អន្តរជាតិ
អតីតប្រធានាធិបតីសិង្ហបុរី S R Nathan ស្លាប់នៅវ័យ ៩២ឆ្នាំ
× អតីតប្រធានាធិបតីសិង្ហបុរីលោក SR Nathan បានទទួលមរណភាពនៅថ្ងៃចន្ទទី ២២ ខែសីហានេះ ក្នុងវ័យ ៩២ឆ្នាំ ដោយសារដាច់សរសៃឈាមខួរក្បាល។ លោកជាប្រធានាធិបតីសិង្ហបុរីទី ៦ ហើយក៏ជាប្រធានាធិបតីដែលកាន់តំណែងយូរជាងគេដែរ (១៩៩៩ ដល់ ២០១១)។ នេះបើយោងតាមសារព័ត៌មាន Channel News Asia។
ការិយាល័យនាយករដ្ឋមន្ត្រីសិង្ហបុរីបានចេញសេចក្តីប្រកាសព័ត៌មានថា អតីតប្រធានាធិបតីសិង្ហបុរី និងជាប្រធានាធិបតីកាន់តំណែងយូរជាងគេលោក S R Nathan បានទទួលមរណភាពក្នុងវ័យ ៩២ ឆ្នាំ ដោយសារដាច់សរសៃឈាមក្នុងខួរក្បាល។ តាមពិតទៅលោកស្ថិតក្នុងស្ថានភាពដុនដាបខ្លាំងដោយស្ថិតក្រោមការព្យាបាលនៅមន្ទីរពេទ្យរយៈពេលប៉ុន្មានសប្តាហ៍ចុងក្រោយនេះ ក្រោយពេលដែលលោករងគ្រោះថ្នាក់ដោយសារការដាច់សរសៃឈាមក្នុងខួរក្បាលថ្ងៃ ៣១ ខែកក្កដាមកនោះ។
សេចក្តីថ្លែងការណ៍ដដែលនោះបានបន្តថា នាយករដ្ឋមន្ត្រី និងបណ្តាសមាជិកគណរដ្ឋមន្ត្រីទាំងអស់មានទុក្ខយ៉ាងក្រៀមក្រំដោយសារបាត់បង់លោក S R Nathan និងចូលរួមរម្លែកទុក្ខជាមួយក្រុមគ្រួសារលោកផងដែរ។ ការរៀបចំបុណ្យសព និងការគោរពវិញ្ញាណក្ខ័ន្ធលោក S R Nathan សម្រាប់សាធារណជនសិង្ហបុរី នឹងត្រូវប្រកាសនៅពេលបន្តបន្ទាប់ទៀត។
តាមពិតទៅលោក S R Nathan ជាប្រធានាធិបតីទី ៦ និងជាប្រធានាធិបតីកាន់តំណែងយូរបំផុតរបស់សិង្ហបុរីផងដែរ។ លោកឡើងកាន់តំណែងនៅឆ្នាំ ១៩៩៩ ហើយលោកបានសម្រេចចិត្តចុះចេញពីតំណែងនៅឆ្នាំ ២០១១ ហើយប្រកាសថាលោកមិនឈរឈ្មោះសម្រាប់អាណត្តិថ្មីឡើយ។ ចំណែកអ្នកដែលបន្តតំណែងរបស់លោក គឺប្រធានាធិបតី Tony Tan Keng Yam។
មុនក្លាយជាប្រធានាធិបតី លោក SR Nathan បានកាន់កាប់តំណែងជាច្រើនក្នុងក្របខណ្ឌមន្ត្រីរាជការស៊ីវិល, ខាងផ្នែកសន្តិសុខ, ចារកម្ម និងការបរទេសផងដែរ។ នៅក្នុងឆ្នាំ ១៩៨៨ លោកត្រូវបានគេតែងតាំងឲ្យបំពេញភារកិច្ចជាឧត្តមស្នងការសិង្ហបុរីប្រចាំប្រទេសម៉ាឡេស៊ី ហើយបន្តមកលោកក៏ក្លាយជាឯកអគ្គរដ្ឋទូតសិង្ហបុរីប្រចាំសហរដ្ឋអាមេរិកពីឆ្នាំ ១៩៩០ ដល់ឆ្នាំ ១៩៩៦៕
© រក្សាសិទ្ធិដោយ thmeythmey.com