ជាតិ
អាជ្ញាធរ ពង្រាយបង្គន់អនាម័យជាង៤០០ ពេលបុណ្យអុំទូក
× មន្ទីរសាធារណការ និងដឹកជញ្ជូនរាជធានីភ្នំពេញ នឹងដាក់ពង្រាយបង្គន់អនាម័យជាង៤០០ នៅទីតាំងមួយចំនួន នាឱកាសប្រារព្ធព្រះរាជពិធីបុណ្យអុំទូក។ ទីតាំងទាំងនោះមានដូចជា តំបន់ជុំវិញមាត់ទន្លេ សួនច្បារ និងទីតាំងសាធារណៈមួយចំនួនទៀត។ ជាមួយគ្នានោះ អាជ្ញាធររាជធានីភ្នំពេញ ក៏ត្រៀមរួចរាល់ផងដែរ កម្លាំងប្រចាំការបោសសម្អាត និងប្រមូលសំរាម ក្នុងអំឡុងពេលប្រារព្ធពិធីបុណ្យនេះ។
បង្គន់អនាម័យសរុបចំនួន៤២២ នឹងត្រូវដាក់ពង្រាយនៅតាមទីតាំងសំខាន់ៗមួយចំនួន នៅក្នុងពេលប្រារព្ធព្រះរាជពិធីបុណ្យអុំទូក បណ្តែតប្រទីប និងសំពះព្រះខែ អកអំបុក។ នេះបើតាមការចុះផ្សាយរបស់ទីភ្នាក់ងារសារព័ត៌មានកម្ពជា(AKP) ដែលបញ្ជាក់បន្តថា ការពង្រាយបង្គន់អនាម័យនេះ គឺដើម្បីសម្រួលដល់កីឡាករចំណុះទូក និងប្រជាពលរដ្ឋដែលដើរកម្សាន្តនៅក្នុងពិធីបុណ្យប្រពៃណីមួយនេះ។
AKP បានស្រង់សម្តីរបស់ លោក សាំ ពិសិដ្ឋ ប្រធានមន្ទីរសាធារណការ និងដឹកជញ្ជូនរាជធានីភ្នំពេញថា ទីតាំងសំខាន់ៗដែលត្រូវដាក់ពង្រាយ រួមមានតំបន់ជុំវិញមាត់ទន្លេទាំងត្រើយខាងលិច និងខាងកើត សួនច្បារសាធារណៈ និងទីតាំងសាធារណៈសំខាន់ៗមួយចំនួនទៀត។
លោក សាំ ពិសិដ្ឋ បន្តប្រាប់ AKP ទៀតថា បង្គន់អនាម័យដែលត្រៀមដាក់ពង្រាយនោះ មានបង្គន់ថ្មដែលមានស្រាប់ បង្គន់ចល័ត និងបង្គន់ជីកដីដែលដាក់ពង្រាយនៅសួននានា និងបង្គន់ជីករណ្តៅសម្រាប់កីឡាករអុំទូកនៅជ្រោយចង្វាត្រើយខាងកើត។ ជាមួយគ្នានោះ មន្ទីរសាធារណការ និងដឹកជញ្ជូនរាជធានីភ្នំពេញ ក៏នឹងតុបតែង ភ្លើងចម្រុះពណ៌នៅតាមដើមឈើ និងបង្គោលភ្លើងផងដែរ ដើម្បីលើកសោភ័ណភាពក្រុងភ្នំពេញ។
ទាក់ទងនឹងបញ្ហាសំរាមវិញ អាជ្ញាធរបានត្រៀមកម្លាំងប្រចាំការបោសសម្អាត និងប្រមូលសំរាមតាមសួនច្បារចំនួន២៩០នាក់ ដែលចាប់ផ្តើមបោសសម្អាតចាប់ពីម៉ោង១១យប់ ដល់ម៉ោង៨ព្រឹក។ នេះជាការបញ្ជាក់របស់លោក សំ សាមុត ប្រធានអង្គភាពសួនច្បារ និងរុក្ខជាតិរាជធានីភ្នំពេញ។ លោកបន្តទៀតថា អង្គភាពរបស់លោក បានត្រៀមកម្មករសម្រាប់បោសសម្អាត ចំនួន១៧៧នាក់ រថយន្ត៧គ្រឿង កម្មករសម្អាតបង្គន់៣០នាក់ និងសន្តិសុខសួន ចំនួន២០នាក់ផងដែរ។
ព្រះរាជពិធីបុណ្យអុំទូក បណ្តែតប្រទីប អកអំបុក និងសំពះព្រះខែ សម្រាប់ឆ្នាំ២០១៦នេះ នឹងប្រព្រឹត្តទៅ ពីថ្ងៃទី១៣-១៥ ខែវិច្ឆិកា៕
ប្រភព៖AKP
© រក្សាសិទ្ធិដោយ thmeythmey.com