ឥណ្ឌូណេស៊ីបារម្ភខ្លាំង ព្រោះប្រជាជនខ្លួនច្រើននាក់ត្រឡប់មកពីធ្វើសង្គ្រាមជីហាតនៅស៊ីរី

អន្តរជាតិ

ឥណ្ឌូណេស៊ីបារម្ភខ្លាំង ព្រោះប្រជាជនខ្លួនច្រើននាក់ត្រឡប់មកពីធ្វើសង្គ្រាមជីហាតនៅស៊ីរី

18, Oct 2016 , 5:12 pm

រូបភាព

ដោយ: ថ្មីៗ

ជនជាតិឥណ្ឌូណេស៊ីជាច្រើននាក់បានត្រឡប់មកពីប្រទេសស៊ីរីវិញក្រោយចូលរួមសកម្មភាពជាមួយក្រុមភេរវជនរដ្ឋឥស្លាម ដោយពួកគេមានបទពិសោធន៍និងសមត្ថភាពប្រយុទ្ធថែមទៀតផង។ មន្ត្រីប៉ូលិសឥណ្ឌូណេស៊ីបានអះអាងថា អាជ្ញាធរឥណ្ឌូនេស៊ីកំពុងព្យាយាមតាមដានយ៉ាងយកចិត្តទុកដាក់ចំពោះបញ្ហានេះ ព្រោះគេបារម្ភថា ប្រជាជនទាំងនេះនឹងសហការជាមួយក្រុមជ្រុលនិយមផ្សេងទៀតដើម្បីបើកការវាយប្រហារទ្រង់ទ្រាយធំ។

នគរបាលជាតិឥណ្ឌូណេស៊ី បានអះអាងថា ខ្លួនបានកំណត់មុខសញ្ញាជនជាតិឥណ្ឌូណេស៊ីជាច្រើននាក់ដែលទើបត្រឡប់មកពីស៊ីរីវិញក្រោយពេលពួកគេចូលរួមសកម្មភាពភេរវកម្មជាមួយក្រុមភេរវជនរដ្ឋឥស្លាម។

យោងតាមទីភ្នាក់ងារព័ត៌មាន Reuters ស្នងការប៉ូលិសឥណ្ឌូនេស៊ី Tito Karnavian បានអះអាងថា មនុស្សប្រហែលជា ៤០ នាក់បានត្រឡប់មកឥណ្ឌូនេស៊ីវិញ ដោយពួកគេសុទ្ធតែមានបទពិសោធន៍និងសមត្ថភាពប្រយុទ្ធ ក្រោយពួកគេចំណាយពេលច្បាំងក្នុងសង្គ្រាមជីហាតនៅស៊ីរី។ បើតាមមន្ត្រីនគរបាលនេះដដែល អាជ្ញាធរពាក់ព័ន្ធកំពុងតាមដានយ៉ាងយកចិត្តទុកចំពោះក្រុមនេះ ដោយសារឥណ្ឌូនេស៊ីបារម្ភខ្លាចថា ក្រុមទាំងអស់នេះនឹងបង្កើតទំនាក់ទំនងជាមួយក្រុមប្រដាប់អាវុធផ្សេងទៀតដើម្បីបើកការវាយប្រហារទ្រង់ទ្រាយធំពេលណាមួយ។

លោកបានថ្លែងថា៖« យើងកំពុងតាមដានយ៉ាងជិតស្និទ្ធចំពោះសកម្មភាពរបស់ពួកគេ ប៉ុន្តែ ពួកគេទាំងនោះក៏អាចគេចចេញពីការតាមដាននិងឃ្លាំមើលរបស់យើងដែរ។ យើងជឿជាក់ថា ពួកគេកំពុងរៀបចំទំនាក់ទំនងជាមួយក្រុមជ្រុលនិយមដទៃទៀតដោយសម្ងាត់»។

