ប មានដូចជា កំព្យូទ័រ, ឧបករណ៍ស្កេនមេដៃ, កាមេរ៉ាសុវត្ថិភាព (Security Camera), ឧបករណ៍ផ្ទុកភ្លើង (Power Bank), ឧបករណ៍ភ្ជាប់អិនធើណិត និង ម៉ាស៊ីនភ្លើង ជាដើម។ អ្នកនាំពាក្យរូបនេះ ក៏ធ្លាប់លើកឡើងដែរថា នៅពេលគ.ជ.ប ទទួលបានសម្ភារខាងលើរួចហើយ ដំណើរការរៀបចំការបោះឆ្នោត នឹងប្រព្រឹត្តទៅកាន់តែរលូត។
លោក ហង្ស ពុទ្ធា បន្តទៀតថា ធនធានមនុស្សនិងថវិកា មិនមែនជាឧបសគ្គសម្រាប់គ.ជ.ប ទៀតនោះទេ។ លោក មានប្រសាសន៍ថា គ.ជ.ប មានលទ្ធភាពគ្រប់គ្រាន់ក្នុងការស្វែងរកបុគ្គលិកប្រមាណជា៧ពាន់នាក់ ដែលចេះប្រើប្រាស់កំព្យូទ័រ ដើម្បីបម្រើការងារទាក់ទងនឹងការបោះឆ្នោត នាអាណត្តិក្រោយ។ ជាងនេះទៀត គ.ជ.ប ក៏បានត្រៀមថវិកាចំនួន២៣លានដុល្លារផងដែរ ដើម្បីចាយវាយក្នុងអំឡុងពេលនៃការចុះឈ្មោះបោះឆ្នោតថ្នាក់ឃុំ-សង្កាត់ នាពេលខាងមុខ។
រហូតមកដល់ពេលនេះ គ.ជ.ប បានសេចក្តីជូនដំណឹងជាផ្លូវការហើយ ជុំវិញកាលបរិច្ឆេទនៃការចុះឈ្មោះបោះឆ្នោត។ យោងតាមសេចក្តីជូនដំណឹង គ.ជ.ប នឹងចាប់ផ្តើមចុះឈ្មោះបោះឆ្នោត នៅថ្ងៃទី១ កញ្ញា ឆ្នាំ២០១៦ តទៅ៕
Tag:
គជប
សហភាពអឺរ៉ុប
ជំនួយ
© រក្សាសិទ្ធិដោយ thmeythmey.com