អន្តរជាតិ
ដូណាល់ ត្រាំ ដាក់កូនបីនាក់ក្នុងក្រុមការងារអន្តរកាល ឯលោក Mike Pence ជាប្រធាន
×
ប្រធានាធិបតីជាប់ឆ្នោតថ្មី ដូណាល់ ត្រាំ បានដាក់កូនប្រុសស្រីបីនាក់ និងកូនប្រសារប្រុសម្នាក់ ទៅក្នុងសមាសភាពថ្មីនៃក្រុមការងារអន្តរកាលទទួលបន្ទុកផ្ទេរអំណាច។ ដោយឡែកអនុប្រធានាធិបតីជាប់ឆ្នោត Mike Pence នឹងក្លាយជាប្រធានក្រុមការងារនេះ ខណៈមនុស្សស្មោះត្រង់នឹងលោកជាច្រើននាក់ ក៏ត្រូវបានបញ្ចូលឈ្មោះក្នុងក្រុមការងារនេះដែរ ហើយគេរំពឹងថា អ្នកទាំងអស់នេះ ក៏នឹងមានឈ្មោះក្នុងគណៈរដ្ឋមន្ត្រីថ្មីរបស់លោកដែរ។
លោក ដូណាល់ ត្រាំ បានសម្រេចឲ្យអនុប្រធានាធិបតី Mike Pence ដឹកនាំក្រុមការងារអន្តរកាល ដែលជួយលោកក្នុងការបង្កើតគោលនយោបាយ ជំនួសប្រធានចាស់លោក Chris Christie ដែលជាអភិបាលរដ្ឋ New Jersey ។ ប្រធានាធិបតីជាប់ឆ្នោតថ្មីរូបនេះ បានសម្រេចចិត្តផ្លាស់ប្ដូរក្រុមការងារអន្តរកាល ក្រោយប្រជាជនអាមេរិករាប់សិបពាន់នាក់ ធ្វើបាតុកម្មមិនទទួលស្គាល់លោក ជាប្រធានាធិបតីឡើយ។
ក្នុងសេចក្ដីប្រកាសថ្ងៃទី១១ ខែវិច្ឆិកា លោក ដូណាល់ ត្រាំ ក៏បានតែងតាំងមនុស្សសំខាន់ជាច្រើននាក់ ជាអនុប្រធានក្រុមការងារនេះដែរ។ លោក Christie អតីតបេក្ខជនប្រធានាធិបតីជុំដំបូង Ben Carson អតីតប្រធានរដ្ឋសភា Newt Gingrich លោកឧត្តមសេនីយ៍ Michael Flynn អតីតអភិបាលក្រុងញូវយ៉ក Rudy Giuliani, និងសមាជិកព្រឹទ្ធសភារដ្ឋ Alabama Jeff Sessions សុទ្ធសឹងជាអនុប្រធានក្រុមការងារនេះទាំងអស់។
លើសពីនេះ សេដ្ឋីអចលនទ្រព្យរូបនេះ ក៏បានបញ្ចូលកូនប្រុសស្រីបីនាក់ និងកូនប្រសារប្រុសម្នាក់ទៀត ជាសមាជិកក្រុមការងារនេះដែរ។ កូនៗលោកទាំងបួន សុទ្ធតែចូលរួមយ៉ាងសកម្មក្នុងការយុទ្ធនាការស្វែងរកសំឡេងឆ្នោតនាពេលកន្លងមក។ ក្រៅពីនេះ ឥស្សរជនតំណែងខ្ពស់ៗក្នុងជួរបក្សសាធារណរដ្ឋ ក៏ដូចជាមនុស្សជំនិតរបស់លោកជាច្រើននាក់ ក៏មានឈ្មោះក្នុងក្រុមការងារនេះដែរ។ នេះបើយោងតាមកាសែត The New York Times។
ប្រធានាធិបតីជាប់ឆ្នោតរូបនេះ ក៏បានបង្ហោះសារតាមបណ្ដាញសង្គមTwitter ជុំវិញការជ្រើសរើសបេក្ខភាពនានាសម្រាប់តំណែងក្នុងគណៈរដ្ឋមន្ត្រីរបស់លោក ដោយលោកនឹងធ្វើការសម្រេចចិត្តយ៉ាងធំមួយ។ អនាគតប្រធានាធិបតីវ័យ៧០រូបនេះ នឹងត្រូវមានការងារច្រើន ជាពិសេសការសំឡឹងមើលបេក្ខជនរដ្ឋមន្ត្រីដែលសក្តិសម និងសមាជិកព្រឹទ្ធសភាតែម្ដង។
សមាជិកភាគច្រើននៃក្រុមការងារផ្ទេរអំណាចខាងលើ និងមនុស្សជំនិតមានសង្ឃឹមខ្ពស់ក្នុងការទទួលតំណែងរដ្ឋមន្ត្រី។ មកទល់ពេលនេះ ក៏មានការផ្គូរផ្គងមួយចំនួនលើតួនាទីរដ្ឋាភិបាលរួចហើយដែរ បើទោះជាប្រធានាធិបតី ត្រាំ មិនទាន់ប្រកាសផ្លូវការក៏ដោយ។ លោក Steven Mnuchin ប្រធានហិរញ្ញវត្ថុរបស់លោក ត្រាំ ទំនងក្លាយជារដ្ឋហិរញ្ញវត្ថុថ្មី ឯប្រធានគណៈកម្មាធិការការបរទេសបក្សសាធារណរដ្ឋ Bob Corker មានលទ្ធភាពច្រើនសម្រាប់តំណែងជារដ្ឋមន្ត្រីការបរទេសថ្មី ប៉ុន្តែកូនៗរបស់លោក ត្រាំ មិនទាន់ការផ្គូរផ្គងអ្វីនៅឡើយ៕
Tag:
អាមេរិក
ដូណាល់ ត្រាំ
© រក្សាសិទ្ធិដោយ thmeythmey.com