ចិន-មីយ៉ាន់ម៉ា សន្យាពង្រឹងកិច្ចសហប្រតិបត្តិការលើវិស័យជាច្រើនជាមួយគ្នា

អន្តរជាតិ

ចិន-មីយ៉ាន់ម៉ា សន្យាពង្រឹងកិច្ចសហប្រតិបត្តិការលើវិស័យជាច្រើនជាមួយគ្នា

19, Aug 2016 , 4:56 pm

រូបភាព

ដោយ:

រដ្ឋាភិបាលក្រុងប៉េកាំង និងរដ្ឋាភិបាលក្រុងរ៉ងហ្គូន បានសន្យាពង្រឹងកិច្ចសហប្រតិបត្តិការទ្វេភាគីជាមួយនឹងគ្នាលើការកសាងទំនុកចិត្តផ្នែកនយោបាយ និងចំណងសេដ្ឋកិច្ច ក៏ដូចជាបង្ហាញឆន្ទៈក្នុងធ្វើការជាមួយគ្នាឡើងវិញលើគម្រោងវារីអគ្គិសនីដែលស្ថិតក្រោមកិច្ចប្រតិបត្តិការទ្វេភាគីដែលបានផ្អាកតាំងពីឆ្នាំ២០១១មក។ កិច្ចព្រមព្រៀងនេះ ត្រូវបានធ្វើឡើងនាឱកាសនៃដំណើរទស្សនកិច្ចរបស់លោកស្រីទីប្រឹក្សារដ្ឋមីយ៉ាន់ម៉ាទៅកាន់មហាចិន។

លោកនាយករដ្ឋមន្ត្រីចិន លី ឃឺឈាង ដែលបានស្វាគមន៍ជាមួយនឹងកម្រាលព្រំពណ៌ក្រហម នៅថ្ងៃទី១៨ ខែសីហាម្សិលមិញ បានថ្លែងទៅកាន់លោកស្រីទីប្រឹក្សារដ្ឋមីយ៉ាន់ម៉ា អ៊ុងសាន ស៊ូជី ថា ចិន ពិតជាមានឆន្ទៈក្នុងការផ្សាភ្ជាប់យុទ្ធសាស្ត្ររបស់ខ្លួនជាមួយនឹងមីយ៉ាន់ម៉ា ដើម្បីសហប្រតិបត្តិការលើវិស័យស្នូល និងបង្កើនគម្រោងធំៗដូចជា គម្រោងតភ្ជាប់ប្រេង និងឧស្ម័ន និងគម្រោងទំនប់វារីអគ្គិសនី Myitson ផងដែរ។

ទំនប់ Myitson គឺជាគម្រោងទំនប់ថាមពលវារីអគ្គិសនីដ៏ធំមួយរបស់មីយ៉ាន់ម៉ាដែលស្ថិតក្រោមកិច្ចសហប្រតិបត្តិការជាមួយនឹងចិន។ គម្រោងដែលមានទំហំវិនិយោគរហូតដល់ជាងបីពាន់ដុល្លារនេះ បានចាប់ផ្តើមតាំងពីឆ្នាំ២០០៩ និងផ្អាកវិញនៅឆ្នាំ២០១១ ក្នុងពេលដែលលោកអតីតប្រធានាធិបតីមីយ៉ាន់ម៉ា លោក ថេន សេន ឡើងកាន់អំណាច។ ការផ្អាកនេះ ក៏ជាផ្នែកមួយនៃភាពចម្រូងចម្រាសក្នុងស្រុករបស់មីយ៉ាន់ម៉ា ដោយមានការខ្វែងគំនិតគ្នាពីក្រុមឧទ្ទាមទាហានឯករាជ្យ ដែលបានបង្ហាញគោលជំហរជំទាស់ខ្លាំងនោះ ដោយចោទថាចិន បានបំពាន។

យ៉ាងណាក៏ដោយ លោកអនុរដ្ឋមន្ត្រីការបរទេសចិន Liu Zhenmin បានថ្លែងប្រាប់អ្នកសារព័ត៌មានក្រោយកិច្ចប្រជុំថា លោកស្រីទីប្រឹក្សារដ្ឋ និងជារដ្ឋមន្ត្រីការបរទេសមីយ៉ាន់ម៉ា បានអះអាងថា រដ្ឋាភិបាលលោកស្រី នឹងបង្កើតគណៈកម្មាធិការអង្កេតការណ៍មួយដើម្បីស្វែងរកដំណោះស្រាយនេះ។

យោងតាមកាសែតរដ្ឋចិន China Daily នាជំនួបជាមួយនឹងលោកនាយករដ្ឋមន្ត្រី លី ឃឺឈាង លោកស្រី អ៊ុងសាន ស៊ូជី បានបញ្ជាក់ថា រដ្ឋាភិបាលថ្មីមីយ៉ាន់ម៉ា ពិតជាផ្តល់តម្លៃខ្ពស់លើចំណងមិត្តភាពជាមួយនឹងចិន ហើយប្តេជា្ញបង្កើនទំនាក់ទំនងឲ្យកាន់តែល្អប្រសើរតាមរយៈការផ្លាស់ប្តូរមន្ត្រីជាន់ខ្ពស់, បង្កើនទំនុកចិត្តនយោបាយ សហប្រតិបត្តិការតាមព្រំដែនលើវិស័យពាណិជ្ជកម្ម និងកសិកម្ម ក៏ដូចជារក្សាស្ថិរភាពតាមតំបន់ព្រំដែន។ ជាមួយគ្នានោះ លោកស្រី ក៏ឆ្លៀតអញ្ជើញលោកនាយករដ្ឋមន្ត្រីលី បំពេញទស្សនកិច្ចនៅមីយ៉ាន់ម៉ាផងងដែរ។

សូមជម្រាបផងដែរថា លោកស្រី អ៊ុងសាន ស៊ូជី កំពុងតែបំពេញទស្សនកិច្ចផ្លូវការរយៈពេលប្រាំថ្ងៃទៅកាន់ចិនក្នុងនាមជាទីប្រឹក្សារដ្ឋដែលជាតំណែងលំដាប់កំពូលទីពីររបស់មីយ៉ាន់ម៉ាតាមការអញ្ជើញរបស់លោកនាយករដ្ឋមន្ត្រីលី ឃឺឈាង។ ដំណើរទស្សនកិច្ចដែលបានចាប់ផ្តើមតាំងពីថ្ងៃទី១៧ខែសីហាមកនេះ គឺជាការបំពេញទស្សនកិច្ចលើកដំបូងហើយរបស់លោកស្រីទៅកាន់ចិនក្នុងនាមជាមេដឹកនាំមីយ៉ាន់ម៉ាចាប់តាំងពីបក្សលោកស្រីដឹកនាំរដ្ឋាភិបាលថ្មីមីយ៉ាន់ម៉ា។ នេះ ក៏ជាដំណើរទស្សនកិច្ចក្រៅបរទេសផ្លូវការលើកដំបូង ក្រៅពីប្រទេសអាស៊ានផងដែរ៕