អន្តរជាតិ
ប៉ូលិស ប្រេស៊ីលត្រៀមឯកសារចោទអតីតប្រធានាធិបតីរឿងពុករលួយ អតីតប្រធានាធិបតីប្រេស៊ីល លោក Luiz Inacio Lula da Silva និងភរិយា Marisa Leticia នាពិធីមួយកាលពីឆ្នាំ២០០៧។ រូបថត Reuters
× ប៉ូលិសសហព័ន្ធប្រេស៊ីលកំពុងស្វះស្វែងជំរុញឲ្យរដ្ឋអាជ្ញាចោទប្រកាន់អតីតប្រធានាធិបតី Luiz Inacio Lula da Silva និង ភរិយាពាក់ព័ន្ធសំណុំរឿងពុករលួយ ដោយទទួលបានលុយសំណូកជាង ៧សែនដុល្លារពីក្រុមហ៊ុនសំណង់។ តែមេធាវីការពារអតីតមេដឹកនាំនេះ អះអាងថា ការចោទប្រកាន់របស់ប៉ូលិសមិនមានមូលដ្ឋានច្បាស់លាស់ឡើយ។
អតីតប្រធានាធិបតីប្រេស៊ីល Luiz Inacio Lula da Silva នឹងត្រូវប្រឈមមុខជាមួយនឹងការចោទប្រកាន់ពីស្ថាប័នតុលាការជុំវិញសំណុំរឿងពុករលួយ ស្របពេលដែលស្ថាប័នប៉ូលិសសហព័ន្ធកំពុងខ្នះខ្នែងស្នើឲ្យរដ្ឋអាជ្ញាប្រេស៊ីលសម្រេចចោទប្រកាន់លើអ្នកនយោបាយរូបនេះជាផ្លូវការ។
បើតាមទីភ្នាក់ងារព័ត៌មាន Reuters ប៉ូលិសស្នើឲ្យមានការចោទប្រកាន់លើ លោក Luiz Inacio Lula da Silva និងភរិយាលោក ហើយការចោទប្រកាន់នេះធ្វើឡើងក្រោមក្របខណ្ឌនៃការស៊ើបអង្កេតសំណុំរឿងពុករលួយនៅក្រុមហ៊ុនប្រេងរដ្ឋ Petroleo Brasileiro SAកន្លងមក។
សំណុំរឿងលោក Luiz Inacio Lula da Silva និង ភរិយាលោក វាពាក់ព័ន្ធទៅការទិញនិងកែលម្អអាផាតមិន មួយកន្លែងនៅរមនីយដ្ឋានតំបន់ឆ្នេរ Guaruja ដែលស្ថិតនៅចម្ងាយប្រហែល៦០គីឡូម៉ែត្រ ពីក្រុង Sao Polo ។ ខាងប៉ូលិសសហព័ន្ធបានអះអាងថា លោក Luiz Inacio Lula da Silva និងភរិយាបានទទួលផលប្រយោជន៍ជាលុយសុទ្ធចំនួន ៧៤៧,៨៩៦ ដុល្លារអាមេរិកឯណោះពីក្រុមហ៊ុនសាងសង់ OAS។
តែ ក្រុមមេធាវីការពារលោក Luiz Inacio Lula da Silva និងភរិយា បានអះអាងថា ការចោទប្រកាន់របស់ស្ថាប័នប៉ូលិសសហព័ន្ធមកលើអ្នកទាំងពីរមិនមានអំណះអំណាងនិងមូលដ្ឋានត្រឹមត្រូវឡើយ តែវាជាប់ពាក់ព័ន្ធបញ្ហានយោបាយប៉ុណ្ណោះ។ ពួកគេបានអះអាងថា អាផាតមិនខាងលើត្រូវបានចុះបញ្ជីដោយមានឈ្មោះក្រុមហ៊ុនសំណង់ OAS ហើយលោក Luiz Inacio Lula da Silva បានទៅពិនិត្យមើលម្តង។ លោកនិងភរិយាកាលនោះគ្រាន់តែចង់ទិញអាផាតមិនខាងលើប៉ុណ្ណោះ។
យ៉ាងណាក៏ដោយចុះ ទៅមានការចោទប្រកាន់ពីសំណាក់ប៉ូលិសក៏ដោយ ខាងរដ្ឋអាជ្ញាឯណោះទេជាអ្នកសម្រេចថា ត្រូវចោទប្រកាន់លើអ្នកទាំងពីរឬអត់។ ប៉ុន្តែខាងសារព័ត៌មានមិនអាចសុំការបំភ្លឺពីខាងរដ្ឋអាជ្ញាសហព័ន្ធថា តើនឹងមានការចោទប្រកាន់អតីតប្រធានាធិបតីនិងភរិយាក្នុងពេលឆាប់ៗឬអត់នោះ។
តាមពិតទៅ ប្រេស៊ីលកំពុងតែប្រឈមបញ្ហាចម្រូងចម្រាសជាពិសេសការចោទប្រកាន់អ្នកនយោបាយជាពិសេសមេដឹកនាំកំពូលរឿងពុករលួយ។ ដូចឃើញស្រាប់ លោកស្រីប្រធានាធិបតី Dilma Rousseff ត្រូវគេព្យួរតំណែងបណ្តោះអាសន្ន ដោយសាររងការចោទប្រកាន់រឿងពុករលួយ។ ហើយកាលពីសប្តាហ៍មុន តុលាការកំពូលបានសម្រេចអនុញ្ញាតឲ្យមានការបើកការស៊ើបអង្កេតមួយពាក់ព័ន្ធការសហការរវាងលោកស្រី Dilma Rousseff និងលោក Luiz Inacio Lula da Silva ក្នុងការបង្កឲ្យមានការរាំងស្ទះដល់ការស៊ើបអង្កេតរឿងពុករលួយក្រុមហ៊ុនប្រេង Petrobras៕
Tag:
Luiz Inacio Lula da Silva
Dilma Rousseff
ពុករលួយ
© រក្សាសិទ្ធិដោយ thmeythmey.com