អន្តរជាតិ
លោក Mahathir ទទូចឲ្យមានប្រជាមតិទម្លាក់លោក Najib រឿងអាស្រូវពុករលួយរាប់លានដុល្លារ
× លោកអតីតនាយករដ្ឋមន្ត្រីដ៏មានឥទ្ធិពលម៉ាឡេស៊ី Mahathir Mohamad នៅថ្ងៃព្រហស្បតិ៍ទី២១ ខែកក្កដានេះ អះអាងថាប្រជាជនម៉ាឡេស៊ីគួរជំរុញឲ្យមានប្រជាមតិមួយលើការដឹកនាំរបស់លោកនាយករដ្ឋមន្ត្រីម៉ាឡេស៊ីបច្ចុប្បន្ន Najib Razak ក្រោយរដ្ឋអាជ្ញាអាមេរិក ដាក់ពាក្យបណ្តឹងពាក់ព័ន្ធលុយកខ្វក់ចេញពីមូលនិធិ 1MDB ។
លោក Mahathir បានថ្លែងប្រាប់អ្នកសារព័ត៌មានយ៉ាងដូច្នេះថា «ប្រជាជនម៉ាឡេស៊ី គួរតែមានការប្រមូលផ្តុំដោយសន្តិវិធីដើម្បីទាមទារឲ្យដកលោក Najib ចេញពីតំណែង។ ខ្ញុំ ស្នើឲ្យប្រជាជន ជំរុញឲ្យមានប្រជាមតិលើការដឹកនាំរបស់លោកនាយករដ្ឋមន្ត្រី»។ នេះបើយោងតាមសារព័ត៌មានសិង្ហបុរី Strait Times។
សូមជម្រាបផងដែរថា នៅថ្ងៃទី២០ ខែកក្កដាម្សិលមិញ អគ្គរដ្ឋអាជ្ញាអាមេរិក បានអះអាងថា អាមេរិក បានដាក់ពាក្យបណ្តឹងស៊ីវិលមួយដើម្បីសុំរឹបអូសអចលទ្រព្យតម្លៃជាង១ពាន់លានដុល្លារអាមេរិកពាក់ព័ន្ធនឹងការលាងប្រាក់កខ្វក់របស់មន្ត្រីនៃមូលនិធិ 1MDB ដែលលួចចេញពីមូលនិធិនេះដើម្បីវិនិយោគ និងផ្ទេរនៅក្នុងទឹកដីអាមេរិក។
1MDB (1Malaysia Development Berhad) គឺជាមូលនិធីមួយដែលត្រូវបានបង្កើតឡើងដោយរដ្ឋាភិបាលម៉ាឡេស៊ីដើម្បីលើកកម្ពស់ការអភិវឌ្ឍសេដ្ឋកិច្ចម៉ាឡេស៊ី តាមរយៈការវិនិយោគបរទេសដោយផ្ទាល់ និងដៃគូវិនិយោគសកល។ មូលនិធិនេះ ក៏មានទិសដៅប្រើប្រាស់ដើម្បីបង្កើនសុខមាលភាពឲ្យកាន់តែល្អប្រសើរសម្រាប់ប្រជាជនម៉ាឡេស៊ីផងដែរ។ តាមសារព័ត៌មាន Asian Correspondent 1MDB ត្រូវបានគ្រប់គ្រងក្រសួងហិរញ្ញវត្ថុម៉ាឡេស៊ី។
យ៉ាងណាក៏ដោយ នៅថ្ងៃទី២១ ខែកក្កដាដដែលនេះ ស្ថាប័ន 1MDB ក៏បានចេញសេចក្តីថ្លែងការណ៍មួយដោយអះអាងថា ខ្លួនមិនមែនជាភាគីនៅក្នុងបណ្តឹងស៊ីវិល, មិនមានទ្រព្យសម្បត្តិនៅក្នុងទឹកដីអាមេរិក ហើយក៏មិនទទួលផលប្រយោជន៍តាមរយៈការផ្ទេរប្រាក់ដែលបានបញ្ជាក់នៅក្នុងបណ្តឹងរបស់អាមេរិកផងដែរ។
ក្នុងសេចក្តីថ្លែងការណ៍បានបន្ថែមដែរថា 1MDB មិនទាន់ត្រូវបានកោះហៅដោយក្រសួងយុត្តធម៌អាមេរិក ឬភា្នក់ងារបរទេសផ្សេងៗទាក់ទងនឹងការស៊ើបអង្កេតអីឡើយ។
សូមជម្រាបផងដែរថា បញ្ហារឿងអាស្រូវពុករលួយ 1MDB បានផ្ទុះឡើងតាំងពីឆ្នាំ២០១៥មកម្ល៉េះ។ ពេលនោះសារព័ត៌មាន Wall Street Journal និង Sarawak បានផ្សព្វផ្សាយរបាយការណ៍មួយ ស្តីពីចរន្តនៃការផ្ទេរទឹកប្រាក់ពីធនាគារ និង មូលនិធិ 1MDB ទៅកាន់គណនីរបស់លោកនាយករដ្ឋមន្ត្រីណាជីប រ៉ាហ្សាក់ ប្រមាណ៧០០លានដុល្លាសហរដ្ឋអាមេរិក តែត្រូវបានរដ្ឋាភិបាលលោក ណាជីប បដិសេធ ថាមិនបានពាក់ព័ន្ធឡើយ។ តែបណ្តឹងចុងក្រោយរបស់អាមេរិក មិនបានបញ្ជាក់ពីឈ្មោះរបស់លោក ណាជីបឡើយ៕
© រក្សាសិទ្ធិដោយ thmeythmey.com