អន្តរជាតិ
ចិន ព្យាយាមលាក់លៀមរបៀបវារៈដំណើរទស្សនកិច្ចមេដឹកនាំហ្វីលីពីន ខណៈលោក Duterte បន្តបញ្ចេញឲ្យគេដឹង លោកប្រធានាធិបតីហ្វីលីពីន ក្នុងពេលផ្តល់កិច្ចសម្ភាសន៍ជាមួយនឹងភ្នាក់ងារព័ត៌មានរដ្ឋចិន Xinhua
× លោកប្រធានាធិបតីហ្វីលីពីន Rodrigo Duterte ចាប់ផ្តើមដំណើរទស្សនកិច្ចផ្លូវរដ្ឋជាលើកដំបូងរយៈពេល៤ថ្ងៃទៅកាន់ចិននៅថ្ងៃនេះហើយ។ កិច្ចព្រមព្រៀងពាណិជ្ជកម្មជាច្រើន ត្រូវបានរដ្ឋាភិបាលក្រុងម៉ានីល រំពឹងថា នឹងត្រូវបានចុះហត្ថលេខាតាមរយៈដំណើរទស្សនកិច្ចរបស់លោកប្រធានាធិបតីទៅកាន់ចិន ដែលជាផ្នែកមួយនៃរបត់នយោបាយងាកចេញពីសម្ព័ន្ធមិត្តអាមេរិក។ បញ្ហាសមុទ្រចិនខាងត្បូង ក៏នឹងក្លាយជារបៀបវារៈមួយផងដែរ។
បើតាមសេចក្តីប្រកាសព្រមានរបស់ក្រសួងការបរទសចិន លោកប្រធានាធិបតី រ៉ូឌ្រីហ្គូ ឌើទើតេ នឹងបំពេញទស្សនកិច្ចទៅកាន់ចិនរយៈពេលបួនថ្ងៃ ដែលនឹងចាប់ផ្តើមពីថ្ងៃទី១៨ដល់ថ្ងៃទី២១ខែតុលានេះ។ ដំណើរទស្សនកិច្ចនេះ គឺជាការឆ្លើយតបនឹងការអញ្ជើញរបស់លោកប្រធានាធិបតីចិន ស៊ី ជិនពីង ដែលប្រមុខរដ្ឋទាំងពីរ ក៏នឹងជួបពិភាក្សាគ្នាជាលើកដំបូងក្នុងនាមជាប្រមុខរដ្ឋដើម្បីផ្តោះប្តូរយោបល់គ្នា។
ក្នុងសន្និសីតសារព័ត៌មានប្រចាំថ្ងៃនៅថ្ងៃទី១៧ ខែតុលាម្សិលមិញនេះ លោកស្រី Hua Chunying បានឲ្យដឹងថា លោក ស៊ី ជិនពីង នឹងជជែកជាមួយនឹងលោក រ៉ូឌ្រីហ្គូ ឌើទើតេ ដើម្បីផ្តោះប្តូរយោបល់ក្នុងទិសដៅអភិវឌ្ឍ និងធ្វើឲ្យទំនាក់ទំនងទ្វេភាគីប្រទេសទាំងពីរកាន់តែល្អប្រសើរ និងជាពិសេសនោះដើម្បីធ្វើឲ្យកិច្ចសហប្រតិបត្តិការប្រទេសទាំងពីរកាន់តែទុកចិត្តគ្នាលើបញ្ហាអន្តរជាតិ និងតំបន់ដែលជាបញ្ហារួមគ្នានោះ។
លោកស្រីអ្នកនាំពាក្យរូបនោះ ក៏បានបន្ថែមដែរថា លោកប្រធានាធិបតីហ្វីលីពីន នឹងជួបជាមួយនឹងលោកនាយករដ្ឋមន្ត្រីចិន លី ឃឺឈាង និងមន្ត្រីជាន់ខ្ពស់ចិនមួយចំនួនផ្សេងទៀតផងដែរ។
អ្នកនាំពាក្យក្រសួងការបរទេសចិន លោកស្រី Hua Chunying
