ឧទ្ទាមមីយ៉ាន់ម៉ាចងសម្ព័ន្ធគ្នា វាយប្រហារជាថ្មីលើកងកម្លាំងរដ្ឋាភិបាល នៅភាគខាងជើង

អន្តរជាតិ

នយោបាយអន្តរជាតិ

ឧទ្ទាមមីយ៉ាន់ម៉ាចងសម្ព័ន្ធគ្នា វាយប្រហារជាថ្មីលើកងកម្លាំងរដ្ឋាភិបាល នៅភាគខាងជើង

22, Nov 2016 , 7:59 am

រូបភាព

ដោយ: ថ្មីៗ

ប្រជាធិបតេយ្យទៅមុខ តែសន្តិភាព និងសន្តិសុខផ្ទៃក្នុងមីយ៉ាន់មា់ នៅតែផុយស្រួយ។ ក្រុមឧទ្ទាមទាហានឯករាជ្យជាច្រើនក្រុម និងកងកម្លាំងរដ្ឋាភិបាលមីយ៉ាន់ម៉ា នៅថ្ងៃអាទិត្យម្សិលមិញនេះ បានបើកការវាយប្រហារប្រដាប់អាវុធជាថ្មី នៅក្បែរតំបន់ព្រំដែនជាប់នឹងចិន ដែលបានបណ្តាលឲ្យជនស៊ីវិលបាត់បង់ជីវិត និងប្រជាជនមួយចំនួនផ្សេងទៀតត្រូវជម្ហៀសខ្លួន។ នេះ គឺជាការប៉ះទង្គិចគ្នាទ្រង់ទ្រាយធំលើកដំបូងហើយ ក្រោមរដ្ឋបាលថ្មីរបស់លោកស្រីអ៊ុងសាន ស៊ូជី បើទោះបីជាលោកស្រី ខិតខំចរចាសន្តិភាពក៏ដោយ។

ក្រុមឧទ្ទាមទាហានឯករាជ្យធំបួន គឺទាហានរណសិរ្សរំដោះជាតិតាអាង (TNLA) ទាហានសម្ព័ន្ធប្រជាធិបតេយ្យជាតិ (MNDAA) ទាហានអារ៉ាកាន (AA) និងទាហានឯករាជ្យកាឈិន (KIA) នៅថ្ងៃទី២០ ខែវិច្ឆិកា ម្សិលមិញនេះ បានចងសម្ព័ន្ធគ្នាបើកការវាយប្រហារទៅលើទាហាន និងប៉ុស្តិ៍នរគបាលមីយ៉ាន់ម៉ាបីកន្លែង។ ការវាយប្រហារនេះ ត្រូវបានរដ្ឋបាលរបស់ទីប្រឹក្សារដ្ឋមីយ៉ាន់ម៉ាលោកស្រី អ៊ុងសាន ស៊ូជី បញ្ជាក់ថា បានសម្លាប់មនុស្សប្រាំបីនាក់ ដែលជាកងកម្លាំងរដ្ឋាភិបាល និងប្រជាជនស៊ីវិល។

ការបើកប្រតិបត្តិការវាយប្រហាររបស់ក្រុមឧទ្ទាមឯករាជ្យដោយចងជាសម្ព័ន្ធ បានកើតឡើងនៅក្នុងតំបន់សេដ្ឋកិច្ច Muse ដែលមានទីតាំងនៅខេត្តសានភាគខាងជើងនៃប្រទេស ដែលមានព្រំប្រទល់ជាប់ជាមួយនឹងចិនផងដែរនោះ។ នេះបើយោងតាមសារព័ត៌មានមីយ៉ាន់ម៉ា Irrawaddy ដែលបានអះអាងដែលថា ការបើកការវាយប្រហារនេះ មិនត្រឹមតែទាមទារអាយុជីវិតរបស់ប្រជាជនប៉ុណ្ណោះនោះទេ តែ ផ្លូវជាច្រើន ក៏ត្រូវបានបិទ ហើយប្រជាជនក្នុងស្រុក ក៏បាននិងកំពុងតែភៀសខ្លួនតាមព្រំដែនសំដៅទៅក្នុងទឹកដីចិន។

មិនមានការបញ្ជាក់ហេតុផលណាមួយជុំវិញការវាយប្រហារចុងក្រោយនេះឡើយ។ តែបើតាមកិច្ចសម្ភាសន៍រវាងស្ថានិកម្នាក់របស់ទាហានរណសិរ្សរំដោះជាតិតាអាង(TNLA) លោក Tar Bone Kyaw ជាមួយសារព័ត៌មាន Al Jazeera នៅដើមឆ្នាំ២០១៦ បានអះអាងយ៉ាងដូច្នេះថា៖« យើង មិនមែនកំពុងតែទាមទារនិងសុំអំណាចនោះទេ។ ហើយយើង ក៏មិនបានទាមទារឯករាជ្យអ្វីដែល។ យើង គ្រាន់តែចង់កសាងសហព័ន្ធនៅក្នុងមីយ៉ាន់ម៉ាជាមួយនឹងជាតិសាសន៍ដទៃទៀតប៉ុណ្ណោះ»។

