អន្តរជាតិ
តួកគី៖ សមាជិក IS វ័យ១២ឆ្នាំ បំផ្ទុះគ្រាប់បែកអត្តឃាតសម្លាប់យ៉ាងហោច៥០នាក់
× អាជ្ញាធរតួកគីបានអះអាងថា ក្មេងតូចវ័យចន្លោះពី ១២ ឬ១៤ឆ្នាំម្នាក់បំផ្ទុះគ្រាប់បែកអត្ថឃាតហើយសម្លាប់មនុស្សយ៉ាងហោចណាស់ ៥០នាក់នៅពិធីរៀបមង្គលការមួយនៅក្រុង Gaziantep។រដ្ឋាភិបាលបានថ្កោលទោសនិងចោទថា ក្មេងខាងលើជាសមាជិកក្រុមភេរវជនរដ្ឋឥស្លាមឬក្រុមដែស្ហ ។
ការបំផ្ទុះគ្រាប់បែកអត្តឃាតមួយបានសម្លាប់មនុស្សយ៉ាងហោចណាស់ ៥០នាក់ ដែលបានចូលរួមមង្គលការនៅក្រុង Gaziantep ដែលស្ថិតនៅជាប់ប្រទេសស៊ីរីនាថ្ងៃអាទិត្យទី ២១ ម្សិលមិញនេះ។ រដ្ឋាភិបាលក្រុងអង់ការ៉ាបានអះអាងថា ក្មេងប្រុសអាយុចន្លោះពី ១២ ដល់១៤ឆ្នាំ និងជាបណ្តាញក្រុមភេវជនរដ្ឋឥស្លាមឬក្រុមដែស្ហ (Daesh) ជាអ្នកបង្កសោកនាដកម្មនេះឡើង។
យោងតាមទីភ្នាក់ងារព័ត៌មាន AFP ប្រធានាធិបតីតួកគី លោក Recep Tayyip Erdogan បានចេញមុខថ្កោលទោសចលនាភេរវកម្ម ហើយលោកបានអះអាងថា ក្មេងដែលជាភេរវជននោះជាបណ្តាញរបស់ក្រុមភេរវជនរដ្ឋឥស្លាមផង។ លោកបន្តថាក្មេងម្នាក់នេះអាចបំផ្ទុះខ្លួនឯង ឬមានអ្នកដទៃចាំបំផ្ទុះគ្រាប់ដែលនៅជាប់ខ្លួនគេ។
លោកបានប្រាប់អ្នកសារព័ត៌មានថា ចំនួនអ្នកស្លាប់កើនដល់ ៥១ នាក់ ហើយអ្នករបួសមាន ៩១នាក់ផងដែរ។ មនុស្ស ៦៩នាក់ទៀតនៅសម្រាកនៅពេទ្យនៅឡើយ ហើយក្នុងចំណោមនោះមាន ១៧នាក់ជាជនរងគ្រោះដែលស្ថិតក្នុងស្ថានភាពធ្ងន់ធ្ងរ។ ហើយក្នុងចំណោមជនរងគ្រោះជាស្ត្រី និងកុមារ។
បើតាមអាជ្ញាធរមូលដ្ឋាន អ្នកស្លាប់ភាគច្រើនជាជនជាតិឃឺត ហើយជាអ្នកដែលចូលរួមមង្គលការ ហើយកូនកម្លោះនិងកូនក្រមុំបានរងគ្រោះថ្នាក់ក្នុងការបំផ្ទុះគ្រាប់បែកនេះដែរ ប៉ុន្តែមិនរងគ្រោះខ្លាំងឡើយ។ ពួកគេត្រូវបានបញ្ជូនទៅកាន់មន្ទីរពេទ្យដើម្បីទទួលបានការព្យាបាល។
យ៉ាងណាក៏ដោយ ពិធីមង្គលការបានប្រែក្លាយជាទៅសោកនាដកម្ម ហើយអ្នកស្លាប់រាប់នាក់ត្រូវបានគេរៀបចំពិធីបុណ្យសពឲ្យនៅថ្ងៃអាទិត្យទី ២១ ម្សិលមិញដែរ។ ក្រុមសាច់ញាតិបងប្អូនអ្នកស្លាប់ បានបង្ហាញការខឹងសម្បារចំពោះអាជ្ញាធរជាពិសេសរដ្ឋាភិបាលរបស់លោក Erdogan តែម្តង។ ពួកគេបាននាំគ្នាស្រែកខ្លាំងៗថា ៖«គួរឲ្យខ្មាសអៀនណាស់ Erdogan» ហើយខ្លះទៀតបានគប់ទឹកសុទ្ធទៅលើប៉ូលិសដែលឈរការពារសន្តិសុខនិងទប់ស្កាត់ក្រែងហិង្សាកើតឡើងនោះ។
ដោយសារអ្នកស្លាប់ភាគច្រើនជាប្រជាជនឃឺដ លោកប្រធានាធិបតីក៏បានលើកឡើងផងដែរថា ក្រុមភេរវជនរដ្ឋឥស្លាមឬក្រុមដែស្ហ មានគោលបំណងធ្វើឲ្យមានការបែកបាក់គ្នារវាងប្រជាជនតួកគីជាច្រើនក្រុម មានទាំងក្រុមឃឺត ក្រុមអារ៉ាប់ និងក្រុមប្រជាជនតួក។ ហើយវាក៏បញ្ឆេះការស្អប់ខ្ពើមនិងខឹងសម្បារគ្នាទៅវិញទៅមកផងក្នុងចំណោមជនជាតិភាគតិចដែលមានពូជសាសន៍ វប្បធម៌ និងសាសនាខុសគ្នានោះ។
យ៉ាងណាមិញ ក្រុមកងកម្លាំងឃឺតនេះ ត្រូវបានក្រុមភេរវជនចាត់ទុកជាសត្រូវ ដោយសារតែកងកម្លាំងឃឺតច្រើនណាស់ដែរកំពុងចេញមុខវាយកម្ចាត់ក្រមភេរវជនរដ្ឋឥស្លាមនៅក្នុងទឹកដីស៊ីរីនោះ៕
Tag:
ក្រុមដែស្ហ
ឃឺត
Gaziantep
Recep Tayyip Erdogan
© រក្សាសិទ្ធិដោយ thmeythmey.com