ទស្សនកិច្ចរបស់លោកប្រធានាធិបតីហ្វីលីពីនរូបនេះដែរ ត្រូវបានមើលឃើញថាជាដំណើរទស្សនកិច្ចប្រវត្តិសាស្ត្រមួយហើយរបស់លោក ដ្បិត ហ្វីលីពីន នៅរយៈពេលប៉ុន្មានឆ្នាំចុងក្រោយនេះ បានមានភាពល្អក់កករជាមួយនឹងច្រើនដោយសារតែបញ្ហាអធិបតេយ្យសមុទ្រចិនខាងត្បូងនោះ។ តែលោកប្រធានាធិបតី បានជ្រើសរើសយកចិនជាប្រទេសទីមួយក្នុងដំណើរទស្សនកិច្ចក្រៅតំបន់អាស៊ាននោះ។ គិតពីឡើងកាន់តំណែងជាប្រធានាធិបតីហ្វីលីពីនជាផ្លូវការមក លោក ទើបតែបានបំពេញទស្សនកិច្ចតែក្នុងប្រទេសតំបន់អាស៊ានប៉ុណ្ណោះ។
អ្វីគួរកត់សម្គាល់នោះ គិតចាប់ពីដំណើរទស្សនកិច្ចរបស់ប្រមុខរដ្ឋហ្វីលីពីនទៅកាន់ចិន ត្រូវបានផ្សព្វផ្សាយនោះ ក្រសួងការបរទេសចិនដែលជាម្ចាស់ផ្ទះ មិនដែលបង្ហាញពីរវាងរបៀបវារៈលម្អិតអ្វីឡើយ ក្រៅពីរបៀបវារៈទូទៅនោះ។ ជាក់ស្តែងនោះក្នុងសន្និសីទសារព័ត៌មានស្ទើរតែរៀងរាល់ថ្ងៃរបស់ក្រសួងការបរទសចិន អ្នកសារព័ត៌មាន តែងតែសួរសំណួរដដែលៗ ដោយចង់ឲ្យក្រសួងបង្ហាញពីរបៀបវារៈលម្អិតនៃដំណើរទស្សនកិច្ចនោះ តែក្រសួង មិនបានបង្ហើបអ្វីច្រើនឡើយ ដោយគ្រាន់តែបញ្ជាក់ថា ភាគីទាំងពីរ កំពុងតែបន្តទាក់ទង និងធ្វើការជាមួយនឹងគ្នានោះ។
បើទោះបីជាភាគីចិនហាក់ដូចជាព្យាយាមលាក់បាំងពីរបៀបវារៈសំខាន់នៃដំណើរទស្សនកិច្ចមេដឹកនាំហ្វីលីពីនទៅកាន់ចិនក៏ដោយ គេនៅតែអាចដឹងថា។ ហើយនោះ ក៏ព្រោះ ហ្វីលីពីន បានបន្តបង្ហើបជាបន្តបន្ទាប់តាមរយៈទាំងកិច្ចសម្ភាសន៍ និងសេចក្តីថ្លែងការណ៍ផ្លូវការរបស់លោកប្រធានាធិបតីហ្វីលីពីនតែម្តង។
ក្នុងកិច្ចសម្ភាសន៍ជាមួយនឹងសារព័ត៌មានរដ្ឋចិន Xinhua ដែលបានចុះផ្សាយនៅថ្ងៃទី១៧ ខែតុលា លោកប្រធានាធិបតី Rodrigo Duterte បានសរសើរពីចិន ដោយ លោក ក៏រំពឹងខ្ពស់ដែលថា តាមរយៈដំណើរទស្សនកិច្ចរបស់លោក នឹងធ្វើឲ្យទំនាក់ទំនងរវាងប្រទេសទាំងពីរកាន់តែជិតស្និទ្ធ ជាពិសេសនោះ លើកិច្ចសហប្រតិបត្តិការពាណិជ្ជកម្ម និងសេដ្ឋកិច្ចតែម្តង។ លោកប្រធានាធិបតី ថែមទាំងហ៊ាននិយាយថា លោក នឹងសិក្សាពីភាពជោគជ័យរបស់ចិននៅក្នុងវិស័យសេដ្ឋកិច្ច និងពាណិជ្ជកម្ម ជាពិសេសនោះ ក្នុងពេលដែលពិភពលោកជួយវិបត្តិសេដ្ឋកិច្ចតែម្តង។
