ជាតិ
PUC រៀបចំពិធីបុណ្យកតញ្ញូ ដើម្បីអប់រំនិស្សិតឲ្យដឹងគុណឪពុកម្តាយ
× ភ្នំពេញ៖ នៅថ្ងៃទី២០ ខែសីហា ឆ្នាំ២០១៦នេះ សាកលវិទ្យាល័យបញ្ញាសាស្ត្រនៃកម្ពុជា (PUC) បានរៀបចំពិធីមួយ ដែលមានឈ្មោះថា «ទិវាខ្មែរ និង គុណធម៌»។ ការរៀបចំកម្មវិធីនេះឡើង គឺដើម្បីរម្លឹកនូវគុណឪពុកម្តាយ និងគ្រូបង្រៀន។
អ្នកចូលរួមក្នុងកម្មវិធីនេះ គឺជានិស្សិតថ្នាក់ប្រវត្តិសាស្ត្រនិងខេមរវិទ្យា នៃសាកលវិទ្យាល័បញ្ញាសាស្ត្រនៃកម្ពុជា រួមទាំងឪពុកម្តាយរបស់ពួកគេផងដែរ ដែលមានប្រហែលជា៤ទៅ៥រយនាក់។ កម្មវិធីនេះ តម្រូវឲ្យនិស្សិត ក្រាបថ្វាយបង្គំ ឪពុកម្តាយរបស់ពួកគេ ដើម្បីបង្ហាញពីការគោរពដឹងគុណដ៏ធំធេងរបស់លោកទាំងពីរ ដែលមិនអាចគណនាបាន។
លោក សំបូរ មាណ្ណារ៉ា សាស្ត្រាចារ្យផ្នែកប្រវត្តិសាស្ត្រខ្មែរនិងខេមរវិទ្យា ហើយក៏ជាអ្នកផ្តួចផ្តើមកម្មវិធីនេះ បានថ្លែងថា ទិវានេះ មានសារសំខាន់ខ្លាំងណាស់ ក្នុងការពង្រីកគុណធម៌ដល់កូនចៅជំនាន់ក្រោយ ហើយនឹងញ៉ាំងពួកគេ ឲ្យក្លាយជាអតិជាតបុត្រ រហូតដល់ក្លាយជាធនធានដ៏មានតម្លៃសម្រាប់សង្គមទាំងមូល។ លោក អះអាងថា ការបណ្តុះបណ្តាលគុណធម៌ និងការណែនាំនិស្សិត ព្រមទាំងយុវជនឲ្យប្រកាន់ខ្ជាប់នូវគុណធម៌ក្នុងខ្លួន គឺជាគ្រាប់ពូជ ដែលនាំឲ្យគ្រួសារ និងប្រទេសជាតិ រស់នៅដោយសុភមង្គល និងសុខសន្តិភាព។
លោក សង្កត់ធ្ងន់ៗថា៖«យើងមិនមែនបង្រៀនតែចំណេះដឹងទេ គឺយើងត្រូវតែបណ្តុះគុណធម៌ដល់និស្សិត ផងដែរ។ សីល សមាធិ បញ្ញា គឺជាគោលការណ៍របស់សាកលវិទ្យាល័យបញ្ញាសាស្ត្រកម្ពុជា របស់យើង»៕
© រក្សាសិទ្ធិដោយ thmeythmey.com