ជាតិ
ក្រសួងវប្បធម៌គ្រោងបង្កើតសេចក្ដីព្រាងក្រមសីលធម៌វិជ្ជាជីវៈលើការផលិត និងតែងនិពន្ធ កិច្ចប្រជុំណែនាំអំពីក្រមសីលធម៌តែងនិពន្ធ និងផលិតបទចម្រៀងខារ៉ាអូខេ ដឹកនាំដោយ លោក ថៃ នរៈសត្យា
× ភ្នំពេញ៖ កាលពីព្រឹកថ្ងៃទី២០ កក្កដានេះ ក្រសួងវប្បធម៌ និងវិចិត្រសិល្បៈ បានប្រកាសថាក្រសួងគ្រោងនឹងរៀបចំបង្កើត សេចក្ដីព្រាងក្រមសីលធម៌វិជ្ជាជីវៈ ក្រមប្រតិបត្តិ និងបញ្ជីខ្មៅ សម្រាប់គ្រប់គ្រង ស្នាដៃនៃការផលិតនិងការនិពន្ធ។ ការរៀបចំបង្កើតក្រមសីលធម៌វិជ្ជាជីវៈនេះ ដើម្បីបញ្ចៀសការរិះគន់ពីសំណាក់សាធារណជន ដែលជាអ្នកគាំទ្រក្នុងវិស័យមួយនេះ។ នេះបើតាមទីភ្នាក់ងារសារព័ត៌មានកម្ពុជា AKP។
ក្នុងកិច្ចប្រជុំណែនាំអំពីក្រមសីលធម៌តែងនិពន្ធ និងផលិតបទចម្រៀងខារ៉ាអូខេ ជាមួយម្ចាស់ផលិតកម្ម លោក ថៃ នរៈសត្យា រដ្ឋលេខាធិការក្រសួងវប្បធម៌ និងវិចិត្រសិល្បៈ បានលើកឡើងថា៖ ក្រសួងនឹងយកសេចក្ដីព្រាងនេះ ទៅឆ្លងកាត់កិច្ចប្រជុំឯកភាពរវាងថ្នាក់ដឹងនាំក្រសួង។ ទន្ទឹមនឹងនេះ ក្រសួងនឹងរៀបចំសិក្ខាសាលាមួយ ទៀត ដែលអញ្ជើញចូលរួមពីសំណាក់ភាគីពាក់ព័ន្ធ ដើម្បីប្រមូលមតិសម្រាប់កែលម្អពីសំណាក់អ្នកនិពន្ធ ម្ចាស់ផលិតកម្ម និងក្រុមហ៊ុន ក្នុងការអនុវត្តន៍ក្រមសីលធម៌វិជ្ជាជីវៈប្រកបដោយប្រសិទ្ធភាព។
រដ្ឋលេខាធិការក្រសួងវប្បធម៌ និងវិចិត្រសិល្បៈ បានបញ្ជាក់ថា៖ សេចក្ដីព្រាងក្រមសីលធម៌វិជ្ជាជីវៈនេះ ជាបទដ្ឋានគិតយុត្តិមួយ ដែលអាចដាក់ពិន័យជារដ្ឋបាល។ ការដាក់ពិន័យជារដ្ឋបាលរួមមាន ការបញ្ឍរជើង ការបិទ ឬផ្អាកអាជីវកម្ម ចំពោះការតែងនិពន្ធ និងផលិតបទចម្រៀង ឬការសម្ដែង ដែលលួចចម្លងស្នាដៃ ខ្វះវិជ្ជាជីវៈ ខ្វះភាពថ្លៃថ្នូរ ដោយមានការរិះគន់ពីសំណាក់សាធារណជន និងអ្នកទស្សនា។
បើតាមលោក ថៃ នរៈសត្យា នៅសេចក្ដីព្រាងក្រមសីលធម៌វិជ្ជាជីវៈនេះ មានក្រមប្រតិបត្តិ និងបញ្ជីខ្មៅ សម្រាប់កត់ត្រាប្រវត្តិអ្នកនិពន្ធ និងអ្នកសម្ដែង ឬផលិតកម្មទាំងឡាយ ដែលប្រព្រឹត្តខុសឆ្គងក្នុងក្រមសីលធម៌។ម្យ៉ាងវិញទៀត ទោះបីក្រសួងមិនទាន់បានកំណត់ ពីកាលបរិច្ឆេទសម្រាប់ចាប់អនុវត្តន៍សេចក្ដីព្រាងក្រមសីលធម៌វិជ្ជាជីវៈនេះយ៉ាងណាក៏ដោយ ប៉ុន្តែក្រសួងបេជ្ញាពន្លឿនឲ្យកាន់តែឆាប់រហ័ស ដើម្បីលើកតម្លៃវប្បធម៌ សិល្បៈខ្មែរ៕
© រក្សាសិទ្ធិដោយ thmeythmey.com