ម៉ាឡេស៊ី ប្រកាសត្រៀមបញ្ជូនយន្តហោះពីរគ្រឿងដើម្បីជួយពន្លត់ភ្លើងឆេះព្រៃឥណ្ឌូនេស៊ី

អន្តរជាតិ

នយោបាយអន្តរជាតិ

ម៉ាឡេស៊ី ប្រកាសត្រៀមបញ្ជូនយន្តហោះពីរគ្រឿងដើម្បីជួយពន្លត់ភ្លើងឆេះព្រៃឥណ្ឌូនេស៊ី

26, Aug 2016 , 4:35 pm

រូបភាព

យន្តហោះពន្លត់ភ្លើងឆេះព្រៃឥណ្ឌូនេស៊ី ។ រូបថត Xinhua

ដោយ:

បើទោះបីជាមានច្បាប់ និងការរិះគន់ខ្លាំងប៉ុណ្ណាក៏ដោយ បញ្ហាភ្លើងឆេះព្រៃដែលបង្កឲ្យមានអព្ទ័ពាសពេញលំហអាកាសរបស់ឥណ្ឌូនេស៊ី នៅតែបន្តកើតមាន ជាពិសេសនោះ នៅអំឡុងចុងឆ្នាំ។ ខណៈរដូវកាលមហន្តរាយកើតចេញពីការបង្កដោយមនុស្សដែលមិនអាចហាមឃាត់បាននោះ កាន់តែខិតជិតមកដល់ ម៉ាឡេស៊ី បានប្រកាសនឹងជួយឥណ្ឌូនេស៊ី ដែលអ្នកជិតខាង ក៏ដូចជាមិត្តអាស៊ាន ដើម្បីជួយដោះស្រាយនិងទប់ស្កាត់បញ្ហានេះ។

ស្តាប់សំឡេង

រដ្ឋមន្ត្រីទទួលបន្ទុកការិយាល័យនាយករដ្ឋមន្ត្រីម៉ាឡេស៊ី លោក Shahidan Kassim នៅថ្ងៃទី២៦ ខែសីហានេះ បានអះអាងថា យន្តហោះសង្គ្រោះប្រភេទ CL415 ដែលអាចផ្ទុកទឹកបានរហូតដល់៦០០០លីត បានត្រៀមលក្ខណៈរួចរាល់ហើយដើម្បីសហការ និងជួយឥណ្ឌូនេស៊ី នៅពេលមានសំណើផ្លូវការពីក្រុងហ្សាការតា។ ការលើកឡើងបែបនេះ ធ្វើឡើងខណៈពេលដែលការឡើងកម្តៅ បាននិងកំពុងតែចាប់ផ្តើមនៅភាគខាងត្បូងខេត្តស៊ូម៉ាត្រា និង កាលីម៉ាន់តាន់ នៃប្រទេសឥណ្ឌូនេស៊ី។

លោករដ្ឋមន្ត្រីរូបនោះ បានសង្កត់ធ្ងន់ថា «យើងបានត្រៀមរួចស្រេចហើយដើម្បីជួយឥណ្ឌូនេស៊ី។ ប៉ុន្តែ មិនទាន់មានសំណើផ្លូវការនៅឡើយនោះទេ។» នេះបើយោងតាមសារព័ត៌មាន Channel News Asia ដែលបានបន្ថែមដែរថា លោករដ្ឋមន្ត្រីថា ម៉ាឡេស៊ី ត្រូវតែជួយប្រទេសជិតខាងរបស់ខ្លួន។

សូមជម្រាបផងដែរថា ភ្លើងឆេះព្រៃ និង អព្ទ័ មិនមែនទើបតែកើតឡើងនោះទេ ពោលគឺបញ្ហានេះ បានចាប់ផ្តើមតាំងពីឆ្នាំ១៩៩៧មកម្ល៉េះ។ បញ្ហានេះ បានមិនត្រឹមតែប៉ះពាល់ដល់សុខភាពប្រជាជនប៉ុណ្ណោះទេ តែវាថែមទាំងប៉ះពាល់ដល់សេដ្ឋកិច្ចរដ្ឋអាស៊ានមួយចំនួន ដ្បិតក្រុមហ៊ុន សាលារៀន និង កិច្ចការពាណិជ្ជកម្មផ្សេងៗមិនអាចដំណើរការបានដោយសារមានកម្រិតអព្ទ័ក្រាស់ពេក។

កាលពីចុងឆ្នាំ២០១៥កន្លងទៅ មានភ្លើងឆេះព្រៃយ៉ាងសន្ធោសន្ធៅនៅឥណ្ឌាដែលហេតុផលមួយចំនួន ត្រូវបានរកឃើញថាបណ្តាលមកពីការដុតព្រៃ និងធ្វើអាជីវកម្មខុសច្បាប់។ ភ្លើងឆេះនោះ បានអូសបន្លាយអស់រយៈពេលជាងមួយខែដោយបានធ្វើឲ្យអ័ព្ទនៃការឆេះនោះអណ្តែតពាសពេញលំហនៅក្នុង ប្រទេសឥណ្ឌូនេស៊ី ម៉ាឡេស៊ី និងសិង្ហបុរី។

អ្វីគួរកត់សម្គាល់នោះ ការដុតព្រៃ ដែលបង្កឲ្យមានអព្ទ័ ភាគច្រើនផ្តើមចេញពីខេត្តពីរដែលរដ្ឋាភិបាលឥណ្ឌូនេស៊ី បានធ្វើ សម្បទានទៅឲ្យក្រុមហ៊ុនរួមមានខេត្តស៊ូម៉ាត្រា និង កាលីម៉ាន់តាន់។ កន្លងមក រដ្ឋាភិបាលឥណ្ឌូនេស៊ី បានពិន័យក្រុមហ៊ុនទាំងនោះ តែប្រឈមនឹងបញ្ហាមួយចំនួន ដ្បិត អ្នកបង្កហេតុការណ៍ ជាសែស្រឡាយរដ្ឋាភិបាលដែលបានចាក់ឬសជាយូរ និងមួយចំនួន គឺពាណិជ្ជករបរទេសដូចជាសិង្ហបុរី និង ម៉ាឡេស៊ី។

នៅឆ្នាំ២០១៤ សភាឥណ្ឌូនេស៊ី ក៏បានផ្តល់សច្ចាប័នទៅលើកិច្ចព្រមព្រៀងស្តីការបំពុលអព្ទ័ ឆ្លងដែនរបស់អាស៊ាន ដើម្បីជាការទទួលខុសត្រូវផងដែរ។ តែកិច្ចព្រមព្រៀងដែលបានចូលជាធរមានពីរឆ្នាំហើយនោះ ហាក់ដូចជាមិនមានប្រសិទ្ធភាពអ្វីសោះលើបញ្ហានេះ។ កន្លងមក ស្ទើរតែគ្រប់អាណត្តិនៃរដ្ឋាភិបាលឥណ្ឌូនេស៊ី បានសុំការ អភ័យទោសទៅកាន់រដ្ឋាភិបាលសិង្ហបុរី និង ម៉ាឡេស៊ី ចំពោះបញ្ហាអព្ទ័នេះ៕