ជាតិ
នយោបាយជាតិ
មន្ត្រីCNRP សង្ឃឹមថា នឹងមានជំនួបឯ.ឧ កឹម សុខា និងសម្តេច ស ខេង នៅថ្ងៃពុធ តែមន្ត្រីCPP មិនទាន់ច្បាស់
× ភ្នំពេញ៖ រដ្ឋសភានឹងបន្តសម័យប្រជុំលើកទី៧ នីតិកាល៥ នៅព្រឹកថ្ងៃទី៧ ខែធ្នូ។ តាមគម្រោង រដ្ឋសភានឹងពិនិត្យសេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០១៥ និងការដាក់បេក្ខភាពជំនួសលោក ប៉ែន សុវណ្ណ ដែលទទួលមរណភាពកាលពីខែតុលាកន្លងទៅ។ តំណាងរាស្ត្រគណបក្សប្រជាជនកម្ពុជា មិនដឹងច្បាស់ថា កិច្ចប្រជុំសភា នៅថ្ងៃពុធ នឹងមានជំនួបរវាងសម្តេច ស ខេង និងឯកឧត្តម កឹម សុខា នោះទេ។
លោក ឡេង ប៉េងឡុង អ្នកនាំពាក្យរដ្ឋសភា ពុំដឹងនោះទេថា កិច្ចប្រជុំសភានៅថ្ងៃពុធទី ៧ ខែធ្នូ នឹងមានជំនួបពិភាក្សារវាងក្រុមតំណាងមតិភាគតិច និងមតិភាគច្រើន ក្នុងរដ្ឋសភាឡើយ។ លោក ប៉េងឡុង ដឹងតែរបៀបវារៈចំនួន ២ តែប៉ុណ្ណោះ នៅក្នុងកិច្ចប្រជុំសភានៅថ្ងៃពុធ ពោល គឺការពិនិត្យសេចក្តីព្រាងច្បាប់ស្តីពី ការទូទាត់ថវិកាទូទៅរបស់រដ្ឋសម្រាប់ការគ្រប់គ្រងឆ្នាំ ២០១៥ និងការដាក់បេក្ខភាព លោក សួន រីដា ជំនួសលោក ប៉ែន សុវណ្ណ ដែលទទួលមរណភាពកាលពីខែតុលាកន្លងទៅ។ «ជំនួបសម្តេច ស ខេង និង ឯកឧត្តម កឹម សុខា ជារឿងនយោបាយ ពុំមានកំណត់ក្នុងរបៀបវារៈទេ។»។ នេះជាការបញ្ជាក់របស់លោកអ្នកនាំពាក្យខាងលើ។
លោក សុខ ឥសាន អ្នកនាំពាក្យគណបក្សប្រជាជនកម្ពុជា ក៏នៅមិនទាន់ដឹងច្បាស់ដែរថា នៅថ្ងៃពុធ នឹងមានជំនួបរវាងប្រធានក្រុមតំណាងរាស្ត្រមតិភាគច្រើន និងភាគតិចនៅក្នុងរដ្ឋសភានោះឡើយ។ « ខ្ញុំគិតថា បើជួបគ្នា ក៏មិនដឹងពិភាក្សាគ្នារឿងអ្វីដែរ ព្រោះរឿងអ្នកមានក្តីក្តាំនៅតុលាការ និងអ្នកជាប់ពន្ធនាគារ តុលាការកំពុងតែដំណើរការ។ បើយើងជជែកគ្នា វាប៉ះពាល់ដល់ឯករាជ្យភាព និងការសម្រេចចិត្តរបស់តុលាការ»។ នេះជាការបន្ថែមរបស់លោក សុខ ឥសាន។
សារព័ត៌មានថ្មីៗ ពុំអាចសុំការបញ្ជាក់ពីលោក យ៉ែម បុញ្ញឫទ្ធិ អ្នកនាំពាក្យសភាមកពីក្រុមតំណាងរាស្ត្រមតិភាគតិចក្នុងសភាឡើយ ដោយសារលោកកំពុងប្រជុំផ្ទៃក្នុងគណបក្ស នៅរសៀលនេះ។ យ៉ាងណា លោក បុញ្ញឫទ្ធិ ធ្លាប់ប្រាប់ពីក្តីសង្ឃឹមដល់អ្នកកាសែតថា ថ្នាក់ដឹកនាំតំណាងរាស្ត្រទាំងពីរក្រុម នឹងជួបពិភាក្សារកដំណោះស្រាយ និងរកកាផ្សះផ្សារជាតិបន្ថែមទៀត នៅថ្ងៃពុធ ក្រោយពីឯកឧត្តម កឹម សុខា ត្រូវបានព្រះមហាក្សត្រលើកលែងទោស កាលពីថ្ងៃ ទី២ ធ្នូ កន្លងទៅ។
លោក យ៉ែម បុញ្ញឫទ្ធិ ប្រាប់អ្នកកាសែតកាលពីថ្ងៃទី ៥ ខែធ្នូ នៅវិមានរដ្ឋសភាថា ឯកឧត្តម កឹម សុខា នឹងចូលរួមប្រជុំសភានៅថ្ងៃពុធផងដែរ។
កាលពីថ្ងៃទី ៤ ខែធ្នូ នៅពេលដែលជួបជាមួយុវជន ឯកឧត្តម កឹម សុខា ធ្លាប់អះអាងថា លោកនឹងទៅចូលរួមក្នុងកិច្ចប្រជុំសភា។ អ្នកនយោបាយដែលធ្លាប់ឃុំខ្លួនក្នុងស្នាក់ការបក្សអស់ ៦ ខែ លើកឡើងបែបនេះហើយ និយាយដូច្នេះថា៖« បើមានប្រជុំរដ្ឋសភា ខ្ញុំនឹងទៅចូលប្រជុំ ហើយនឹងមានការជជែកគ្នា រវាងក្រុមមតិភាគច្រើន និងក្រុមមតិភាគតិច»៕
© រក្សាសិទ្ធិដោយ thmeythmey.com