ជាតិ
ទេសចរពី៣ទៅ៤ពាន់នាក់ឡើងមើលថ្ងៃលិចនៅលើភ្នំបាខែង ![](https://image.thmeythmey.com/pictures/2016/12/07/photo_2016-12-07_16-32-41.jpg)
×![]()
សៀមរាប៖ ភ្នំបាខែង គឺជាគោលដៅមួយដ៏ទាក់ទាញសម្រាប់ភ្ញៀវទេសចរ ដែលចូលចិត្តមើលថ្ងៃលិច។ រាល់ពេលរសៀល ភ្ញៀវទេសចរជាតិ និងអន្តរជាតិ តែងសម្រុកឡើងលើកំពូលភ្នំបាខែង ក្នុងបំណងមើលថ្ងៃលិចដ៏ស្រស់ស្អាតក្នុងរមណីយដ្ឋានអង្គរមួយនេះ។ បើតាមភ្នាក់ងារទេសចរណ៍ ដែលមើលការខុសត្រូវនៅលើភ្នំនេះ ក្នុងមួយថ្ងៃមានទេសចរពី៣ទៅ៤ពាន់ ដែលបានឡើងចុះមើលថ្ងៃលិចនៅលើកំពូលប្រាសាទភ្នំបាខែង។
ភ្ញៀវទេសចរអាចធ្វើដំណើរដោយថ្មើរជើងក៏បាន និងដោយមធ្យោបាយជិះដំរីក៏បាន ដើម្បីទៅដល់កំពូលភ្នំបាខែង។ នៅលើកំពូលភ្នំនេះមានទិដ្ឋភាពដ៏ស្រស់ស្អាតជាច្រើនកន្លែងទៀត ក្រៅពីចំណុចមើលថ្ងៃលិចតែមួយមុខនោះ។
លោក លី និមល អនុប្រធានក្រុមភ្នាក់ងារទេសចរណ៍របស់អាជ្ញាធរជាតិអប្សរា ដែលប្រចាំនៅលើភ្នំបាខែង បានឲ្យដឹងថា ក្នុងមួយថ្ងៃមានភ្ញៀវទេសចរសរុបពី៣ទៅ៤ពាន់នាក់ ដែលបានតម្រង់ជួរចាំឡើងលើភ្នំបាខែង។ ហេតុផលដោយសារគោលការណ៍នៃការឡើងចុះលើភ្នំប្រវត្តិសាស្ត្រមួយនេះ គឺតម្រូវឲ្យមានចំនួនត្រឹម៣០០នាក់ប៉ុណ្ណោះ ដោយភ្ញៀវទេសចរទាំងអស់ ត្រូវផ្លាស់ប្តូរបណ្ណគ្នា។ លោកពន្យល់ថា៖« បើចំនួនភ្ញៀវគ្រប់៣០០នាក់ហើយ យើងតម្រូវឲ្យភ្ញៀវឯទៀតតម្រង់ជួរចាំ បើមានអ្នកចុះ ទើបយើងអនុញ្ញាតឲ្យអ្នកផ្សេងឡើង...»។
ដោយមិនមានកំណត់ពេលវេលាដល់ភ្ញៀវនោះ ធ្វើឲ្យការកំណត់ចំនួនភ្ញៀវនេះមានប្រតិកម្មពីភ្ញៀវឯទៀត ដែលមិនបានឡើងទស្សនាថ្ងៃលិច។ ក្រុមភ្នាក់ងារទេសចរណ៍នៅទីនោះបានបញ្ជាក់ថា ជារឿយៗពួកគេតែងតែទទួលបានការខឹងសម្បារពីសំណាក់ភ្ញៀវ ហើយពួកគេរិះគន់ច្រើនលើចំណុចមួយនេះ។ លោក និមល បានពន្យល់បន្ថែមថា៖« អ្នកខ្លះ ខំឡើងមកដល់ហើយ តែមិនបានឡើង គាត់ខឹងនឹងពួកយើង ដែលមិនបានអនុញ្ញាតឲ្យពួកគាត់ឡើង»។
ការកំណត់ចំនួនបរិមាណភ្ញៀវឡើងលើភ្នំបាខែង បានចាប់ផ្តើមអនុវត្តមុននឹងមានការដ្ឋានជួសជុលនៅទីនោះ។ បើតាមអ្នកជំនាញ ការកំណត់គោលការណ៍នេះ គឺដោយសារបរិវេណនៅទីនោះមិនទំនេរ ដោយភាគច្រើនត្រូវហ៊ុំព័ទ្ធដោយរនាំងការដ្ឋាន។ លោក ហ៊ុន ប៊ុនវឌ្ឍន៍ ស្ថាបត្យកររបស់ WMF ដែលកំពុងដំណើរការជួសជុលនៅលើប្រាសាទភ្នំបាខែង បានបញ្ជាក់ថា ភ្ញៀវទេសចរអាចឡើងលើប្រាសាទនេះជាធម្មតា ដោយមិនមានគិតពីទម្ងន់ឡើយឲ្យតែមានកន្លែងឈរ។
នៅលើភ្នំបាខែង ក្រៅពីគយគន់ថ្ងៃលិចហើយនោះ ភ្ញៀវទេសចរក៏អាចមើលឃើញពីទិដ្ឋភាពផ្សេងៗទៀត រួមមានក្រុងសៀមរាប បាយរាយណ៍ទឹកថ្លា ប្រាសាទអង្គរវត្ត ប្រាសាទបក្សីចាំក្រុង និងព្រលានយន្តហោះខេត្តសៀមរាបជាដើម។ល៕
Tag:
ទេសចរណ៍
ភ្នំបាខែង
© រក្សាសិទ្ធិដោយ thmeythmey.com