ជាតិ
សម្ដេច ហ៊ុន សែន សម្រេចឲ្យសិស្សនិទ្ទេស A,B,C ប្រឡងគ្រូដែរ ដើម្បីផ្ដល់យុត្តិធម៌ដល់និទ្ទេស D,E
× ភ្នំពេញ៖ សម្ដេចនាយករដ្ឋមន្ត្រី ហ៊ុន សែន បានប្រកាសថា សិស្សប្រឡងជាប់និទ្ទេស A,B,C នៅឆ្នាំនេះត្រូវប្រឡងចូលក្របខណ្ឌគ្រូបង្រៀន ដូចសិស្សជាប់បាក់ឌុបនិទ្ទេស D និង E ដទៃទៀតដែរ ពោលគឺមិនអាចផ្ដល់អាទិភាពឲ្យបេក្ខជននិទ្ទេស Aដល់C ទាំងនេះ ជាប់ក្របខណ្ឌគ្រូបង្រៀន ដោយស្វ័យប្រវត្តិឡើយ។ ការប្រកាសរបស់ប្រមុខរដ្ឋាភិបាលបែបនេះ ក្រោយពីពិនិត្យឃើញថា សិស្សប្រឡងជាប់និទ្ទេស A,B,C នៅឆ្នាំនេះ មានចំនួនច្រើនជាងឆ្នាំមុន ដែលបរិមាណនេះហួសការកំណត់ក្របខណ្ឌគ្រូបង្រៀន ដែលរដ្ឋាភិបាលកំណត់មួយឆ្នាំ ចំនួនតែ៣ពាន់នាក់ប៉ុណ្ណោះ។
លោកនាយករដ្ឋមន្ត្រី ហ៊ុន សែន បញ្ជាក់ថា មូលហេតុដែលលោកសម្រេចឲ្យបេក្ខជន Aដល់C ប្រឡងគ្រូដែរនោះ គឹដើម្បីផ្ដល់ភាពយុត្តិធម៌ក្នុងសង្គម សម្រាប់សិស្សដែលប្រឡងជាប់និទ្ទេស D និង E ដោយសម្ដេច ផ្ដាំសិស្សជាប់និទ្ទេសល្អទាំងនេះថា «តាំងខ្លួនជាអ្នកខ្លាំងហើយ មិនខ្លាចប្រឡងទេ»។
ថ្លែងក្នុងពិធីសំណេះសំណាលជាមួយសិស្សជាប់និទ្ទេសA ៤០៥នាក់ព្រឹកនេះសម្ដេច ហ៊ុន សែន បានបញ្ជាក់ថា «ឆ្នាំទៅមានករណីសម្រេចពិសេសមួយ ដោយឲ្យសិស្សជាប់និទ្ទេស A,B,C ជាប់ជាស្វ័យប្រវត្តិធ្វើគ្រូ១២០០។ ប៉ុន្តែឥឡូវនេះបើសិនជាបើកករណីដូចគ្នា គ្រោះថា្នក់ហើយ។ច្រើនជាង ព្រោះឆ្នាំទៅចំនួនវាតិច។ ឥឡូវបើយើងគិតណាស់គ្រូមួយឆ្នាំឲ្យក្របខណ្ឌតែ៣ពាន់នាក់ទេ ប៉ុន្តែសិស្សយើងដែលបានជាប់ គ្រាន់តែនិទ្ទេសB នេះ មាន២៨០០នាក់ហើយ C មាន៥៥៩៥នាក់ ដូច្នេះបញ្ហានៅទីនេះ។តាំងខ្លួនជាខ្លាំងហើយ មិនខ្លាចប្រឡងទេ។ ប្រឡងទើបវាយុត្តិធម៌ … ដើម្បីភាពយុត្តិធម៌ការប្រឡងគ្រូត្រូវតែប្រឡង ទោះបីជាប់និទ្ទេសណាក៏ដោយ»។
បើតាមប្រមុខរដ្ឋាភិបាល ដើម្បីធានាគុណភាពគ្រូបង្រៀននៅកម្ពុជានោះ លុះត្រាតែមានការប្រឡងពីសិស្សគ្រប់និទ្ទេសទាំងអស់ ក្នុងការទទួលបានកៅអីគ្រូបង្រៀន ក្នុងក្របខណ្ឌគ្រូចំនួន៣ពាន់នាក់នេះ។
បេក្ខជនប្រឡង ជាប់សញ្ញាបត្រទុតិយសភូមិ (បាក់ឌុប) នៅឆ្នាំនេះ មានចំនួន ៥៥ ៧៥៣នាក់ ត្រូវជា ៦២,១៨% នៃបេក្ខជនវត្តមានចំនួន ៨៩ ៦៦១នាក់ ។ បេក្ខជនទទួលបាននិទ្ទេស A មានចំនួន ៤០៥ នាក់ ក្នុងចំណោមបេក្ខជនប្រឡងជាប់បាក់ឌុបឆ្នាំនេះ។ រីឯ បេក្ខជនជាប់និទ្ទេស B មានចំនួន ២ ៨០១, និទ្ទេស C មានចំនួន ៥ ៥៩៥ នាក់, និទ្ទេស D មានចំនួន ៨ ៨៣៥ នាក់ និងនិទ្ទេស E មានចំនួន ៣៨ ១១៧ នាក់។
គួរជម្រាបផងដែរ កាលពីដំណើរការរឹតបន្តឹងការប្រឡងលើកទី១ ក្នុងឆ្នាំ២០១៤ បេក្ខជនជាប់បាក់ឌុបទូទាំងប្រទេសក្នុងការប្រឡងទាំងពីរលើកមានចំនួន ជាង ៣ម៉ឺននាក់ក្នុងចំណោមបេក្ខជនប្រឡងសរុបជាង ៧ម៉ឺននាក់ក្នុងនោះ បេក្ខជនជាប់និទ្ទេសមាន A ចំនួន ១១ នាក់។ រីឯ លទ្ធផលបាក់ឌុបឆ្នាំ ២០១៥បេក្ខជនប្រឡងជាប់មានចំនួន ៤៦ ៥៦០ នាក់ស្មើនឹង ៥៥,៨៨ ភាគរយចំណោមបេក្ខជនមានវត្តមានក្នុងការប្រឡងសរុប ៨៣ ៣២៥ នាក់ ក្នុងនោះ បេក្ខជនជាប់និទ្ទេស A មានដល់ទៅ ១០៨ នាក់៕
Tag:
ហ៊ុន សែន
និទ្ទេសA
អប់រំ
© រក្សាសិទ្ធិដោយ thmeythmey.com