កិច្ចព្រមព្រៀងសន្តិភាពផ្ទៃក្នុងមីយ៉ាន់ម៉ា មិនងាយកសាងឡើយ

សូមជម្រាបផងដែរថា គឺរយៈពេល៦៨ឆ្នាំហើយដែលមីយ៉ាន់ម៉ា បានប្រកាសឯករាជ្យពីម្ចាស់អាណានិគមអង់គ្លេស តែមីយ៉ាន់ម៉ា នៅមិនទាន់ស្វែងរកសន្តិភាពពេញលេញនៅទូទាំងប្រទេសបានឡើយ ដ្បិត មានក្រុមឧទ្ទាមជនជាតិភាគតិចជាច្រើន នៅតែប្រយុទ្ធទាមទារយកស្វ័យភាពគ្រប់គ្រងដែនដី។ រដ្ឋាភិបាលជាច្រើនអាណត្តិហើយ បានព្យាយាមចរចាស្វែងរកកិច្ចព្រមព្រៀងសន្តិភាព តែនៅតែមិនអាចទាញយកគ្រប់ភាគីនៃជម្លោះបាន។

ក្រោមរដ្ឋបាលរបស់អតីតប្រធានាធិបតីថេន សេន ដែលបានឡើងកាន់អំណាចតាំងពីឆ្នាំ២០១១ បានព្យាយាមចរចាជាមួយនឹងក្រុមឧទ្ទាមស្ទើរតែពេញមួយអាណត្តិប្រធានាធិបតីរបស់លោក។ ជាលទ្ធផល នៅខែតុលា ឆ្នាំ ២០១៥ រដ្ឋាភិបាលលោក ថេន សេន បានចុះហត្ថលេខាលើកិច្ចព្រមព្រៀងសន្តិភាពស្តីពីបទបាញ់ជាមួយនឹងក្រុមជនជាតិភាគតិចចំនួន៨ក្រុម។ តែកិច្ចព្រមព្រៀងនេះ គ្មានប្រសិទ្ធភាពអ្វីឡើយ ដ្បិតវា មិនគ្របដណ្តប់ទៅលើក្រុមឧទ្ទាមធំៗទាំងនោះ។ ហើយនោះ ក៏ព្រោះតែ រដ្ឋបាលលោក ថេន សេន មិនបានអញ្ជើញក្រុមទាំងនោះ ឲ្យចូលរួមចរចាឡើយ ក្រោមហេតុផលថា រដ្ឋាភិបាល មិនចង់ចរចាជាមួយនឹងក្រុមដែលតែងតែវាយប្រហារទៅលើខ្លួននោះ។

អ្វីគួរកត់សម្គាល់នោះ អ្នកបន្តវេនលោកថេន សេន គឺរដ្ឋបាលលោកស្រីអ៊ុងសាន ស៊ូជី ក៏បានចាត់ទុកការកសាងសន្តិភាពជាកិច្ចការអាទិភាពផងដែរ។ លោកស្រី ក៏ធា្លប់លើកឡើងដែរថា « បើប្រទេសគ្មានសន្តិភាពនោះទេ រដ្ឋាភិបាល ក៏មិនអាចធ្វើអ្វីបានដែរ» ។ ដោយមិនត្រឹមតែនិយាយតែមាត់នោះទេ គិតចាប់ពីកាន់អំណាចនៅខែមេសាកន្លងមក លោកស្រី ក៏បានបន្តជួបចរចាជាមួយនឹងក្រុមឧទ្ទាមជាច្រើនផងដែរ ដើម្បីធានាឲ្យបានកិច្ចព្រមព្រៀងសន្តិភាពបទឈប់បាញ់មួយនោះ។ ជាក់ស្តែងនោះ នៅខែសីហាកន្លងទៅ លោកស្រី ក៏បានបើកសន្និសីទសន្តិភាពធំមួយជាមួយនឹងក្រុមឧទ្ទាមមួយចំនួនផងដែរ តែ នៅតែអវត្តមានក្រុមឧទ្ទាមប្រដាប់អាវុធធំដដែល។

ចិន ប្រុងជើងការ ខ្លាចភាពតានតឹងមីយ៉ាន់ម៉ា ធា្លយដល់ចិន

ងាកមកកាន់ចិន ដែលមានព្រំដែនជាប់នឹងតំបន់ជម្លោះ និងជារៀងរាល់ឆ្នាំ ក៏តែងតែទទួលជនភៀសខ្លួនពីមីយ៉ាន់ម៉ាបន្តិច! តាមរយៈសេចក្តីថ្លែងការណ៍របស់ក្រសួងការពារជាតិចិន យោធាចិន កំពុងតែតាមដានស្ថានភាពយ៉ាងយកចិត្តទុកដាក់ខ្លាំងណាស់ដែរ។ ក្រុងប៉េកាំង ក៏សង្ឃឹមថា ភាគីពាក់ព័ន្ធជម្លោះ រក្សាភាពស្ងៀមស្ងាត់ និងអត់ធ្មត់ ដើម្បីបញ្ជៀសការរីករាលដាលនៃស្ថានភាព និងហេតុការណ៍ផ្សេងៗ ដែលអាចនឹងគំរាមកំហែងដល់អធិបតេយ្យ និងសន្តិសុខជាតិចិន។

បើតាមសារព័ត៌មានចិន Global Times នៅក្នុងឆ្នាំ២០១៥កន្លងទៅ មានពលរដ្ឋមីយ៉ាន់ម៉ា ប្រហែលប្រាំមួយម៉ឺននាក់ ភៀសខ្លួនតាមព្រំដែន និងជាងមួយម៉ឺននាក់ ក៏បានតាំងលំនៅបណ្តោះអាសន្ន នៅក្នុងខេត្ត Yunna នៃប្រទេសចិនផងដែរ៕