ចិន សន្យាជួយមីយ៉ាន់ម៉ាក្នុងដំណើការចរចាសន្តិភាព

អន្តរជាតិ

ចិន សន្យាជួយមីយ៉ាន់ម៉ាក្នុងដំណើការចរចាសន្តិភាព

20, Aug 2016 , 7:32 pm

រូបភាព

ដោយ: តន ចាន់រិទ្ធារ៉ា

មហាយក្សចិន បានប្រកាសជួយមីយ៉ាន់ម៉ាក្នុងដំណើការចរចាស្វែងរកសន្តិភាពរវាងរដ្ឋាភិបាលមីយ៉ាន់ម៉ា និងក្រុមឧទ្ទាមនៅក្នុងប្រទេសនេះ ដែលបានអូសបន្លាយអស់ពេលជាច្រើនឆ្នាំមកហើយនោះ ដោយចិននឹងប្រើប្រាស់តួនាទីដែលប្រយោជន៍ក្នុងដំណើការនេះ។ ការប្រកាសនេះត្រូវបានធ្វើឡើងនាឱកាសដំណើរទស្សនកិច្ចរបស់ទីប្រឹក្សារដ្ឋមីយ៉ាន់ម៉ាទៅកាន់មហាចិន។

ទីប្រឹក្សារដ្ឋ និងជារដ្ឋមន្ត្រីការបរទេសមីយ៉ាន់ម៉ា លោកស្រី អ៊ុងសាន ស៊ូជី បានជួបជាមួយប្រធានាធិបតីចិន លោក ស៊ី ជិនពីង ក្នុងដំណើទស្សនកិច្ចផ្លូវការលើទឹកដីចិន។ ក្នុងជំនួបជាមួយលោកស្រី ស៊ូជី នៅថ្ងៃទី១៩ ខែសីហា ប្រធានាធិបតី ស៊ី បានសន្យាថា ចិន នឹងបន្តតួនាទីស្ថាបនារបស់ខ្លួន ក្នុងការជំរុញដំណើការចរចាសន្តិភាពនៅមីយ៉ាន់ម៉ា ក៏ដូចជាធ្វើការជាមួយក្រុងណៃពិដោ ក្នុងការរក្សាសន្តិភាពតាមបណ្ដោយព្រំដែនប្រទេសទាំងពីរ។

ជាការឆ្លើយតប លោកស្រីទីប្រឹក្សារដ្ឋមីយ៉ាន់ម៉ា និយាយថា លោកស្រីមានជំនឿថា អ្នកជិតខាងល្អដូចជាចិន នឹងធ្វើអ្វីគ្រប់យ៉ាង ដើម្បីជំរុញដំណើការសន្តិភាពនៅមីយ៉ាន់ម៉ា។ លោកស្រី ស៊ូជី បន្តថា ចិនក្នុងនាមជាអ្នកជិតខាងមានព្រំដែនជាប់គ្នាដែលសម្បូរដោយក្រុមប្រដាប់ជនជាតិភាគតិច ពិតជាដើរតួសំខាន់ណាស់។ នេះជាការលើកឡើងរបស់លោកស្រី ដែលត្រូវបានស្រង់សំដីដោយទីភ្នាក់ងារព័ត៌មានចិន Xinhua។

ការសន្យាជួយគ្នាលើដំណើការចរចាសន្តិភាពនៅមីយ៉ានម៉ានេះ ធ្វើឡើងនៅមុនការមកដល់នៃសន្និសីទថ្នាក់សហព័ន្ធរវាងក្រុមប្រដាប់អាវុធជនជាតិភាគតិចនៅមីយ៉ាន់ម៉ា ដែលគ្រោងធ្វើនៅចុងខែសីហា។ ទាក់ទិននឹងបញ្ហានេះ លោកស្រី ស៊ូជី បញ្ជាក់ថា៖«ប្រសិនបើអ្នកសួរខ្ញុំអ្វីដែលគោលដៅសំខាន់បំផុត នោះគឺការទទួលបានសន្តិភាព និងការរួបរួមគ្នាក្នុងចំណោមប្រជាជនមីយ៉ាន់ម៉ា។ ប្រសិនបើគ្មានសន្តិភាព ក៏គ្មានការអភិវឌ្ឍដែរ។»

នៅតាមព្រំដែនដ៍វែងរវាងចិន និងមីយ៉ាន់ម៉ា មានកងកម្លាំងប្រដាប់អាវុធជាច្រើន ដែលតែងតែប៉ះទង្គិចគ្នាជាមួយកងទាហានរដ្ឋាភិបាលមីយ៉ាន់ម៉ា ហើយក្រុងប៉េកាំង ក៏បានពង្រាយកងទ័ពរបស់ខ្លួនជាច្រើនផងដែរ។ នាពេលរយៈពេលប៉ុន្មានឆ្នាំចុងក្រោយ គេសង្កេតឃើញមាន ការប៉ះទង្គិចគ្នារវាងទាហានមីយ៉ាន់ម៉ា និងក្រុមឧទ្ទាម Kokoang នៅក្បែរព្រំដែនជាមួយចិន ដែលធ្វើមនុស្សស្លាប់ និងរបួសជាច្រើន។

សូមជម្រាបផងដែរថា លោកស្រី អ៊ុងសាន ស៊ូជី កំពុងតែបំពេញទស្សនកិច្ចផ្លូវការរយៈពេលប្រាំថ្ងៃទៅកាន់ចិនក្នុងនាមជាទីប្រឹក្សារដ្ឋដែលជាតំណែងលំដាប់កំពូលទីពីររបស់មីយ៉ាន់ម៉ាតាមការអញ្ជើញរបស់លោកនាយករដ្ឋមន្ត្រីលី ឃឺឈាង។ ដំណើរទស្សនកិច្ចដែលបានចាប់ផ្តើមតាំងពីថ្ងៃទី១៧ខែសីហាមកនេះ គឺជាការបំពេញទស្សនកិច្ចលើកដំបូងហើយរបស់លោកស្រីទៅកាន់ចិនក្នុងនាមជាមេដឹកនាំមីយ៉ាន់ម៉ាចាប់តាំងពីបក្សលោកស្រីដឹកនាំរដ្ឋាភិបាលថ្មីមីយ៉ាន់ម៉ា។ នេះ ក៏ជាដំណើរទស្សនកិច្ចក្រៅបរទេសផ្លូវការលើកដំបូង ក្រៅពីប្រទេសអាស៊ានផងដែរ៕