អន្តរជាតិ
បងប្រុសលោក បារ៉ាក់ អូបាម៉ា ថាលោកនឹងបោះឆ្នោតឲ្យដូណាល់ត្រាំ
× លោក Malik Obama ជាបងប្រុសម្តាយទីទៃរបស់លោក បារ៉ាក់ អូបាម៉ា បានលើកឡើងថា លោកនឹងបោះឆ្នោតឲ្យលោក ដូណាល់ ត្រាំ នៅពេលខាងមុខ ព្រោះលោកខកចិត្តចំពោះរដ្ឋបាលលោក អូបាម៉ា។ លោកក៏បានបញ្ជាក់ដែរថាលោក ចូលចិត្តពាក្យស្លោករបស់លោក ដូណាល់ត្រាំ « ធ្វើឲ្យអាមេរិកអស្ចារ្យជាថ្មី» ដែលនិយាយចេញពីបេះដូង។
សូមស្ដាប់ព័ត៌មានលម្អិត៖
អាចថា វាជារឿងដែលស្ទើរតែមិនគួរឲ្យជឿ ដែលបងប្រុសរបស់លោក បារ៉ាក់ អូបាម៉ា លោក Malik Obama ត្រៀមបោះឆ្នោតឲ្យ បេក្ខជនបក្សសាធារណរដ្ឋជំនួសឲ្យបេក្ខជនបក្សប្រជាធិបតេយ្យ។ មូលហេតុដែលលោក រើសយកលោក ដូណាល់ ត្រាំ គឺដោយសារលោកពេញចិត្តពាក្យសម្តី និងគោលនយោបាយ ហើយលោកក៏ខកចិត្តជាមួយរដ្ឋបាលរបស់ប្អូនប្រុសលោកដែរ។
ក្នុងបទសម្ភាសន៍ជាមួយសារព័ត៌មាន The New York Post លោក Malik Obama ដែលមានឳពុករួមគ្នាជាមួយលោក បារ៉ាក់ អូបាម៉ា នោះបានលើកឡើងថា៖ « ខ្ញុំចូលចិត្ត ដូណាល់ ត្រាំ ព្រោះគាត់និយាយចេញពីបេះដូងរបស់លោក។ ធ្វើឲ្យអាមេរិកខ្លាំងជាថ្មីជាពាក្យស្លោកអស្ចារ្យមួយ។ ខ្ញុំពិតជាចង់ជួបលោក ដូណាល់ ត្រាំ»។
បងប្រុសប្រធានាធិបតីអាមេរិករូបនេះបន្តថា លោកធ្លាប់ចាត់ទុកខ្លួនឯងជាអ្នកប្រជាធិបតេយ្យ ប៉ុន្តែពេលនេះលែងទៀតហើយ ព្រោះលោកខកចិត្តខ្លាំងជាមួយរដ្ឋាភិបាលបច្ចុប្បន្នដែលដឹកនាំដោយគណបក្សប្រជាធិបតេយ្យ និងមានប្អូនប្រុសលោកជាប្រធានាធិបតីនោះ។
ក្រោយលោក Malik Obama ប្រកាសគាំទ្រលោកបែបនេះ លោក ដូណាល់ ត្រាំ បានសរសេរបង្ហោះតាមប្រព័ន្ធទំនាក់ទំនង Twitter ដោយចម្អកឲ្យលោក បារ៉ាក់ អូបាម៉ា ផងដែរ។ លោកសរសេរថា លោក Malik Obama សុខចិត្តប្តូរមកគាំទ្រលោក ក៏ដោយសារលោក Malik Obama ទំនងជារងគ្រោះដូចប្រជាជនអាមេរិកផ្សេងទៀតដែលស្ថិតក្រោមការដឹកនាំ របស់លោក បារ៉ាក់ អូបាម៉ា។
ក្រៅពីប្តូរចិត្តទៅគាំទ្របក្សសាធារណរដ្ឋ បងប្រុសលោក អូបាម៉ា ក៏បានរៀបរាប់ផងដែរពីអ្វីដែលធ្វើឲ្យលោកខកចិត្តខ្លាំងចំពោះប្អូនប្រុសខ្លួន។ នោះគឺការអន្តរាគមន៍របស់អាមេរិកដើម្បីទម្លាក់និងសម្លាប់មេដឹកនាំផ្តាច់ការលីប៊ី លោក ហ្កាដាហ្វី ដែលជាមិត្តភ័ក្តិល្អរបស់លោកនោះ។ ហើយអន្តរាគមន៍នេះមិនបានជួយឲ្យលីប៊ីប្រសើរឡើងឡើយ តែបែរជាធ្លាក់កាន់តែជ្រៅក្នុងវិបត្តិនិងខ្ទេចខ្ទាំដោយបញ្ហាអស្ថិរភាពទៅវិញ៕
Tag:
បារ៉ាក់ អូបាម៉ា
ដូណាល់ត្រាំ
© រក្សាសិទ្ធិដោយ thmeythmey.com