អន្តរជាតិ
នយោបាយអន្តរជាតិ
អាមេរិក ថា អត្ថាធិប្បាយចុងក្រោយរបស់ហ្វីលីពីនបង្កឲ្យមានភាពស្រឡាំងកាំងទាំងអាមេរិក និងប្រទេសក្នុងតំបន់ លោក Daniel Russel (រូបភាព៖ RT)
×
មន្ត្រីជាន់ខ្ពស់នៃក្រសួងការបរទេសអាមេរិកប្រចាំតំបន់អាស៊ី និងប៉ាស៊ីហ្វិក បានជួបពិភាក្សាជាមួយនឹងប្រមុខការទូតហ្វីលីពីនដើម្បីជជែកពីទំនាក់ទំនងទ្វេភាគី ក៏ដូចជាបកស្រាយឲ្យបានច្បាស់លាស់ពីសុន្ទរកថាចុងក្រោយរបស់ប្រធានាធិបតីហ្វីលីពីនដែលលើកឡើងថា «ហ្វីលីពីន ចែកផ្លូវពីអាមេរិក»នោះ។ ក្នុងជំនួបទ្វេភាគីនោះ បេសកជនជាន់ខ្ពស់អាមេរិករូបនោះ បានបញ្ជាក់ជាថ្មីពីការមិនប្រែប្រួលនៃជំហរការបរទេសអាមេរិកចំពោះហ្វីលីពីន តែ អាមេរិក នៅតែមានក្តីបារម្ភចំពោះបញ្ហាសិទ្ធិមនុស្សដែលជាចំណុចប្រទាំងប្រទើសរវាងប្រទេសទាំងពីរ។
លោក Daniel Russel ឧបការីទទួលបន្ទុកកិច្ចការតំបន់អាស៊ី និងប៉ាស៊ីហ្វិកនៅថ្ងៃទី២៤ ខែតុលា បានបញ្ជាក់ជំហរជាថ្មីរបស់ក្រុងវ៉ាស៊ីនតោនក្នុងជំនួបជាមួយនឹងរដ្ឋមន្ត្រីការបរទេសហ្វីលីពីនលោក Perfecto Yasay ថា «អាមេរិក នៅជាដៃគូដែលមិនប្រែប្រួល និងទុកចិត្តបាន និងជាសម្ព័ន្ធមិត្តដ៏រឹងមាំរបស់ហ្វីលីពីនដដែល»។ សេចក្តីថ្លែងការណ៍នេះ ធ្វើឡើងអំឡុងពេលនៃដំណើរទស្សនកិច្ចរបស់លោកទៅកាន់ហ្វីលីពីនដែលស្ថិតនៅក្នុងទិសដៅនៃដំណើរទស្សនកិច្ចបីប្រទេសរួមមានហ្វីលីពីន ថៃ និងកម្ពុជា។ នេះបើយោងតាមសុន្ទរកថាដែលចុះផ្សាយនៅលើ
គេហទំព័រក្រសួងការបរទេសអាមេរិក។
នាជំនួបនោះដែរ លោកឧបការី ក៏បានប្រាប់ភាគីហ្វីលីពីនឲ្យដឹងដែរថា អាមេរិក តែងតែគោរពអធិបតេយ្យ និងឯករាជ្យរបស់ហ្វីលីពីន។ លោក ក៏បានលើកពីវគ្គបណ្តុះបណ្តាល ការកសាងសមត្ថភាព សម្ភារផ្សេងៗរបស់អាមេរិកកន្លងមក គឺជាផ្នែកមួយដ៏សំខាន់ក្នុងការចូលរួមការពារស្វ័យភាព និងលើកកម្ពស់សមត្ថភាពការពារខ្លួនដោយខ្លួនឯងរបស់ហ្វីលីពីននោះឯង។
ដោយមិនមានការលាក់លៀម ក្នុងជំនួបនោះដែរ លោក Russel បានប្រាប់លោក Yasay ត្រង់ៗយ៉ាងដូច្នេះថា «ការធ្វើអត្ថាធិប្បាយដ៏ចម្រូងចម្រាសអំពីចេតនារបស់ហ្វីលីពីន បានបង្កើតឲ្យមានភាពស្រឡាំងកាំងនៅក្នុងប្រទេសជាច្រើន, ដោយមិនមែនតែនៅក្នុងប្រទេសរបស់ខ្ញុំ និងក្នុងចំណោមរដ្ឋាភិបាលនោះទេ»។ លោកបន្ថែមថា មានការសម្តែងការព្រួយបារម្ភជាច្រើននៅក្នុងចំណោមសហគមន៍ ដូចជាសហគមន៍ហ្វីលីពីន និងសហគមន៍សាជីវកម្មជាដើម។
សូមជម្រាបផងដែរថា ការធ្វើអត្ថាធិប្បាយតាមតែអារម្មណ៍ និងដោយគ្មានការបកស្រាយច្បាស់លាស់នាពេលចុងក្រោយនេះរបស់ប្រធានាធិបតីហ្វីលីពីន រ៉ូឌ្រីហ្គូ ឌើទើតេ លើទំនាក់ទំនងជាមួយនឹងសម្ព័ន្ធមិត្តរាប់សិបឆ្នាំ «អាមេរិក» បានធ្វើឲ្យមានការចាប់អារម្មណ៍ និងភ្ញាក់ផ្អើលខ្លាំង។ ការធ្វើអត្ថាធិប្បាយនោះគឺការប្រកាសរបស់លោក ឌើទើតេ ដោយលោក លើកឡើងថា លោក សូមប្រកាសចែកផ្លូវជាមួយនឹងអាមេរិកទាំងផ្នែកសេដ្ឋកិច្ច និងយោធា ក្នុងពេលលោក បានកំពុងតែបំពេញទស្សនកិច្ចនៅក្នុងក្រុងប៉េកាំងនៃប្រទេសចិននាសប្តាហ៍មុន។
ការអត្ថាធិប្បាយរបស់លោកប្រធានាធិបតីហ្វីលីពីន រូបនោះ បានរាលដាលឡើង ក៏ព្រោះតែលោក មិនសប្បាយចំពោះការរិះគន់របស់សហរដ្ឋអាមេរិកលើចំណាត់ការបង្ក្រាបគ្រឿងញៀនរបស់លោក ដោយលោកប្រធានាធិបតី អះអាងថា អាមេរិក ដឹងតែពីរិះគន់ ខណៈ មិនបានជួយខ្លួនក្នុងការបង្ក្រាបនោះ។
យ៉ាងណាក៏ដោយ ជុំវិញរឿងបង្ក្រាបគ្រឿងញៀននេះដែរ លោកឧបការី Russel ក៏បានបកស្រាយឲ្យលោករដ្ឋមន្ត្រីការបរទេសហ្វីលីពីនដឹងដែរថាអាមេរិក តែងតែគាំទ្រកិច្ចប្រឹងប្រែងរបស់ហ្វីលីពីនក្នុងការប្រឆាំងនឹងបទល្មើសគ្រឿងញៀន តែអាមេរិក ក៏តែងតែឲ្យតម្លៃលើការគោរពច្បាប់ និងការគោរពសិទ្ធិរបស់ប្រជាជនផងដែរ៕
Tag:
អាមេរិក
ហ្វីលីពីន
អាស៊ាន
© រក្សាសិទ្ធិដោយ thmeythmey.com