តុលាការព្រហ្មទណ្ឌអន្តរជាតិ ព្រមានកាត់ទោសប្រទេសអាហ្វ្រិកមួយបន្ថែមទៀត

អន្តរជាតិ

តុលាការព្រហ្មទណ្ឌអន្តរជាតិ ព្រមានកាត់ទោសប្រទេសអាហ្វ្រិកមួយបន្ថែមទៀត

18, Oct 2016 , 10:39 pm

រូបភាព

លោកស្រីរដ្ឋអាជ្ញានៃតុលាការព្រហ្មទណ្ឌអន្តរជាតិ Fatou Bensouda

ដោយ:

តុលាការព្រហ្មទណ្ឌអន្តរជាតិ ឬហៅថា ICC នៅថ្ងៃទី១៧ ខែតុលាម្សិលមិញនេះ បានចេញសេចក្តីថ្លែងការណ៍ព្រមានដល់សាធារណរដ្ឋប្រជាធិបតេយ្យកុងហ្គោ ជុំវិញហិង្សាដែលបានកើតឡើងនៅរដ្ឋធានីគិនស្ហាសា ថា អាចនឹងធ្លាក់ចូលសមត្ថកិច្ចរបស់តុលាការដើម្បីបើកការស៊ើបអង្កេត។ នេះ គឺជាសារព្រមានថ្មីមួយទៀតហើយសម្រាប់ប្រទេសតំបន់អាហ្វ្រិក ដែលកំពុងតែស្ថិតក្រោមការតាមដានពីតុលាការព្រហ្មទណ្ឌស្រាប់នោះ។

លោកស្រី Fatou Bensouda រដ្ឋអាជ្ញាតុលាការព្រហ្មទណ្ឌអន្តរជាតិ បានបញ្ជាក់នៅក្នុងសេចក្តីថ្លែងការណ៍ថា លោកស្រី ពិតជាមានការព្រួយបារម្ភយ៉ាងខ្លាំងចំពោះស្ថានភាពដ៏ចម្រូងចម្រាស និងឧប្បទ្ទវហេតុហិង្សានៅក្នុងសាធារណរដ្ឋប្រជាធិបតេយ្យកុងហ្គោ ជាពិសេសនោះ ព្រឹត្តការណ៍ដែលកើតឡើងនៅក្នុងរដ្ឋធានីគីនស្ហាសា នៅខែកញ្ញាកន្លងទៅ ដោយលោកស្រី បញ្ជាក់ថា ហេតុការណ៍នោះអាចចាត់ទុកក្នុងដែនយុត្តាធិការរបស់តុលាការព្រហ្មទណ្ឌអន្តរជាតិ។

លោកស្រីរដ្ឋអាជ្ញា ក៏បានបញ្ជាក់ក្នុងសេចក្តីថ្លែងការណ៍ដែរថា ក្រុមការងាររបស់លោកស្រី កំពុងតែតានដានស្ថានភាពជាមូលដ្ឋាននៅក្នុងប្រទេសអាហ្វ្រិកខាងលិចនោះ ដែលជាប្រទេសដែលលោកស្រី អះអាងដែរថា តុលាការ បានបើកការស៊ើបអង្កេតតាំងពីឆ្នាំ២០០៤មកម្ល៉េះ។

លោកស្រីរដ្ឋអាជ្ញារូបនោះ បានសង្កត់ធ្ងន់យ៉ាងដូច្នេះថា «រាល់បុគ្គលទាំងឡាយណាដែលប្រព្រឹត្ត បញ្ជា ញុះញង់ លើកទឹកចិត្ត ឬ ចូលរួម ក្នុងឥរិយាបថណាមួយក៏ដោយ គណៈកម្មាធិការបទល្មើសដែលក្រោមយុត្តាធិការតុលាការ នឹងទទួលខុសត្រូវដើម្បីកាត់ទោស។ ខ្ញុំ នឹងមិនស្ទាក់ស្ទើរនោះទេ ក្នុងការចាត់វិធានការគ្រប់បែបយ៉ាងដើម្បីកាត់ទោសរាល់អ្នកទទួលខុសត្រូវទាំងអស់ដោយយោងតាមគោលការណ៍»។

សូមជម្រាបផងដែរថា នៅខែកញ្ញាកន្លងទៅ មានប្រជាជននៃសាធារណរដ្ឋប្រជាធិបតេយ្យកុងហ្គោរាប់ពាន់នាក់ បានផ្ទុះបាតុកម្មប្រឆាំងនឹងការពន្យារពេលនៃការបោះឆ្នោតប្រធានាធិបតីនៅក្នុងរដ្ឋធានី គីនស្ហាសា ដោយពួកគេ បានចោទប្រកាន់បក្សកាន់អំណាចថា មានចេតនាដើម្បីរក្សាតំណែងប្រធានាធិបតីនៃប្រទេសនោះ។ បាតុកម្មនោះ បានប្រែក្លាយទៅជាហិង្សា ក្រោយមានការបង្ក្រាបពីរដ្ឋាភិបាលនោះ។

តែអ្វីគួរកត់សម្គាល់នោះ សេចក្តីថ្លែងការណ៍របស់តុលាការព្រហ្មទណ្ឌអន្តរជាតិលើបញ្ហានៃសាធារណរដ្ឋប្រជាធិបតេយ្យកុងហ្គោ ត្រូវបានធ្វើបន្ទាប់ពី តុលាការ ក៏បានព្រមានលើប្រទេសតំបន់អាហ្វ្រិកប៊ូរុនឌីផងដែរ។ នៅខែមេសាកន្លងទៅ លោកស្រីរដ្ឋអាជ្ញានៃតុលាការព្រហ្មទណ្ឌអន្តរជាតិ Fatou Bensouda ក៏បានអះអាងថា លោកស្រីកំពុងតែវាយតម្លៃជាបឋមលើស្ថានភាពប៊ូរុនឌី ដើម្បីឈានទៅដល់ការស៊ើបអង្កេតពេញលេញ និងអាចឈានទៅដល់ការកាត់ទោសជនពាក់ព័ន្ធនឹងបទល្មើសថែមទៀតផង។

តាមពិតទៅ មិនមែនមានតែសាធារណរដ្ឋប្រជាធិបតេយ្យកុងហ្គោ និងប៊ូរុនឌីនោះទេ ដែលកំពុងតែស្ថិតក្រោមការតានដានរបស់តុលាការព្រហ្មទណ្ឌអន្តរជាតិនោះ។ បើយោងតាមសេចក្តីថ្លែងការណ៍របស់តុលាការ តុលាការ បាននិងកំពុងតែស៊ើបអង្កេតលើប្រទេសអាហ្វ្រិកជាច្រើនរួមមាន អ៊ូហ្គង់ដា សាធារណរដ្ឋអាហ្វ្រិកកណ្តាល កេនយ៉ា ម៉ាលី កូតឌីវ័រ និងបណ្តាប្រទេសមួយចំនួនផ្សេងទៀតផងដែរ៕