អន្តរជាតិ
អាស៊ាន ប្តេជ្ញាពង្រឹង «ការរួបរួម សាមគ្គីភាព និងភាពជាស្នូល»រវាងគ្នា
× បន្ទាប់ពីការចេញសេចក្តីថ្លែងការណ៍រួមនៃរដ្ឋមន្ត្រីការបរទេសលើកទី៤៩ដោយជោគជ័យ រដ្ឋមន្ត្រីការបរទេសអាស៊ាន បានចេញសេចក្តីថ្លែងការណ៍រួមមួយថ្មីបន្ថែមដោយមិនបញ្ជាក់ពីបញ្ហាជាក់លាក់អ្វីនោះទេ តែ បង្ហាញពីការប្តេជ្ញាចិត្តរបស់សមាជិកអាស៊ានទាំងដប់ក្នុងការបន្តលើមាគ៌ាតែមួយជាមួយនឹងគ្នា។
រដ្ឋមន្ត្រីការបរទេស នៃសមាជិកអាស៊ាន បានចេញសេចក្តីថ្លែងការណ៍មួយដែលបានចុះផ្សាយនៅថ្ងៃទី២៦ខែកក្កដានេះស្តីពីការរក្សាសន្តិភាព សន្តិសុខ និងស្ថិរភាពនៅក្នុងតំបន់។ សេចក្តីថ្លែងការណ៍ បានបញ្ញត្តិពីការប្តេជ្ញាចិត្តជាថ្មីរវាងបណ្តាសមាជិកទាំងអស់ក្នុងការបន្តដំណើរទៅមុខរួមជាមួយនឹងគ្នា។
សេចក្តីថ្លែងការណ៍ដែលមានកម្រាស់ត្រឹមមួយទំព័រប៉ុណ្ណោះ បានបញ្ជាក់ថា អាស៊ាន បានប្តេជ្ញាធានាឲ្យអាស៊ីអាគ្នេយ៍ និងតំបន់ជុំវិញ នៅតែមានសន្តិភាព ស្ថិរភាព និងសន្តិសុខនៅក្នុងតំបន់។ ប្រទេសទាំងអស់ ក៏បានប្តេជ្ញាលើកកម្ពល់ពីផលប្រយោជន៍រួមរវាងទំនាក់ទំនងនៃបណ្តាសមាជិកដើម្បីរក្សាឲ្យបានសន្តិភាព សន្តិសុខ និងស្ថិរភាព និងសុខដុមរមនាជាមួយនឹងរដ្ឋនៅក្នុងតំបន់ និងសហគមន៍អន្តរជាតិផងដែរ។
នៅក្នុងសេចក្តីថ្លែងការណ៍ដដែល ក៏បានអះអាងពីការប្តេជ្ញាចិត្តរបស់សមាជិកអាស៊ានក្នុងការបន្តអនុវត្តធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងសន្ធិសញ្ញាមិត្តភាព និងសហប្រតិបត្តិការនៅក្នុងអាស៊ីអាគ្នេយ៍ជាដើម។ បន្ថែមពីនេះ អាស៊ាន ក៏បានអះអាងជាថ្មី ពីការគោរពនូវគោលជំហររបស់អាស៊ានដែលបញ្ជាក់នៅក្នុងសេចក្តីថ្លែងការណ៍រួមនៃកិច្ចប្រជុំរដ្ឋមន្ត្រីការបរទេសលើកទី៤៩ ដែលបានចេញផ្សាយនៅថ្ងៃទី២៥ ខែកក្កដាម្សិលមិញ។
ជាពិសេសនោះ សមាជិកសមាគមប្រជាជាតិអាស៊ីអាគ្នេយ៍ ឬហៅអាស៊ាន ក៏បានប្តេជ្ញា «ពង្រឹងការរួបរួម សាមគ្គីភាព និងភាពជាស្នូល និងទទូចឲ្យរដ្ឋដទៃគោរពបទដ្ឋាន និងគោលការណ៍របស់អាស៊ានផងដែរ»។
សូមរម្លឹកផងដែរថា សមាគមប្រជាជាតិអាស៊ីអាគ្នេយ៍ ឬហៅថាកាត់ថាអាស៊ាន ត្រូវបានបង្កើតឡើងជាផ្លូវការនៅឆ្នាំ១៩៦៧ ដោយស្ថាបនិកប្រាំប្រទេសរួមមាន ឥណ្ឌូនេស៊ី ម៉ាឡេស៊ី សិង្ហបុរី ហ្វីលីពីន និងថៃ។ បច្ចុប្បន្នអាស៊ានមានសមាជិកសរុបទាំងអស់ដប់ប្រទេសដែលបន្ថែមពីលើស្ថាបនិករួមមាន ព្រុយណេ វៀតណាម មីយ៉ាន់ម៉ា ឡាវ និងកម្ពុជា។ ទីម័រខាងកើត កំពុងស្ថិតនៅក្នុងនីតិវិធីនៃការអង្កេត និងវាយតម្លៃពីក្រុមការងារអាស៊ានដើម្បីអាចក្លាយជាសមាជិកទី១១នៃអាស៊ាន៕
© រក្សាសិទ្ធិដោយ thmeythmey.com