សម្ដេច ហ៊ុន សែន ផ្ដាំសមាជិកព្រឹទ្ធសភាគណបក្ស សម រង្ស៊ី ម្នាក់ថា កុំរត់ឆ្លងដែនប្រយ័ត្នគេចាប់

ជាតិ

នយោបាយជាតិ

សម្ដេច ហ៊ុន សែន ផ្ដាំសមាជិកព្រឹទ្ធសភាគណបក្ស សម រង្ស៊ី ម្នាក់ថា កុំរត់ឆ្លងដែនប្រយ័ត្នគេចាប់

02, Aug 2016 , 10:43 am

រូបភាព

ដោយ: ថ្មីៗ

ពីពិធីសម្ពោធដាក់ឲ្យប្រើប្រាស់ ផ្លូវជាតិលេខ៤៤ នៅក្នុងខេត្តកំពង់ស្ពឺ សម្ដេចនាយករដ្ឋមន្ត្រី ហ៊ុន សែន បានផ្ដាំទៅសមាជិកព្រឹទ្ធសភាពីគណបក្ស សម រង្ស៊ី ថា មិនត្រូវរត់ឆ្លងដែនចេញពីប្រទេសកម្ពុជាឡើយ ពោលគឺត្រូវប្រឈមមុខទទួលខុសត្រូវ ចំពោះការចោទប្រកាន់មកលើសម្ដេច ជុំវិញករណីបាញ់សម្លាប់លោក កែម ឡី។

សម្ដេច ហ៊ុន សែន លើកឡើងដូច្នេះ ដោយទំនងជាសម្តេចចង់ផ្ដាំទៅអ្នកស្រី ថាក់ ឡានី សមាជិកព្រឹទ្ធសភាពីគណបក្ស សម រង្ស៊ី ដែលសម្តេចអះអាងថា បានចោទខ្លួន ជាអ្នកសម្លាប់លោក កែម ឡី ។ «តាមដឹងប្រុងឆ្លងតាមច្រកប៉ោយប៉ែត សូមកុំឆ្លង ក្រែងលោគេចាប់ ចង់ឆ្លងយក(លេស)ថាចង់ទៅព្យាបាលជំងឺ សូមកុំឲ្យសោះប្រយ័ត្ន។ ត្រូវតទល់គ្នា ហ៊ានស៊ីហ៊ានសង ហ៊ានផ្លោះរបងហ៊ានជាប់គុក ព្រោះអ្នកឯងហ៊ានផ្លោះរបងហើយ…»។ នេះជាការបញ្ជាក់របស់លោកនាយករដ្ឋមន្ត្រី។

កាលពីថ្ងៃទី០១ សីហា សម្តេច ហ៊ុន សែន បានដាក់ពាក្យប្តឹងឯកឧត្តម សម រង្ស៊ី និងអ្នកស្រី ថាក់ ឡានី សមាជិកព្រឹទ្ធសភាគណបក្សសម រង្ស៊ី ពាក់ព័ន្ធនឹងករណីឃាតកម្មលើលោក កែម ឡី។ សម្តេចនាយករដ្ឋមន្ត្រី ហ៊ុន សែន បានឲ្យមេធាវីរបស់ខ្លួនប្តឹងឯកឧត្តម សម រង្ស៊ី ដែលសរសេរនៅលើទំព័រហ្វេសប៊ុក ចោទរដ្ឋាភិបាលថា ជាអ្នករៀបចំអំពើភេរវកម្មសម្លាប់លោកបណ្ឌិត កែម ឡី និងប្តឹងអ្នកស្រី ថាក់ ឡានី ដែលចោទសម្តេច ហ៊ុន សែន ថា ជាអ្នកសម្លាប់លោក កែម ឡី ។ លោក គី តិច មេធាវីការពារក្តីឲ្យសម្តេច ហ៊ុន មិនបញ្ជាក់ពីបទចោទប្រកាន់អ្វីឲ្យច្បាស់លើឯកឧត្តម សម រង្ស៊ី និង អ្នកស្រី ថាក់ ឡានី ព្រោះលោកទុកឲ្យតុលាការជាអ្នកចោទប្រកាន់។ បើតាមលោក គី តិច មេធាវី សម្តេច ហ៊ុន សែន ទាមទារសំណងជំងឺចិត្តពីឯកឧត្តម សម រង្ស៊ី និងអ្នកស្រី ថាក់ ឡានី តែម្នាក់ ១០០ រៀលតែប៉ុណ្ណោះ ដោយសារតែសម្តេចមិនចង់បានប្រាក់អ្វីនោះឡើយ តែសម្តេចចង់បានតែការបញ្ជាក់ពីភាពស្អាតស្អំតែប៉ុណ្ណោះ៕