មន្ត្រីនគរបាលរូបនេះបានបន្តពន្យល់ផងដែរថា មកទល់ពេលនេះមនុស្សប្រហែល ១០នាក់ប៉ុណ្ណោះដែលត្រូវបានចាប់ខ្លួននិងស្ថិតក្រោមការឃុំឃាំង។ ចំណែកអ្នកផ្សេងទៀត អាជ្ញាធមិនទាន់មានភ័ស្តុតាងគ្រប់គ្រាន់ដើម្បីអះអាងថាពួកគេត្រៀមបើកការវាយប្រហារបង្កគ្រោះថ្នាក់ឡើយ។

លោក Tito Karnavian បារម្ភខ្លាំងពីការបន្តផ្សព្វផ្សាយមនោគមន៍វិជ្ជាជ្រុលនិយមនៅតាមអនឡាញ ហើយប្រជាជនឥណ្ឌូណេស៊ីជាច្រើនជាពិសេសក្មេងៗនឹងត្រូវពង្វក់ស្មារតីដោយសារមនោគមន៍វិជ្ជានេះដែរ។ វាអាចនឹងមានចលនាវាយប្រហារផ្សេងទៀត បើសិនជាគ្មានចំណាត់ការត្រឹមត្រូវនិងទាន់ពេលវេលាទេ។

ជារួម ឥណ្ឌូណេស៊ីជាប្រទេសមូស្លីមធំជាងគេលើពិភពលោក ដោយមានប្រជាជនសរុប ជាង ២៥០លាននាក់ឯណោះ។ ប្រជាជនស្ទើរតែទាំងស្រុងអនុវត្តនិងគោរពប្រតិបត្តិសាសនាឥស្លាម តែមានប្រជាជនមួយចំនួនជាជនជ្រុលនិយមផងដែរ។ បើយោងតាមអាជ្ញាធរ ក្រុមជ្រុលនិយមដែលគាំទ្រក្រុមភេរវជនរដ្ឋឥស្លាមនៅស៊ីរី និងអ៊ីរ៉ាក់ មានចំនួនរហូតដល់ ១២០០នាក់ឯណោះ ហើយអ្នកដែលឆ្លងដែនទៅច្បាំងនៅស៊ីរីមានរហូតដល់ជិត ៤០០នាក់ថែមទៀតផង។

សូមរំលឹកផងដែរថា ជាច្រើនឆ្នាំមកហើយឥណ្ឌូនេស៊ី រងគ្រោះដោយសារការវាយប្រហារភេរវកម្ម ហើយការវាយប្រហារទ្រង់ទ្រាយធំមួយកើតឡើងចុងក្រោយបំផុតនៅខែមករាកន្លងទៅ។ ការវាយប្រហារភេរវកម្មនេះបានធ្វើឲ្យមនុស្សស្លាប់ទាំងអស់ ៨នាក់ក្នុងនោះមានក្រុមគាំទ្ររដ្ឋឥស្លាមចំនួន ៤នាក់ផង។ កាលពីខែសីហា ក្មេងប្រុសម្នាក់វ័យ ១៦ ឆ្នាំ បានព្យាយាមបំផ្ទុះគ្រាប់បែកច្នៃខ្លួនឯង នៅក្នុវិហារគ្រិស្តមួយនៅក្រុង Medan ប៉ុន្តែគ្រាប់វាមិនផ្ទុះ។ ហើយក្មេងនេះបានកាប់ចាក់លើបុព្វជិតសាសនាគ្រិស្តម្នាក់ផង បណ្តាលឲ្យរបួសធ្ងន់ ហើយប៉ូលិសរកឃើញថា ក្មេងនេះជាអ្នកស្មោះស្ម័គ្រក្រុមភេរវជនរដ្ឋឥស្លាម ហើយយុវជនម្នាក់នេះព្យាយាមស្វែងយល់ពីមនោគមន៍វិជ្ជាក្រុមរដ្ឋឥស្លាមផងដែរ៕