ក្រៅពីផលប្រយោជន៍សេដ្ឋកិច្ច ប្រធានាធិបតីហ្វីលីពីន ក៏មិនលាក់លៀមក្នុងការនិយាយពីបញ្ហារសើបរវាងប្រទេសទាំងពីរ ដូចភាគីចិនឡើយ។ លោក បានបង្ហើបតាមរយៈកិច្ចសម្ភាសន៍នោះពីបញ្ហាសមុទ្រចិនខាងត្បូង ដោយលោក អះអាងថា លោក មិនចង់មានការប្រឈមមុខជាមួយនឹងចិនឡើយ ពោលគឺ លោក នឹងចរចាជាមួយនឹងចិន។ លោក សង្កត់ធ្ងន់ថា «វា មិនមានប្រយោជន៍អ្វីឡើយ ដែលត្រូវធ្វើសង្គ្រាមដើម្បីយកដែនទឹកនោះ។ វា គឺជារឿងដែលល្អប្រសើរ ក្នុងការចរចាជាជាងបង្កើតសង្គ្រាមនោះ»។
តាមពិតទៅ មុនពេលនៃការផ្តល់កិច្ចសម្ភាសន៍នេះ លោកប្រធានាធិបតីហ្វីលីពីន ដែលមានរហ័សនាមថា ជា«អ្នកដាក់ទណ្ឌកម្ម» ក៏ធ្លាប់ឲ្យដឹងពីរបៀបវារៈរបស់លោកដែលពាក់ព័ន្ធនឹងបញ្ហាសមុទ្រចិនខាងត្បូងក្នុងដំណើរទស្សនកិច្ចនេះដែរ។ លោក Duterte បានបញ្ជាក់ដែរថា លោក នឹងស្នើឲ្យចិនអនុញ្ញាតឲ្យអ្នកនេសាទហ្វីលីពីនអាចបន្តសកម្មភាពនេសាទតាមបែបប្រពៃណីរបស់ពួកគេឡើងវិញនៅក្នុងនៅក្នុងតំបន់កោះ Scarborough។
អ្នកនេសាទហ្វីលីពីន មិនត្រូវអនុញ្ញាតឲ្យចូលទៅនេសាទនៅតំបន់ Scarborough ឡើយ ដ្បិតចិន បានហាមឃាត់ ក្រោយពីតុលាការ បានប្រកាសសាលក្រមនៅថ្ងៃទី១២ ខែកក្កដាកន្លងទៅ ថា ចិន បានបំពាននៅក្នុងតំបន់នោះ ខណៈ អះអាងថា ហ្វីលីពីនមានសិទ្ធិនៅទីនោះ។ ហ្វីលីពីន និងចិន នៅឆ្នាំ២០១២ ក៏ធា្លប់មានភាពតានតឹងផ្នែកការទូតខ្លាំងជាមួយគ្នាដោយសារការទាមទារលើតំបន់ Scarborough ដែលចិន បាននិងកំពុងតែគ្រប់គ្រងហើយ។ ពេលនោះដែរ ចិន រហូតដល់ប្រកាសបិទទីផ្សារមិនឲ្យហ្វីលីពីន នាំចេញផលិតផលកសិកម្មទីកាន់ទីផ្សាររបស់ខ្លួនទៀតផង៕
Tag:
ហ្វីលីពីន
ចិន
អាស៊ាន
© រក្សាសិទ្ធិដោយ thmeythmey.com