កំណាព្យបទពាក្យ៨
ថ្ងៃសម្រាកភ្ជុំគួរជុំទីណា
ទៅលេងយាយតាឬម៉ែពុក
រៀបplanឲ្យហើយកុំកើតទុក្ខ
ធ្វើការវិលមុខច្រើនខែហើយ។
ចង់ទៅសមុទ្រឬតំបន់ភ្នំ
មានពេលជួបជុំមិនច្រើនឡើយ
គួរណាត់គ្នាមុនកុំកន្តើយ
គិតមុនឲ្យហើយកុំឡើយខ្វល់ខ្វាយ។
ចង់មើលសមុទ្រទៅកំពតកែប
កំពង់សោមអែបកោះកុងសប្បាយ
ទៅត្រឹមតាកែវតាម៉ៅមិនឆ្ងាយ
ឬអាចសប្បាយត្រឹមអំពែភ្នំ។
ចូលតេទឹកពុះហួសឡើងបូកគោ
ស្រូបខ្យល់ជំនោរនៅគិរីរម្យ
ទៅភ្នំសន្ទុកស្រុកកំពង់ធំ
ឬអាចទៅជុំជួបនៅសៀមរាប។
ទស្សនាប្រាសាទស្អាតល្បីសុសសាយ
បានសុខសប្បាយរកស៊ីមានលាភ
ទៅព្រះវិហារឡើងភ្នំមិនទាប
ស្រុកសន្តិភាពទៅណាក៏បាន។
អាងកំពីងពួយនៅបាត់ដំបង
ប៉ៃលិនងាយឆ្លងផ្លូវស្រួលជិះឡាន
បន្ទាយមានជ័យមិនយូរប៉ុន្មាន
អាចលេងកម្សាន្តអាងត្រពាំងថ្ម។
កង្រីស្មោះស្នេហ៍នៅថែក្អមឆ្នាំង
ល្បីវាយបារាំងរហូតរាប់ត
ទៅលេងពោធិ៍សាត់ល្បីចម្លាក់ថ្ម
កែវដ៏បរវរល្អមិនអាចថ្លែង។
ក្រចេះមានផ្សោតគេកោតសរសើរ
បន្តដំណើរទៀតដល់ស្ទឹងត្រែង
ទឹកដីទល់ដែនទីអស់ចម្បែង
បកក្រោយផ្លូវកែវរតនគិរី។
មើលបឹងយក្សឡោមចោមដោយព្រឹក្សា
ផ្ទៃទឹកចាំងថ្លាល្បីគ្រប់ទិសទី
ទៅលេងប៊ូស្រាមណ្ឌលគិរី
មានភ្នំជុំទីសមុទ្ររុក្ខា។
បកក្រោយត្បូងឃ្មុំជុំកំពង់ចាម
ទឹកដីជាប់ស្នាមប្រវត្តិស្នេហា
បាភ្នំព្រៃវែងទុំអ្នកធម៌អាថ៌
មិនដឹងទៅណាស្វាយរៀងក៏បាន៕